عشق السلاطين {باللهجة العراقية}

الفصل الثاني بـ14

عشق _ السلاطين _ الفصل الثاني بـ14
٠
٠
بقلمي _ ياسمين
٠
٠
اقتباس...
كلَُ يحارب في معركته الخاصه فلا تسالن احدا لما التعب ولا تعجبن من شخص انهار بلا سبب قد يخفي السبب من عينيك ويبقى الاثر واضحا في ادمعه ولا تلومن جبلا ان اهتز لعاصفه او رياحا غير مسارها الزمن فوراء كل ستارٍ ستار لا يدرك ما خلفه الا ساكنه ولا يعلم ما به احد.!!
٠
٠
عماد...
نزلت ايدي من خدها مكورها متحسف ضربها بنفس اللحظة والثانية استوعبت الجنيته عيني عليها اختضت برجفة لازمة خدها تشاهك وعيونها تباوعلي تهمل دمع مهضومة مني احتاريت شسوي لابيه اضمها لصدري لان غلطها ماينغفر ولا بيه اتحمل دمعتها النزلت مصدومة بيه.

تركتها ودخلت للحمام ماعندي طاقة اتحمل نظرات الخذلان منها الي..ضاعت مني اسباب النقاش وسقط حقي احتج عليها بغلطها.. سديت الباب انفاسي تلهب نار تطلع من صدري بوجع.. عيني صارت بالمرايه اسال روحي الصلفة شلون كدرت امد ايدي عليها.. شلون طاوعتني نفسي اسوي هيج بيها دنكت على جفي صفنت عليها مقهور من نفسي شديت اصابعي مكورها اكثر من مرة اريد امسح احساس ترافة خدها من ايدي بس ماكدرت .. يااحسافة .. ياحسافة عمري وصلت لهاي المرحلة اتجبر عليها بالقوة..

فتحت الصيدلية وسحبت شكو علاج بيه مسكن اخذت منهن حبوب .. صارن بيدي 6 تقريبا اجيت اشربهن حتى تهدئ ضربات كلبي ووجعه وباللحظة الاخيرة تراجعت ماكدرت اجازف خاف انتكس واسلم الروح وهية مهضومة مني

شمرت 4 بالحوض وشربت حبايتين كعدت منتظر مفعول المسكن يشتغل واطلع.. رجعت صفنت على جفي لوبيدي اكطعها ولا الراشدي الانطبع بخدها..

نعلت الشيطان وغطيت وجهي تعبان استغفرت الف مرة مدخن من روحي ومن امي ومن حجاية جياد ومن ضغوط الشركة ومن الدنيا كلها واخرها هية.. شايل همها لحد التعب.. القلق عليها وعلى احساس الامومة العدها متاجج بكلبها عجزت احتويه واطفي هذا الشعور لو لفترة ازرع بيها كلب جديد اطمئن على اساسها اني وياها بالخطوة الجاية بدل مااتركها بنص الطريق ضايعة

كمت غسلت عالسريع وطلعت ادورها بعيوني ماشفتها بالغرفة واضح طالعة بدلت ونزلت اشوفها وين، لمحتها واني انزل الدرج كاعدة وية خديجة بالمطبخ متوسدة صدرها تشاهك تكلها

_ والله وروح ماما مااحجي وياه بعد ابد
وخديجة تحجي وياها همس احتمال تقنع بيها

لمحتني خديجة واني نازل رادت تكوم اشرتلها تبقى مكانها وياها ودخلت للمكتب، خلصت جم شغلة لحد ما اجتني خديجة بلغتني العشى جاهز سالتها عنها كالتلي صعدت نامت منعسة

_ ماشي.. اعزليه العشى مااشتهي

_ وليدي عندك علاج ضروري وشكلك تعبان لاتنسى روحك وتبقى تطحن بنفسك اتعشى حتى لو لكمتين
واشرب علاجك حتى ماتنتكس

بدون مااباوعلها كتلها
_ سارة اتعشت..؟؟

_ اييه جبرتها تاكل لفة صغيرة وصعدت لاتشيل همها اني بالي عليها بس انت انتبه لنفسك