_ عشق _ السلاطين_بارت 55
٠
٠
بقلمي _ ياسمين
__________________________
باجر من ترد وتخونك احلامــــــك
ترد تفرش ندم وافرشلك سهامـــك
واتعبك بالعتب كد مابروحي عتاب
كد ماخيبتني لخاطــــــــر امالــــك
___________________________
فتحت باب السيارة ودفعتها تدخل بيها احس الشياطين تكمز فوك راسي ضاغط على اعصابي كوة لمن اوصل واحاسبها على دكتها رجعت تاكدت ريم ركبت سيارتها وتبعتها الحمايات للقصر الا ركبت تحركت السيارة نترت بالسايق
_ للقصر بسرعة..
انزوت عني يم الجام اسمع صوت صدرها اعلى من بجيها
عصرت راسي دايخ من الصداع صارلي يومين مانايم بسببها كلما افكر احاسبها الكى روحي غصب تحاسب نفسي قبل لا انوي احاسبها خاف مقصر وياها بشي لو زارع بدماغها فكرة غلط عني خلتها هيج تظم عني من الخوف، بس من اعيد حساباتي عالخلل البيه الكى نفسي
"محتوي ومدلل ومحنن ومداري"
ليش اذن ظمت عني اذا اني مابيه خلل اذن الخلل بيها هية زين شلون احاسبها وباي طريقة اريد اعرف
صوت شهكاتها علت تضرب وية صوت خرخشة صدرها سمعت صوتها تريد تحجي
انداريت عليها خزرتها ماتنطق بحرف كتمت صوتها باصابعها لاتطلع الشهكة منها درت وجهي عنها اذا ابقى اباوعلها اخاف تبرد اعصابي من ناحيتها وتضيع علية الحسبة
سمعتها كحت وصوت الكحة بيه بحة قوية تطلع من صدرها.. غمضت عيني ضاغط على اعصابي من جمر متحكم بالقلق ماياثر علية ، بس مادام بلشت تكح وتطلع بخنكة يعني جايتها نوبة جايتها،
بس وصلنا كدام البوابة زمخت بيها تنزل.. نزلت كدامي دخلت صاعدة للغرفة انداريت لورة شفت سيارة ريم هم دخلت خليتها وراي تدخل جايها الدور هية الثانية تركتها تركن سيارتها وتبعت سارة لفوك
احجي وية روحي كلبي يكلي مابيها عالضرب بس خوفها ماتتحمل هية بلا شي راح تحجي كلشي من الخوف
وعقلي يكلي ادبها واثنينهم جذابين يرجفون لدموعها بس دخلت ركعت الباب هية نزت تعصر اصابعها خايفة وعيونها مطعونة مثلها مثل وجناتها نزعت سترتي وشمرتها دفرت كرسي كدامي شمرته برجلي وصحت بيها
_ منو هذا الجنتي كاعدة وياه
نظراتها تبعت الكرسي بدموع ورجفة حجت
_ ما.. ماعرفه
ابتسمت اغلي رجعنا للجذب والانكار.. مابيها مجال لطولة بالي بعد انهاريت بعد صبر يومين سلبت راحتي بيها من القلق والسهر لايكون ورطت نفسها بشغلة اكبر من عقلها، كسرت كلشي يجي بيدي من القهر ولساني يصرخ عليها يعاتبها
_ليش تنكرين ليش..!! وشنو الجابرج تروحين تلتقين بيه فهميني حتى ارتاح
رجعت سالتها اجر النفس كوة من القهر
_ وين شافج وكام هيج يهدد بيج
أنت تقرأ
عشق السلاطين {باللهجة العراقية}
ChickLitهمسلها قريب شحمة اذنها _ احبج وصرت مهووس بكل تفصيلة بيج وتخصج كلماته دخلها بموجة اجتاحت جسمها من النشوة بدايتها من قشعريرة كزبر بيه جسمها استهدفت دماغها ووصل لاخمص رجليها اتشنجت وارتخت على همساته وراها رجع يستقر عد كلبها وبدات طبوله تعلن ضجيجها حتى...
