عشق السلاطين {باللهجة العراقية}

الفصل الثاني بـ3

_ عشق _ السلاطين _ الفصل الثاني بـ3
٠
٠
بقلمي _ ياسمين

__________________________

اعلم ان الحديث الذي يخرج عن نطاق الروح هو نوبة بكاء على هيئة حكاية مغلقة...!
__________________________

عماد...
ماعرف شلون نزلت لجوة ولا حتى شلون وصلت المستشفى خايف من فكرة وحدة ليكون صار عليها شي وراحت من ايدي.. طول الطريق عقلي مرعوب من جملة مسيطرة على عقلي بالكامل وبالشهور الاخيرة خلتني امر بهواجس عليها

( وما انت إلا نتيجة أفكارك، افكارك اليوم هي ما ستصبح عليه غدا) حكمة من سطر واحد ترسملك خارطة طريقك للمستقبل توضحلك ابعاد حياتك بمطباتها وتعاريجها اذا بقيت اسير الها

خوف الفقد الي اعاني منه لسنين خايف للمتعلقة روحي بيهم لايضرهم شي رجع تاجج بوفاة جدي ماصفالي منهم غير بس هية، حزني عليه جان دمرني دمار بس حافظت عالاكدر عليه لعيونها لا هية عدها غيري ولا اني

بالفترة الاخيرة انزرعت بدماغي افكار هواي وكلها تاخذني لزاوية واحدة لا تترك ايدي وتفاركني مثلها مثلهم، بسبب القلق عليها خلتني طايش وياها بالفترة الاخيرة متامل الكى حل لادماني بيها. ومالكيت شسوي بعد حتى احفظها من الاقدار التايهة،فكرت احبسها بالبيت ماخليها تطلع الا اامن عليها وارتاح.. زين اذا حبستها ماتموت شيجبر العصفور يتحمل السجن غير يتامل بيوم سجانه يطلق سراحه ،

ما متخيل بيوم من الايام ان القدر الخايف منه ياخذها مني راح ينطيني اقوى درس بحياتي تجبرني اطبق هاي الطريقة وياها وبحذافيرها بابشع صورة ممكن يشيلها العقل، تصير نفسها النظرات المتولعة بيها نار وجحيم تحركها، او الايد الي تحننت عليها ودللتها تصير نفسها سوط يلسع جلدها الترف ترسم خطوط كبرها بيدها بدون ماتنوله

وصلت للرسيبشن عندي معلومات اولية عنها من السايق ما بيها شي مجرد سمعت هاي الكلمة منه مااهتميت للباقي المهم هيه بخير
كدرت بلسان يابس مختض عليها اسال عنها باي قسم كالتلي بردهة الكسور الطابق الثاني

استبشرت متحرك رجلية ماحس بيهن من امشي لمحت واحد يركض بصفي يهدي بيه انداريتله لكيته مهيمن

_ شجابك مهيمن

جاوبني يلهث يسرع بخطواته يلحك خطواتي
_ استادي جنت جوة ناوي اصعدلك التقي بيك ولمحتك نازل مختض سالتك ماجاوبتني حسيتك موطبيعي ومن اخذت السويج من حمايتك متكهرب عرفتك مو بوعيك خفت عليك واجيت وياك

باوعتله مسطور معقولة صعد وياي وماحسيت بيه
دخلت الممر الخاص بالكسور قريت ارقام الغرف واني امشي سريع قريب نهاية الممر لمحت هوسة يم باب غرفة من الغرفة
ماهتميت كد ما ادور الرقم عبرت الغرفة الاطباء والممرضين واكفين ازدحام عليها