لابو اليحبك بعد .... لابو اليشم الهوى
وخل موسمك ينتهي ...وخل تكطع طيوفك
مو ما اهتملك بعد ... لا والله ما اشوفك
عماد....
جنت واكف بالبلكونة مالت غرفتي منتجي عالسياج اباوع للعمال والبستاني ابو ضرار يرتبون بالحديقة ويعدلون عليها لحفلة الليلة والوالدة وجدي كاعدين مسافة عنهم يراقبون الشغل بصورة أقرب بيدي فنجان كهوة اشربه وراي كومة شغل وتدقيق على اوراق مشروع كدامي وتلحيظات صغيرة على كلمة الليلة لازم اتاكد منه بعد اكثر .. احتمال اضيفله بعد اضافات اذا شفته يريد
خلصت فنجاني ورجعت كعدت على كرسيي وسحبت الاوراق اريد ابلش بيهن نص ساعة وسمعت دك باب غرفتي بقيت على نفس تركيزي بالورق البين ايدي الى ان تفاجئت بالوالدة كدام عيني ماتحملت ابتسمت واشرتلها تتفضل تكعد كبالي
دنكت عالورقة اعدل عليها بالقلم وكتلها
_ اليوم مشرفتني بالغرفة شفق خانم .. مو بالعادة الكاج ضيفة عندي هنا اكيد جيتج الها سبب قوي
كعدت كدامي رصت رجليها على بعض بطريقة منمقة وكالت
_ اي والله عندي سبب قوي واحتمال اسباب حابة استفسر منك عليهن
_ خيرج
_ ماكو والله بس سمعت هسة من جدك علساس الوساطة الداخلين بينكم صلح انت وابو مقداد وابو بشير ماتبشر بخير كلت استفسر منك عن السالفة ... جدك قلق عليك منهم وحتى واصله تهديد عليك كايليله مانخليه بحاله خلي ينتبه على نفسه زين
سحبت الفنجان اشرب منه وباوعتلها مركز على ردة فعلها
_ وجيتج الي بدواعي شنوو مافهمت
فضول لو قلق لو استفسار عابر ..!!!
هزت جتفها وكالت
_اعتبرني اجيت عليهن كلهن بيها شي لو عندك اشكال بهالشي ..؟؟
رفعتلها حاجبي مستغرب
_ بالعكس ماعندي اشكال لو جان هذا اسلوبج بالحوار والاهتمام من زمان.. بس هسة لا اعتبره من جانبج موقف غريب ما متعود عليج .. والادري بيه جدي مايظم عنج شي صح لو اني غلطان
دارت وجهها عني لجهة البلكونة تباوع لبعيد حسيتها ماراغبة تجاوب رجعت ادقق بالورقة لمن كالت
_ تدري لو ابوك بعده عايش وشاف الي انت وصلتله هسة مستحيل مايباوعلك بنظرة الفخر واني مثلي مثل جدك وابوك بس الفرق اني ماعرف اعبر مثلهم ولا ابين مشاعري لاحد ورفعت جتفها محتارة بصيغة التعبير بالكلام
اني عشت طفولة تختلف عنكم ماجان عدنا ابو وام يحننون على اطفالهم امي حايرة شتطبخ وتنظف لابوي وابوي حاير بروحه ونفسه وخلصت طفولتنا ومراهقتنا على هالنمط .. اسلوبي وياك الي تشوفه جاف هو اساس شخصية تكونت بيه غصبا عني وكومة شغلات وامور صعبة شفتها وعشت بيها مستحيل اتجاوزها لان مزروعة بعقلي من الصغر وهذا جان حصيلة زواجي الفاشل من ابوك وعلاقتي بيك انت عالخصوص
أنت تقرأ
عشق السلاطين {باللهجة العراقية}
ChickLitهمسلها قريب شحمة اذنها _ احبج وصرت مهووس بكل تفصيلة بيج وتخصج كلماته دخلها بموجة اجتاحت جسمها من النشوة بدايتها من قشعريرة كزبر بيه جسمها استهدفت دماغها ووصل لاخمص رجليها اتشنجت وارتخت على همساته وراها رجع يستقر عد كلبها وبدات طبوله تعلن ضجيجها حتى...
