عشق _ السلاطين _الفصل الثاني بـ15
٠
٠
بقلمي _ ياسمين
البارت مثل ما وعدتكم دمج بارتين تعويض عن الموعد الفات تصويت +تعليق عالفقرات
حصيلة تعبي وصداع راسي من السهر😭😭
٠
٠
وصف لحالتي مع عديل الروح
استريح تحت ظلال قلبك مثلما يسرع المرء بخطاه في ظهيرة حارة ليتسريح تحت ظل شجرة مثل هذا الملاذ... مثل هذه الكفاية
٠
٠
ارى وجودك في تفاصيل حياتي اشبه ما يكون كالامل الجديد في حياة شخص يائس وبائس
٠
٠
عمر احساس الوحدة ماجان وليد لحظة اكثر من لجة جانت بالصميم ملازمتني من الطفولة رغم الجزء الي ملت حسناء منه شي جبير بس جانت اكو امنية محفورة بداخلي يصير عندي اخت او اخ العب وياه وجنت اتذكر بطفولتي من تخليني ماما عد خالة نرجس وتروح للمشغل شفت ثاني اشوف بناتها وولدها يروشون بالبيت روش هذا يتعارك وية اخته عالدفتر والثاني يصعد الكرويتة ويكمز عليها لو اختهم الجبيرة تكعد هذا وتكرص ذاك حتى يتادبون ويبطلون شعوذة...
واخرهم نوسة الصغيرة اخر العنقود بيهم من جانت تزحف مهددة صفو جوهم الدراسي بس يشوفوها جاية ناحيتهم بضحكتها يكومون يطفرون اليشيل اقلامه والي يتلاحك دفترة لاتملخه اله والي يطلع صوته يستنجد بامه تشيلها عنهم..كلشي جنت اشوفه كدامي عنهم تسجله عيوني وذاكرتي وابقى اسال نفسي ليش حياتي اني وماما مو مثلهم حلوة.. من ارجع للبيت وياها اسالها مرة ومرتين من مااحصل منها جواب شافي لغايتي اكوم ابجي اريد مثلهم اخوة يترسون البيت شنوو اني باقية وحدي اصفن
بالبيت.. مرات تكعد تحجي وياي تقنعني حتى اسكت لو تشتريلي لعابة التهي بيها فترة وراها ارجع لنفس السؤال اريد مثلهم أخوة يعيشون ويانا بالبيت
وماجنت احصل منها جواب يشفي كلبي تضطر مرات
تجذب علية تكلي احصل من السوك واجيبلج واحد وجنت مصدكة اكو فعلا بالسوك وتجيبلي واحد منهم
بوقتها كل عمري 7 سنين او 8 ومشت الايام بينا لمن صرت افتهم وعرفت ماكو جهال ينباعون بالسوك بوقتها صداقتي بحسناء غطت على صدمتي فما لحيت على ماما بعد لان تواصلي وية حسناء جان حتى عالارضي مستمر مرات ندرس اني وياها عليه وحدة تشرح للثانية لمن نكتفي وعلى هذا الروتين لسنين تناسيت هذا الحلم تماما
ورجع تاجج من حبلت حسناء بابنها وجنت احيك اله ملابس لولادته وبكل غرزة حب اغرزها جانت تهمل وياها كومة امنيات يصير عندي مثلها.. اولاد وبنات
املي البيت بيهم
حياتي وية عماد جنت اشوفها متواترة بالهدوء والمشاكل النادرة الي يحتويها بدل عني وعنه.. لمن صدمني هو رافض فكرة نسوي جهال هالفترة واول الاسباب مرض كلبه مايعرف وين نهايته وخوفه عليه ماتحمل استطبابات الحمل والولادة شكد حاولت وياه وقنعته بس جان قافل لمن انتكس وشفت شبح الموت يحوم عليه.. بلحظتها حلفت مااضوجه ولا اجيب سيرة ابد
وفعلا ماجبت بعد سيرة للموضوع بقيت املي هاي المشاعر بداخلي بابن حسناء الي تركته وراحت بكلب بارد بدون مايرف جفن عليه..
أنت تقرأ
عشق السلاطين {باللهجة العراقية}
ChickLitهمسلها قريب شحمة اذنها _ احبج وصرت مهووس بكل تفصيلة بيج وتخصج كلماته دخلها بموجة اجتاحت جسمها من النشوة بدايتها من قشعريرة كزبر بيه جسمها استهدفت دماغها ووصل لاخمص رجليها اتشنجت وارتخت على همساته وراها رجع يستقر عد كلبها وبدات طبوله تعلن ضجيجها حتى...
