عشق السلاطين {باللهجة العراقية}

البارت 22

عشق _ السلاطين _بارت 22
٠
٠
بقلمي ياسمين
٠
٠
وتسالني اين وطني..؟
مد لي اصابع يدك لاقول لك وطني في عينيك وبين يديك وفي جفنيك وفي حضنك ،، انت وطني

ليان ...

اسوء، شعور ممكن يمر عالانسان هو احساس كسرة النفس لمن يجبرك وضعك تصير كدام موقف تشوف نفسك بيه مغبون مااخذت حقك بيه ولا المقابل انصفك بحيث توصل مرحلة بعدها تبلش تتعب من كلشي يخطر على بالك "الانتظار والاشتياق واللهفة والحب"
لهذا الشخص بحد ذاته الي حاولت قدر امكاني اسعاله واقدمله حبي وكلبي بصحن من ذهب وهو مستمر يتجاهلني ورافض من الاساس يسمعني  ،، هنا شعور التلاشي يبدي بالروح تدريجي وتصير بلا شعور منك تتجاهل احساس روحك من تبدي تضيع متعمد هالشي ويختفي جزء منها شوية شوية تحت مطالب انت تشوفها مشروعة بحق نفسك والك الاولوية بيها

تصير تتجاوز كل هاي المراحل من توصل مرحلة اليأس او الثار لنفسك بس هي بالواقع انت قررت تحارب للرمق الاخير وخيار اللعب عالمكشوف صار غايتي

من شفتها لحبيبته وشلون احتظنها وقدمها للكل حسيت نار الغيرة حركت كلبي حرك لمن عطب
نظراته الها اهتمامه حبه الها وهو يراقب خطواتها اني الي جنت استحقه مو هي

بلحظتها صعدت لغرفتي بعد ماطاقتي صفرت مستحيل اتحمل اشوف منظرهم كدام عيني طول السهرة دمعتي جمدت بعيني  ،، وبيني وبين نفسي حلفت يمين عظيم ابطل ابجي وانتحب على حظي مثل كل مرة  وهالمرة اني لو هو حسيت غلياني وانفعالاتي اقوى من اللوم والعتب على حظي
جانت من اصعب الليالي الي مريت بيها عيني ماغمضت ابد اريد ارتب افكاري واريد انتقم منها لان اجت عالجاهز واخذته واني صرت الطرف الثالث بينهم ماكدرت انام ابد وهالمرة كلشي اختلف بيه الاف  الخطط اجت ببالي واغلب افكاري اخذتني لدور بشع ماجان من صفاتي ساعة افكر اشتري قاتل بملبغ يسوى واخليه يصفيها ساعة افكر اخطفها وكطعها تكطع بيدي ماخلي بيها عظم صاحي ساعة افكر انتـ....حر واخلص  .. ومرات اكول لا ليش اموت واخليه الها اقتله واقتل روحي وانهي كلشي

بالنهاية كلبي تعب مني ومنه ومنها

اجذب على نفسي اذا كلت هاي الافكار ماستوطنت عقلي بالعكس بديت حتى اخطط لهالشي نار الغيرة منها جانت تاكل بكلبي اكل لدرجة حسيت نفسي راح اتقيئ حاولت انام بس ماكدرت ومن غفيت لدقايق قليلة لكيتها تاخذه مني حتى باحلامي  مالي بيه فرصة

كعدت من النوم خاوية تماما خدي متوسد المخدة وعيوني تهمل دمع بسكوت فزيت بس سمعت صوته اجه نزلت من الجرباية بكل حيلي ناوية اطلع حركة كلبي بيه اخذت مكص من جرارتي وطلعت رايحة اله

ماعرف بوقتها شنو الاجه ببالي وليش هيج سويت حسيت نفسي لعبة واعضائي هية المتحكم بيه  .. عقلي تغيب تماما ودماغي جان خدران فعليا