عشق السلاطين {باللهجة العراقية}

الفصل الثاني بـ20

عشق السلاطين _ الفصل الثاني بـ20
٠
٠
بقلمي ياسمين
تصويت + تعليق عالفقرات + متابعة لحسابي🌹

اقتباس...
اعلمي يا صغيرتي ان الواقع مؤلم والخيال اتعس وما بين الخيال والواقع شتان ما بين قصص العشاق وقصة عشقي لك اعلمي صغيرتي انني ساغير مفهوم الزواج في مجتمعاتنا وساجعلك سلطانه على عشق المماليك كلها ولا اقصد بذلك العشق المفهوم المادي او الثراء الملكي ابدا... صدقيني ان مفهوم ملوكيه العشق عندي ان اكون لك ابا واما واخا واختا، ان اكون لك صديقا قبل ان اكون لك زوجاً ان اقف معك ولا اجعلك تنطفئين في لحظه ما لطالما كنت منيره باوقاتا كثيره، ان اسمعك وانصت لك حين يرفض الجميع الاستماع اليك ان اكون قواما عليك تكليفا ومسؤوليه وليس تشريفا باني افضل منك كما يعتقد البعض ان احزن عندما تحزنين وافرح عندما تكوني سعيده ساغنيك عنهم جميعا..
٠
٠
ولا اريد مقابلا سوى قلبك ❤
٠
٠
سارة....
خلال فترة حملي كلها استلمتني نانا بنظام اكل هية وعماد اتخطيت بيها الخمس وجبات يوميا علمود نسبة الدم والحديد ماتنزل من عدا انواع العصاير واشكااله ومن ظمنها مخلوط سلطة الفواكه بالعسل اول شهور ادمنتها وجنت اكل منها بكثرة بس بشهر السادس كرهتها كلش حسيت نفسي تشبعت منها خلالهاا وزني صعد بصورة ملحوظة وحركة الطفل جانت تقوة اكثر واكثر وجانت هاللحظات عندي احلى شي ينتعش عليها كلبي

بوقتها والدته لعماد شفق خانم وزوجها جانوا يزورونا بين فترة وفترة هية وعمو فؤاد سبحان الله شكد انسان ملامحه محبوبة ويرتاحله الكلب بسرعة، اعترف ان زواجه منها ايجابي بصورة كارثية خلاها اليوم شفق خانم ثانية بحلة جديدة من الاسلوب والتعامل عالذوق بالكلام وياي بعد ماجانت تكعدني ببسمار وتكومني ببسمار رافضة تتقبلني بينهم.. صارت انسانة ثانية متعاطفة وياي لابعد حد واكثر احتياجات الحمل ولوازمه هية تكفلت بيهن من بابه لمحرابه ماخلت عماد يشيل هم من هاي الناحية

ايقنت بذيج اللحظة ان لكل انسان بهاي الارض عديل روح اذا كان القدر يحبهم يجمعهم سوية لحتى تتآلف ارواحهم وتسكن مثل ماهسة اشوف روح شفق خانم سكنت واطمئنت بوجوده لجانبها

عمو فؤاد جان بحث ثاني من الحنية الي يغلفني بيها بنظراته يحاول بكل مرة يشوفني تعبانة او مالي خلك يهون علية بكلامه وقصص حافظهن عالغيب عن الصبر والارادة يلهم نفسيتي بيهن واتشجع بيهن للايام الصعبة الجاية.. وجان بنفس الوقت يهون على عماد قلقه عليه رغم اني اشوفه متماسك كدامي ويهون عليه بصلابة بس جان الكل بدون استثناء يهونون عليه اكثر مني حسسوني هو الحامل مو اني

لحد ما خلصت الشهور كلها ودخلت شهر التاسع بلشت وياي الآم متفاوتة اكو تمر علية خفيفة ومرات قوية اكوم بيها اخاف لا اجت ساعة ولادتي وما اتحمل الوجع واموت ساعتها ..

كثرة الهواجس بهذا الموضوع شل تفكيري كلش مرات صدري يكبس عليه من ورة عقلي وسوالفه..
قبلها عماد جابلي حزمة كتب للتوعية وتعلم خطوات الطلق اذا اجت ساعة ولادة.. ورفضت اقراهن رفض قاطع اني منا روحي طالعة من الخوف ودور اخذ نظرة مستقبلية للراح يصير بيه يعني اموت خوف بمكاني كتله ما افتح ولا كتاب مالي خلك تريد انت اقرا مكاني