عشق السلاطين {باللهجة العراقية}

البارت 45

_ عشق _ السلاطين_ بارت 44
٠
٠
بقلمي _ ياسمين _
__________________________

الشعر يشرح حال جياد وية ليان بهذا البارت

' شعجب حنيتلي موغيري عندك
  صدك مشتاقلي لو صرت وحدك
   راجع ليش مو حبيت الفراك
   نسيت اخر ايام شثكل ردك
________________________

واكفة يم شباج مكتبها اصابعها تلاعب مدالية رجالية محاوطة ركبتها ومتربعة صدرها لكتها بعد ايام بملابسه المتروكة بشقتها تركلها بقايا ذكريات اليمة واحاسيس جديدة على كلبها تستقبلها بحفاوة.. رغم كلشي رحبت بهذا الشعور وهي تفتحله بصيص امل تستانس بيه روحها بوحدتها وبين خطوط كتاب صغير لمذكراتها تعبر بيه عن دواخلها بيه..

عينها على الشارع وحركة الناس البرة بحركة البؤبؤ الرتيب تبين هية مركزة عالمنظر التشوفه بس اليتقرب منها يلكى عيونها تايهة وبالها ضايع ماله مهبط الاجواء باردة ممطرة كئيبة الطقس اله بالشهر على هالحال مايقبل يشمس

دخل عليها سيمور بيده الاضبارات راد يحجي وسكت من شافها على وضعها نفسه ماتغيرت تقرب منها نظراته مركزة بيها ومثل ماتوقع مسافرة لغير عالم  وملكوت  .. قاطع صفناتها بقلة حيلة يعرفها ماتنتبهله ولا راح دير بال

_ ليان ترة كملت شغلي تدققين الاضبارات حتى نرسل الملخصات للسيد عماد لو تاجلين مهمتج لباجر

بدون ماتلتفتله جاوبته
_ خليهن باجر اشوفهن  ..

_ بكيفج بس التاخير مو من صالحج ترة علية  نبهتج
وانتي بكيفج

سالته بنفس البرود واللامبالاة
_ تدري اليوم راح يكمل الست أشهر..

_ مافهمت..!!  اي ست اشهر

_ ست اشهر هو مختفي بيها مابين.. ولا حاول يدزلي مسج لو حرف يتطمن علية مثل مامتعودة منه

_ اممم.. وتلمس خشمه المشدود بشاش ولاصق ترميم لشكله كاللها متنرفز من طاريه
والله خشمي لسة يوجعني من ضربته النذل اجاني غفل كسره بضربه وحدة خلاني شهور حاير بشكله

باوعتله معترضة تجاوزه عليه
_ تستاهلها والله.. شلون تضربه انت وباي حق تتجاوز عليه

_ اي والله صدك استاهلها ويطبني مرض همين  .. عود ردت اسويلج معروف واخلصج منه  .. تالي طلع الصوج صوجي  .. والمعجبني مامخلي بيج عضم صاحي ودافعتيله ولسة تدافعيله  بختتتت عمي بختتت هية كوة

خلى الاضبارات عالمكتب كلتله وهي تسحب نفس عميق وزفرته متضايقة

_ صدكني مو مسالة بخت بكد ماهو يطلبني دين استرجعه بطريقة هو يشوفها مناسبة. وازيدك من الشعر بيت  جنت استحق هالشي الندم ماكلني على فعلتي اكل اكول شنو الصار لو مامتسرعة
تدري جان هاي ايامي الاخيرة لحملي واجيب ابني لو بنتي للدنيا... جان صار الطفل انيس الية ببيت موحشة حيطانه من ادخله احسه يريد ياكلني اكل  ..