عشق السلاطين {باللهجة العراقية}

البارت 39 الجزء الاول

_ عشق _ السلاطين _بارت 38
بقلمي-ياسمين- علقن وصوتن لاتنسن عمري
~~~~~~~~~~~~~~~~~~~~

اني أحبك ...   لكن
اخاف التورط فيك
اخاف التوحد فيك
اخاف التقمص فيك
_________________________

عماد...
من نبرة كلامه عرفت السالفة تخصها باوعتلها عيونها مليانة دموع وخوف اخذت منه الموبايل وكعدت كبالهم على تخم فردي خليت رجل على رجل فتحت الصور كلها فبركة واضحة وضوح الشمس رفعت عيني اشرتلها تجي وطبطبت على ذراع التخم بصفي

_ تعالي حبيبي شوفي صورج حلوات راح يعجبنج مثلي

كلهم استغربوا كلامي حتى هية رجعت كررت كلامي اجت يمي كعدت

_ شنو رايج بيهن نسحبهن عجبني بذات هاي الي تظحكين بيها وياه

طفر جدي يغلي
_ تستهزى حضرت جنابك . لو عاجبك وضعها واكفة وياه تظحك وموكعة الميانة بينها وبينه

باوعتله وعيني على حركات ريم وامي

_ لاماستهزي.. الصور فعلا عجبني ولو فبركة بس عجبني ... مسحت على ظهرها اهديها عن البجي وتبطل بس جانت محتقنة كاتمة نفسها كوة عليها ووجهها انصبغ احمر

_ يعني عاجبك تصرفات خطيبتك ماعدها حدود وية البستاني وكل شوية رايحة واكفة يمه

رادت هية تبررله قاطعتها بسرعة

_ حبيبي روحي لغرفتي انتظريني شوية والحكج ماطول
هزت راسها بست جف ايدها وراحت عيني عليها بس اختفت بالمصعد نزلت رجلي وكتله ..

البهارات الضايفتهن الك الوالدة مو شوية مكثرة منها
لو انت شتكول..؟؟

كالت منفعلة
_شنو قصدك بهذا الكلام ... عيب هالحجي عماد اني حجيت الشفته وبس خطيبتك حذرتها جم مرة تبطل توكف قريب منه وماسمعت لا وصارت بينهم سالفة وظحكة وهدايا .. حسيت الوضع طلع عن حده ومن شفتها مااخذت بكلامي اضطريت احجي وية عمي يتدخل والصور مابيهن فبركة كلهن اصوليات

_ الشفتيه تاليف من دماغج الها يهيني قبل لايهينها سارة صارت مني وبيه ماقبل كائن من يكون يمسها بوردة فما بالكم بالتاليف عنها..

حجى جدي متضايق
_ خطيبتك ماعدها حدود وية الناس ولا مخلية ببالها هالشي تنبهها صارت فرد مهم بالعائلة محسوب عليها اي تصرف او كلام .. تنتبه لتصرفاتها لان العيون هالفترة عليها وعليك لان اختاريتها شريكة لحياتك

وكفت وبالي يم سارة

_ انبهها على اي اساس مثلا .. سارة ماسوت شي غلط واذا بدر منها شي اني احاسبها مو غيري .. جدي هالمرة صارت وعبرتها مرة الثانية مااقبل كلام يمسها والكل كاعد،، عندك شي او ملاحظة نكعد بيني وبينك تحجيلي شرط ماكو طرف ثالث ويانا

كالت تغلي مني
_ وعلى شنو توصيه .. انــي بعد مااتدخل بيها لخطيبتك لو اشوفها بعلاقة وياه هم مااحجي وانبههك ... واليصيرلك تستاهله مقدما