عشق السلاطين {باللهجة العراقية}

الفصل الثاني بـ25

عشق _ السلاطين _ الفصل الثاني بـ25
٠
٠
بقلمي _ ياسمين
٠
٠
هلا بالعار ودروبــــــة
هلا بالمطشرة عيوبـه
هلا بالذلته الدنيــــــا
ورجع رايدله محبوبة
٠
٠
ماهر...
حالتي بالفترة الفاتت يوصفها هذا الاقتباس -:
عندما لا تستطيع ان تقترب ولا ان تبتعد ولا تستطيع ان تنسى ولا تستطيع ان تتجاوز.. فاهلا بك فالمنتصف المميت الذي لا حول لك فيه ولا قوة.

بكد ماجنت اشوفها كدامي فتنة من الحسن.. اول فكرة اخذتها عنها جانت زفت مثل دماغي وخمنت مدام اصلها من حي فقير اذن شغلتها مو خالية..

نظراتي الها كبداية جانت اعجاب بفراسة نظرية لتفاصيل جمالها مو اكثر حبيت اجرب القرب منها واتمعن بيها وجه لوجه..ولان عادة عقلي المتلوث ببيئة هية الغالبة بين افراد المجتمع العايشين بوسطه جان مليان من قصص الخيانات بانواعها واشكالها توصل مرات للتفاوض.. قلة قليلة من الشخصيات المعروفة جان متحفظ بمبادئه لدرجة ينعدون عالاصابع عد .. اما الاغلبية متسترة بعباية التحفظ والمثالية خوفا على السلطة مواكثر ،

كل الحجيته بكووم والي اكتشفته بشخصية هالمخلوقة كووم ثاني.. بثاني لقاء بالمطعم حضرته متعمد اراقبها عن قرب وماسمعتلها صوت مخمن لحد هاللحظة هية متغطية بعباية التمثيل والتمسكن

لحد ماحضرت الحفلة الثانية وشفتها للمرة الثالثة لحظتها كلبي انضرب بنغزة قوية ايقنت منها اكو فعلا وجود لسهام الحب بالعالم اذا ضربت وتين الكلب تشله تماما .. الي خلاني احسده بذيج اللحظة عليها هو نفسه الشعور الي وصل لذهني اني مو معجب بيها اني حبيت هالمخلوقة فعلا.. واذا تسالني شنو احساسي وقتها اجاوبكم "احساس مزعج لحد الخنكة" انسانة متزوجة وماسسة حياتها وية شخصية معروف على سن ورمح بين الكل واهتمامه بيها بصورة بارزة بالحفل تنطي صورة عنه وعنها هية ارض محرمة ممنوع الاقتراب

بليلتها رجعت اني وتالا متدهورة افكاري كلها بسببها
ونفسها هاي الليلة صابني بيها مرض الارق وتبعتها ليالي من نوعها عيني رافضة تخضع وتستسلم لسلطان النوم وهية بين ثنايا افكاري

فكرة التمني والظفر بيها وصلتني لمشاهد خيالية من نسج عقلي شلون انولها واتمتع بحسنها وراها تغلغلت فكرة وحدة من بين كل افكاري بيها شيصير لو بس تنفصل عنه مجرد تنفصل عنه من الصبح اخذها حليلتي بدون نقاش، ابتسمت متمدد على جربايتي اتخيل ابعاد هاي الفكرة وخطوتها الها

اكيد لو تنفصل عنه يصير ارتباطها بية مضمون اكثر بدل نظراتي الها بالتختل عن الكل
وهنا اتوقف عقلي عن التفكير،،
"شلون تنفصل منه وباي ذريعة اخليها تتركه..؟؟

اول خطوة حبيت اجربها وياها هو نمطها من اي صنف بالضبط حتى من خلالها اعرف شلون ومنين ادخللها راسلتها من صفحة وهمية ماردت
خمنت انشغالها ببرنامج حياتها وماشافت المرسول الها انتظرت يوم ويومين ماكو صفنتني معقولة ماشافتها لو شنوو المشكلة بالضبط
الفضول وية تفكيري بيها المستمر اشتعل ماطفى حاب وراغب لحد الجنون افتهم تفاصيل حياتها شنو من شنو..مثلا شتاكل شتحب وين تخلص برنامجها اليومي شنو هواياتها شنو اكثر شي تكرهه واكثر شي تعشقه كل سؤال يخصها دار ببالي جان هدفي الجاي الها بدون ماخلي اي عوائق كدامي متصور الموضوع بكل بساطة