عشق السلاطين {باللهجة العراقية}

البارت 42

_ عشق _ السلاطين _ بارت 41
٠
٠
بقلمي _ ياسمين _
تعليقاتجن ارائجن تصويتاتجن ابداعاتجن اذواقجن
جمالجن لطافتجن بالقصة 🥰🥰🥰
___________________________

ارغب بأن اكون معك الآن
ان تموت المسافات بيننا
ان تاخذني الى حضنك حالا

ان أشعر بأنني بخير فقط
_____________________________

ليان....

اتذكر ذيج الليلة كلش زين .. بيها بجيت بجي مثل زخات المطر غسلت وجهي .. وجنت احس بحرارة تجوي كلبي من القهر .. ليش اني بهالضعف ولوين اريد اوصل بعد وارجع ابجي اكثر من الاول ..معزية نفسي متاملة يطلع هالانسان من كلبي الي حبه ..

شريط الأحداث وية جياد مارحمني وهو يضغط على دماغي جان يمشي بسرعة قوية،، راجعته مرة واثنين وعشرة مالكيت جواب شافي غير احساس اللوم وتانيب نفسي ليش تسرعت انطيه امل بعلاقة واني لسة مامتعافية من عماد وصدمة خطبته من حبيبته لسة ماتجاوزتها .. بربع ساعة دبلجت هذا الفلم وصحيت اني بحظنه كلشي منتهي.. نار تسعر بكلبي ماعرف شنو سببها

تاكدت منه غفى تماما وتسحبت من غرفته بهدوء حتى مااتعرض لاسئلة مستهجنة منه لتصرفي وماجنت مستعدة لجوابها ولا لضغوطه اذا صح التعبير

طلعت منه دموعي تنزل وحدها على نفسي احس روحي مشتتة احس روحي ضايعة واعترافه الي وتسرعه وياي بالعلاقة خلاني لاطايلة ارض ولا سما .. لحظات افكر اكول اني شمنتظرة من عماد هاي هية خطبها وانتهى .. خلي امشي حياتي وانساه ..وبثواني اتراجع من قرب جياد الي بهالسرعة اني مامستعدة افتح صفحة جديدة وية جياد او غيره .. اريد اتعافه بالاول وارتاح من الضغوط الاني بيها بس اعرفه ماراح يخليني ومثل مارضخت للعلاقة وياه وعقلي مشتت راح استمر وياه بضغوط اكبر

دخلت شقتي متوجهة للحمام غسلت بمي بارد منفعلة
دموعي خلصت وصفيت بحسبة تاخذني ولوم يرجعني.. طلعت من الحمام ارجف دخلت جربايتي متغطاية وسنوني تطك سن بسن

مانمت وكلما غفيت افز من خضة جسمي لا ارادية
بعدين لكيته مراسلني مارديت ناوية اغلس عنه فجاة حسيت نفسي حاقدة عليه مااطيقه .. بس صفنت لنفسي اني مو كد عقليته ابد اضطريت اتصل بيه مخترعة كذبة حتى يفك عني ماريد اشوفه بعد وكدر يتفطن لاحساسي بيه.. بس كبر عقله وياي من هالناحية،

للاربعة انتكست كلش جسمي اشتعل بيه وجع مو طبيعي والم وتشنج باعصابي حسيت نفسي قربت من فقدان الوعي وخفت لااموت هنا وحدي ومحد يدري بحالي لمن اعفن حالي حال اغلب الحالات التصير واسمعها باذني.. فجاة انكلب تفكيري للخوف لا افقد جياد وبعد مااشوفه وخاف صدك يسافر ويتركني وحدي هنا

واذا راح منو الي بعد هو الشخص الوحيد الي مد ايده يساعدني بظرف جنت بس الله يعلم بيه والشخص الوحيد الي التقيت بيه شخصيا راعاني باهتمامه بدون مقابل وعرض علية ارتباط سابق خطوة الروتين الاعتيادية الي متعودين عليها بحياتنا ونشوفها بمحيطنا الصداقة ثم الحب بعدها الاعتراف بالارتباط الي نسفهن جياد نسف