عشق السلاطين {باللهجة العراقية}

البارت 30

مامريت صدفة بالك اليوم *
* ما مر موقف ذكرك بيــــــه *
* ماتشتاقلي .. مايكعدك ليل*
* مافكرت مرةتشوفني شوية*
* معقولة نسيت ايامنا بســاع*
* معقولة المشاعر كلها جذبيه*

نظرة للمستقبل....
كعدت من النوم على صوت دكة الباب مثل التطبيل.. فزيت بتك عين وعين هذا ياحيوان هيج يدك الباب طلعت من الغرفة البس بالتشيرت عبرت الصالة للمطبخ وصحت

_جاي جاي يا حيوان ،، على هذا الدك شكيت بعزام لو ضيغم ماكو غيرهم رب الهتالة

بس وصلت يمه عرفته عزام مثل ماخمنت وكف دك وظحك راجع لورة لا الزمه وتلاحك روحه رافع اديه
_ بروح اعزازك لاتضرب وتضوج ههههه الله وكيلك دكيت الباب لمن طاحت ايدي وايست كلت خلي اسويلك طبلة وغنوة عالباب حتى دماغك يستشعر النغمة وتفز ادري بيك تحب الطرب

خزرته ودخلت رايح للمطبخ
_ ماتصيرلك جارة لا والله ... بعدين اني مونذرتك لاتحلفني باعزازي وكايلك الف مرة بطل هاي السالفة بس الظاهر انت ماتتوب لمن اصبغ جلدك بالحزام

اجه وراي يظحك ولا مهتم غسلت وجهي بالماي البارد حتى اصحصح وخليت الجاي عالنار وحميت التوست اريد اسلك بيض كعد عالكرسي كدامي كال
_ اييييه ابو الجود صاير نومك ثكيل وماتبقى مساهر مثل قبل باوعتله رافع حاجبي اشوفه لوين يريد يوصل غمزلي الظاهر الحب خبرة مخليتك تعض المخدة من القهر ههههه

عطت بيه
_ انجبببب ... ساقط
سكت ظام ظحكته كوة ورجعت اجهز بصينية الريوك
_ لاحب ولامسلته عبالكم اني فارغ مثلكم ابوكم مستلمني استلام اكشر اليكول ماشايف شغل مفجوع وتعال يجياد اتحمل المسوؤلية كاملة عباله البنكلاديشي مالته... اليوم كوة الا اخذت استراحة من الشغل

خليت الريوك عالميز بيني وبينه كال وهو يضوك المربى
_ اي ياابة قابل بلاش اشوو نص الشراكة انت والوالد بالنص كلشي بحسابه .... باوعتله واللكمة بحلكي كال يظحك

_ هااا كول ماكو هيج شي وطلع السالفة كلاوات

نزلت الخبزة من ايدي وكتله
_ولك منين تجيبون هاي الاخبار والسوالف ماتكلي
ظحك عطت بيه ضايج

_ وفوكاها تظحك ياتافه بس كلي هاي امك ماتصيرلها جارة يمته تكبر وتبطل تنبش وراي ...الله شاهد اذا وصلت لخشمي الا انبش صفحة اهلها نبش

_ هههه واني ماكتلك امي الكالت ... ليش اتهمتها هية
ورثت جكارة وكتله
_ وروح ابوي امك ماكو غيرها بس اني الها والكم سفلة معلمتكم عالسوالف التعبانة لاسوت براسكم خير تفيدون المجتمع ولا سوت براسها خير وعقلت

مد ايده للزيتون ياكل ويظحك الفطير عيني تراقبه هالمرة مابررلها ابد مبين هية ورة هاي السالفة وغيرها المشكلة مااكدر اثخن بالحجي اكثر من هيج رغم مرات ادوس وارجع لورة متذكر ولدها يحترموني معتبريني مو ابن عم الهم .. لا والله مقامي اشوفه بعيونهم مثل الاخ الجبير شكد ماادوس بالحجي مايزعلون وهالشي مخليني مربط
لازم اعصابي كوة عنها العار .. هاي من عدا رائد وصداقتي بيه من سنين لو شكد مااحجي عليها مايكول... صحيح ماظلمتها بكلمة بس مع كل هذا مانهرني بيوم لو تخاربنا من وراها ... بالعكس تعود يشكيلي اسلوبها وعجرفتها وتقصيرها وياه والمسكين متحمل مجبور من ورة ولده متعلقين بيها كلش وللامانة هاي الشغلةالوحيدة الي ماقصرت بيها لليوم اداري وتحنن عليهم بابسط الامور اليكول موزلم صاروا كانما تشوفهم بعدهم اطفال صغار