عشق السلاطين {باللهجة العراقية}

الفصل الثاني بـ 36

عشق _ السلاطين _ الفصل الثاني بـ36
بقلمي _ ياسمين _ عمري انتم لتنسون تصويت +تعليق عالفقرات + ومتابعة لحسابي وحساب الانستا والتيك توك موجودات عالبايو
٠
٠
عماد...اقتباس
هجرت حبيبتي السابعة لانها لا تهتم لتفاصيلي ولا تلاحظها حتى،
والسادسه لانها تذكرت كتابنا المفضل وشاعرك الذي اغار من كلماته،
والخامسه لانها تذكرني بطريقه كلامك لكنها لا تملك دفئ كلماتك بقلبي،
وتركت الرابعه تبكي في منتصف الشارع لانها احبت لونك المفضل،
والثالثه قد اعجبتها رسمتك بطريقه سطحيه ولم تعرف من رسمها وما نوعها حتى،
والثانيه كانت تشبه ذوقي في الموسيقى وصوتها لا باس به لكنها لم تعرفني على اغاني جديده تشبه روحك ولم تمتزج اغانينا بطريقه ذاتها، وحين تعبت مني اخبرتني كلماتها السطحيه بالشفاء العاجل شعرت انني اريدك لتخبريني ما اشعر به من مرض نفسه في جسدك ومدى ضيقك من نفس كلمات الناس حولها فتخف الامي،
اما الاولى هي انت من افسدتني وجعلتني لا اعرف كيف احب من بعدك،،

ليان...
جنت كاعدة بصف جياد نتابع فلم وية الكل ماخذة راحتي البنات نامن ساحبة نفس من دوختهن..فجاة لمحته وكف متكهرب ايده براسه صافن عالموبايل وراها كامت روحه تلوب تركت الفلم وركزت على حالته بسرعة كامت عمتي يمه
صفنت بوجهه تحاول تشوفه شبيه..ماسمعت الدار بينهم لان جانت تهمسله همس باوعت بعيونه مطعونة كلش وسمعت كلمة زواج طلعت منه مافهمت مغزاها شنو..؟؟
وصل صوتها لمسامعي بوضوح بعد ما لزمت ذراعه تتاكد منه
_ تحجي صدك لو تتشاقة... ابني شجاك تحس بشي لو دتتشاقة انته.... شنو زواج مافهمت كلامك

رجع كعد مكانه سحب جكارة باصابعه يرجف ورثها وحجى مخنوك
_ اني راح اتزوج..!!
شهكت مدمعة رغم كلمته شوشت على اذني وخلت المكان كله هدوء بس جانت واضحة.. جياد طفى الشاشة وكعد مثلي مستغرب اليسمعه وعمو فؤاد دنك للارض شابك اصابعه ببعض بانزعاج
وعمتي رجعت كعدت بصفه تتاكد من كلامه للمرة الثالثة عالتوالي
_يعني شنوو تتزوج..؟؟ قصدي ليش تتزوج مافهمت؟ وشبيها مرتك حتى تنفصل عنها المسكينة

هز رجله وتوتره جان يدل حتى هو مامستوعب الوضع كاللها وهو يسحب نفس من الجكارة
_ ومنو كالج انفصل عنها... سارة تبقى زوجتي حتى لو اتزوج غيرها ماراح يتغير شي وياها
ضحكت باستهزاء وكلتله مصدومة
_ وهاي وين صايرة باي قانون يسمحلك تتزوج الثانية وعندك ارتباط بالاولى
كللها بنفس النبرة الجافة المهزوزة
_ تدبر ماكو شي ماله حل
طلعت من صدمتها ووكفت مزنبرة منه تغلي لاول مرة دفاعا مستميت لسارة
_ انت تخبلللت لوووو تخبللللت شنووو تتزوج عليهااا ولييييش تتزوج من الاساس،

سكت محتقن بجيت مامتحملة كتله اترجاه
_ الله يخليك لتسويها.. والله سارة تموت ماتتحمل
باوعلي مقهور عض شفته متالم يهز رجله وعيونه امتلت دموع وكف بسرعة يلوب منطينا ظهره رافع راسه للسكف يمنع نفسه ماينهار كاله جياد يقنعه
_ عماد... انت مو بوعيك هسة، وقرارك هذا وية حالتك ووضعك المكركب اكيد مامستقر اترجاك اترك الفكرة كلها لان اذا سويتها نتحمل خطية سارة حالنا حالك الله يخليك لتسويها