عشق السلاطين {باللهجة العراقية}

البارت 32

*هّيَ رآحًتٌ بًسِ بًعٌدٍهّآ لَهّسِةّ بًيَــــهّ*
*لَسِةّآحًبًهّآوٌلَسِةّآتٌمًنِﮯتٌجّيَ وٌتٌغُفُﮯ*
*عٌلَﮯ آدٍيَهّ. بًسِ بًعٌدٍ مًآآکْدٍر آتٌقُبًلَهّـآ*
*يَمًيَ مًشُمًئزٍةّ آلَتٌفُتٌرکْ وٌتٌظُلَ قُوٌيةّ*
*آنِيَ آحًبً ذِيَجّ آلَبًريَئةّ آلَفُوٌضوٌيَــةّ*
*آلَبًآلَصّوٌر فُصّ عٌيَنِهّآ مًدٍمًعٌ عٌلَيَــــة*

کمال....
زعلت اني وحسناء والمدة طالت بالشهر لاهية ناوية ترجع عن قرارها ولا اني المقتنع وبيه صبر انتظر بعد العذر عندي مامقبول خصوصا احنا مخطوبين صارلنا بالسنتين فترة كافية عرفتها وعرفتني بيها واجذب على نفسي اذا اكول مااحبها ومتعلق بيها ورغبة قوية عندي نتزوج واسس وياها عائلة صغيرة .. بالبداية كطعت تواصلي بيها والتهيت بالشغل بعد ما حملني عماد المسؤولية بسبب وضعه الصحي وزاد عليها مشاكل وية عائلته انسحب هو بيها من التزاماته بصورة كاملة بادارة الشركات .. انطاني بيها خبر مسبق عن الوضع حتى اتصرف .. ورفضت هالمرة بشكل قاطع ادير املاكهم بدون وجود واحد بيهم على راس الشركة وادارتها .. بالنهاية اني موصاحب هاي الاملاك ولا من حقي اتعاقد واتصرف باي شي من دون رخصتهم ومسؤوليتهن جبيرة وضخمة على عاتقي حتى اتحملها من شافني مصمم عالرفض ماناقش بعد وكال اتصل بجدي انطيه المستجدات وكله لازم يحظر بدوام كامل لان عدنا اعمال متراكمة لازم نخلصها

سديته منه واتصلت بالسيد امجد منفذ وصية عماد بالحرف الواحد .. وجده مانطق باي كلام زيادة غير

يصير خير .. سديته منه منتظر جوابه وقلقت بنفس الوقت من حظوره للشركة وادارته بيها بالجديد.. بالذات احنا متكتمين هالفترة عالوضع حتى ماتنتشر اشاعات ماينسد عليها باب

استمريت بحضوري بالشركة والتزامي بيها لفترة عشرة ايام عماد معاند يحضر وجده ماكو خطوة بدرت منه .. ورة يومين اتصل بيه على الموبايل وطلب اجيه للقصر.. ولان مو بالعادة يطلب مني اجيه فرغت نفسي ورحتله..

توجهت للمكتب بتوجيه من احد الخدم ودخلت لكيته منتظرني بس معفوس عفس وملامحه محتقنة منفعل حسيته مشتاقله بس يكابر مايريد يبين

سلمت عليه وكعدت وهو صار يعاتبني على صاحبي
_ يعجبك السواه عماد ويرضيك .. اني ربيته وكبرته تاليها يتكبر علية الجاحد.. وعلى شنو والله على وحدة مانعرف من يا زبالة جابها.. من قلة بنات العوائل لو ضايعة عليه كريمات الحسب والنسب حتى يسوي بينا هيج من وراها

سكتت مدنك جان يغلي وعصاته يضرب بيها الكاع من عصبيته .. وضعي ماجان يسمح ادافع عن الطرفين واقاطعه خفت من ضغطه لايصعد واحتار بيه بقيت استمعله وهو يحجي ويشكي ساعة يهدد وساعة يعاتب ويلوم تربيته الغلط بعماد خليته يخلص ويطلع مابكلبه و كتله

_ سيد امجد حسب الفهمته منه انتم متدخلين بقرار اختياره للانسة سارة وحكمتوا عليها من مستوى معيشتها بدون ماتجربون تلتقون بيها وتعرفوها وبنفس الوقت انتم استحقرتوا اختياره الها وقللتوا من احترامه ..باوعلي منفعل يريد يحجي تلاحكته باشارة من ايدي