عشق السلاطين {باللهجة العراقية}

البارت 48

_ عشق _  السلاطين_ بارت 47
٠
٠
بقلمي _ ياسمين-
____________________________

اعلم باني لم اختارك من فراغ ولا تمنيتك عبثا ولم اختارك نهاية ولا بحثت بديلا عنك اخترتك عمرا لحياتي ♥♥ ولم يخيب ظني بـ اختياري لم
فـ انت الأمان لي"♥
____________________________

منسدحة على بطني عالجرباية ومتصلة بحسناء فيديو اراقبها شلون كاعدة تطبخ شكد حلو صارت ام بيت ومستقلة

_ ليش بلة تبتسمين..!!

_ ههههه شكلج حلو وانتي تطبخين لكمال افندي

صفت المعكرونة من الماي الحار وحجت
_ عوفي كمال وشكلي الحلو وكليلي شسويتي بجفصتج  من حددتي العرس

_ ماسويت شي تركتهم وزعلت لان زمخوا بيه

_ عفية بالسباعية.. فوك شينج كوات عينج

كعدت معترضة اسلوبها خايفة لاتصير ضدي
_ لعد يعجبج هية تحجي هيج وياي.. احس عيونها اكلته اكل الحقيرة.. وماخلت حجاية ماشمرتها عليه عووود هية مهتمة بيه وتراويه شوفني شلون اجيتك ركض عابتلها شكد صلفة.

_  وتكومين تحددين العرس خليتيهم يضربون اخماس باسداس

_ حسناء ياعرس ترة اني وياه متفقين نسويه عرس بسيط مانريد معازيم هواي وناس كومة لسة اتذكر العقد من سويناه خلصنا نص الوقت احنا نسلم، نجامل هذا ونرحب بذاك.. احسن شي يصير بيناتنا
ونخلص..

_ وعماد شكالج من صعد

_ ماحجى شي كلي الترديه يصير والعرس نفس الموعد مثل ماطلبت

_ امم.. وبس

_ اي وبس حتى اليوم كسر حجاية الطبيب وطلع للشركة عنده جم شغلة يخلصها.. جدو راد يعترض روحته للشركة.. حلفله بس يحس بتعب يرجع وكاله هاليومين بس وراها ارتاح من نسافر شهر العسل اني وياه ويسلمه الإدارة اله هو وكمال

_ زين شنو ترتيباتكم للعرس وشهر العسل..؟؟

سحبت ظفيرتي العب بيها وكتلها
_ الترتيبات شفق خانم متكفلتها اليوم من الصبح غبشت عالخدم ينظفون ويرتبون واتصلت بمنسقين مختصين يسوون الحديقة ويجهزوها..

وبالنسبة الي عماد كالي راح يوصي على فستان العرس واللوازم الباقية نادين راح يوصيها تجيبهن
شي على شي اشوفهم مسيطرين.. خاف تكولين اتورطت وورطتهم وياي

باوعتلي وهزت ايدها ماعاجبها
_ يعني بضميرج انت تشوفين نفسج ماغلطانة.. زين ماسالتي نفسج امتحاناتنا النهائية ماباقيلها غير شهر شلون راح ادبريها وانتي بشهر عسل يلة جاوبيني

_ اكلج هو اني اصلا مكتوب علية هالسنة اطلع دفرات اذا طلعت منها.. المهم نروح شهر عسل ولا يحضر افتتاحية ذيج

_ عوبة وانتي هذا كل الهامج .. ترة هسة انتي ماعندج التزامات وعماد ما مطالبج بشي من تصيرين زوجته فعليا ماراح يتركج براحتج وراح تشوفين طلباته واوامره طول ماهو يمج مايفك عنج