Dragon's Blade [ Season-2 ]

DB-87 (မီးအိမ်ရှင်မိဖုရားလောင်း-၆)

မနက်မိုးမလင်းခင်တည်းက ထိုက်ချီ နန်းတွင်းမှာ နန်းတွင်းသူတွေရော မိန်းမစိုးကြီးတွေပါ အလုပ်ရှုပ်နေကြသည်။ ညသန်းခေါင်ယံလောက်မှာ ဧကရာဇ်၏ သမီးတော်လေး မင်းသမီးဗြော ပျောက်ဆုံးမူကြောင့် နန်းတွင်းတစ်ခုလုံး ဗြောင်းဆန်နေခဲ့တာ ဖြစ်သည်။

တစ်ခါ ညသန်းခေါင်ယံနောက်ပိုင်းမှာပဲ ထိုက်ချီဘုရင်က စေ့စပ်မင်္ဂလာသတင်း ကြေငြာ၍ ပုရောဟိတ်များ၊ အမတ်ကြီးများ၊ နိမိတ်ဖတ်ဆရာကြီးများက အပြေးရောက် လာကာ မင်္ဂလာချိန် သတ်မှတ်ပေး ရသည်။ သတ်မှတ်ကာလ၏ ဒုတိယမြောက် ရက်ကို ရောက်နေပြီဖြစ်တာကြောင့် တက်နိုင်သမျှ မြန်လေကောင်းလေပဲ ဖြစ်ပြီး မင်းသမီး လေးလည်း ပို၍ အန္တရာယ်ကင်း နိုင်တာ ဖြစ်သည်။

မနက်နေထွက်ချိန်မှာတော့ ဗြောလေးသည် သူနှင့် အဆမတန် ကြီးမားသော အနီရောင် ဇာမဏိဝတ်စုံကို ဆင်မြန်းရတော့သည်။ ထိုက်ခွန်းက မင်္ဂလာဝတ်စုံကိုသာ ပြင်ထားတာမို့ မင်္ဂလာဝတ်စုံသာ ဝတ်ရတော့သည်။ ရဲရဲနီသော ပိုးသားအစတွင် ရွှေရောင် ဇာမဏိငှက်ကြီးက ပျံသန်းနေပုံ ဖြစ်သည်။

ဘတ်ဟျွန်းက တစ်လျောက်လုံး ဘေးမှာ ထိုင်ကြည့်နေတာမို့ သူ့သမီးလေး၏ အူကြောင်ကြောင် မျက်နှာလေးကို ချစ်စဖွယ် မြင်နေရသည်။ ထို့နောက် ဘတ်ဟျွန်းက နေရာက ထလာပြီး သူယူခိုင်းထားသည့် အနီရောင်အပ်ချည်နှင့် အပ်ကို ယူလိုက်သည်။

ဗြောလေးကိုယ်နှင့် ဝတ်စုံကို သေချာ တိုင်းတာလိုက်ပြီး ပြန်ချွတ်စေသသည်။ ပိုနေတာတွေကို ချုံ့ပစ်ဖို့ ။ ရှည်လွန်းနေတဲ့ အောက်က အစတွေကို ဖျတ်ပစ်ဖို့ ။ နန်းတွင်းအပ်ချုပ်သမများကလည်း ပြင်ဖို့ ရောက်လာကြပေမဲ့ ကိုယ်တိုင်လုပ်ပေးနေတဲ့ ကြင်ယာတော်ဆီက မတောင်းရဲကြလေဘူး။ ကြင်ယာတော် ကိုယ်တိုင်ကလည်း သူကိုယ်တိုင်ပဲ လုပ်ပါရစေဟု ပြောတာ ကြောင့်ပင်။

ဗြောလေးသည် ယခုထိ အကြောင်းအရာများကို မယုံနိုင်သေး။ ဝတ်စုံကိုပြန်ပြင်ပေးနေသည့် ခမည်းတော် ဝမ်အွန်းဘေးတွင် ငူငူလေး ထိုင်ငေးနေလေ၏။

" ခမည်းတော် ... ဆောတို့ကို အပြစ်မပေးဖို့ ပြောပေးပါဦးနော် "