🦋جعلوني زوجة له 🦋 (مكتملة )

part5

💎جعلوني زوجة له💎
جزء 5
#عند_رقية
خرجات رقية من دارها لابسة جلابة فلكرونة ودايرة زيف حياتي فوق راسها وقفات قدام دار منير دقات وهي تخرج مو لكان سميتها رشيدة
رشيدة:رقية صبااح الخير
رقية:صباح الخير صباح الخير كااين ولدك
رشيدة:كااين نااعس علاش باغاه
رقية:من طبيعة الحال هيكون ناعس على هو عندو شي حاجة يديرها من غير نعاس
رشيدة:شفتك جاية وعينيك خاارجين مالنا مانخافوش اشش وااقع
رقية:شووفي اشش غادي نقووليك قوولي لولدك لبيطالي يبعد من بنتي
رشيدة:بنتك لخاصها تبعد على ولدي واصلا كون كانت بنت ناس ماكانتش غادي تبقى مصاحبة مع ولدي كثر من عام
رقية:شوفي انا عاارفة بنتي شنو كتسوا مزيان ولدك هو لواكل ليها دماغها ودابا لهضرة ماشي معاك لهضرة مع ولدك
منير:(فايق من نعاس)ماالنا على لغوات على صباح
رقية:صباح هذا راه ظهر اسيدي ولكن انا معامن كندوي 😕،كندوي مع واحد كتافو باردين لاخدمة لا ردمة
منير:دابا اش وصلنا لهاد لهضرة
رقية:لاا وصلنا ليها سمع انا راه واخا تنطابق سما مع اﻷرض ماغاديش نزوجك بنتي حيث بنتي بزاف على شي واحد فحالك بنتي قارية وخدامة وعندها شهريتها ومهانخليهاش تزوج بيك باش تخسرها عليك
منير:هاداكشي بيني وبين بنتك ماشي سوقك فيه
رقية:شوف يااولد لمخوخضة انا راني رقية سمعتي رقية والى مرة اخرى شفتك مع بنتي كنقسم ليك بالله حتى نقتلك ونمشي عليك لحبس
رشيدة:تقتلي ولدي وتمشي لحبس اييه هداك هو سهمك معرووف عليكم تريكة شمكارية وزيدون ولدي راه هو لبزاف على بنتك انا بعدا ولدي ولد اصل ولمفصل ماشي فحال بنتك مامعروف لاشكون باها ولا منين جايباها
رقية:(تعصبات)كوون عرفتي بااها كون راك لا نتي لا ولدك باقين مزال فهاد دنيا ودابا سمعو اخير كلامي نتي وولدك بنتي نحصلك مزال كتدوي معاها هداكشي لهنديرو ليكم مانعاودو ليكم
رشيدة:بقيتي ليينا غير نتي اشمكارة
رقية؛شمكاارة اجي نوريك شمكارة اش كتسوى جات رقية باغا تلاح على رشيدة وهو يجي منير فالوسط دفعها وهي طيح
رقية:اييييي
منير:سيري فحاالك ماتبقاايش تعتبيها هنا(سد لباب)
سعيد؛(هز رقية من اﻷرض)خالتي عندااك
رقية:شكرا اولدي لله يرضي عليك (بجهد)الى بقاات فييك راه ماسميتييش رقية ودابا ملي ضربتيني ديير كرووة كبييرة على بنتي حتى ليل وهتشوف شنو هيوقع ليك
سعيد:يالاه اخالتي خليينا نمشيو
تمات غادة رقية مع سعيد وصلها حتى لقدام لباب
رقية:شوف اولدي انا عارفك باغي بنتي لزواج غير هو خاصك تعرف بلي بنتي مصاحبة مع هداك منير
سعيد:(الصمت)
رقية:عارفة هادشي ماكاينش شي راجل يتقبلو ودابا الى تراجعتي على زواج من بنتي من حقك
سعيد:انا ملي جيت باغي بنتك لزواج بغيتها حيث كنبفيها ومن صغر وملي مشيت لميريكان عرفت بزاف ديال لبنات ولكن ماقدرت نبغي حتى وحدة حيث فدوى بقات ديما بين عيني ماضي بنتك ماكيهمنيش والى كان منير هيبقى من الماضي انا قابل
رقية:هيبقى من الماضي تيقني اولدي اليوم انا متأكدة بلي بنتي هتسالي معاه تيقني
سعيد:واخا انا هنبقى عند كلمتي سيمانة جاية هنجي نخطبها وكنتمنى هاديك ساعة يكون كلشي سالا
رقية:هيكون كلشي سالا تيقني
سعيد:وااخا بسلامة اخالتي
رقية:بسلامة اولدي
مشا سعيد ورقية بقات واقفة كتضحك
رقية:بنتي هتولي ليك حيث هادشي لكتستاهل بنتي هتمشي لميريكان وهتعيش حياة زوينة وهتنسى لخنز ديال هنا (شافت لفوق وهي تلقى واحد جارة كتشوفيها)وااش مكاتعيايش من تبركيك نخراو لخرية خااصك تدي خبارها حتى هي
#عند_فدوى
لخدامة:مدام سوسن لفطور ديال سي ادم واجد
سوسن:فدوى شنوو ظهر ليك نتي طلعي ليه لفطور ومنها نيت تشوفي دوا لخاص تعطيه فدوى:صاافي وااخا
سوسن:فاطمة (لخدامة)هتوصلك حتى لبيتو
نضت وقفت مشيت مع الخدامة وقفنا قدام بيت ادم لكان فسفلي ماشي لفوق مدات لي لبلاطو ومشات خديت نفس دقيت فلباب سمعت
ادم:دخل
وركت على لبوانيي ودخلت كان ناعس فوق ناموسية غير شافني تهز من بلاصتو مافهمت والو وتيليفون لكان فيديه طاح اﻷرض
فدوى:صبااح الخير موسيو ادم
ادم:ف فدوى
فدوى:اه فدوى ااا واضح بلي مافراسكش بلي هنجي
سوسن:(من ورايا)اه مافراسوش،ادم جبت لممرضة باش تقابلك راك عارف حنا مرة مرة كننساو ليك دوا على اقل هي غادي تعطيه ليك فوقتو
ادم:(فرحان)ااه بصح عندك الحق ،مرحبا بيك افدوى
فدوى:شكرا
سوسن:لمهم انا هنخليكم هنمشي لشركة
ادم:بسلاامة
خرجات سوسن سدات لباب وبقيت انا وادم بوحدنا فلبيت
ادم:ب بلاطو
فدوى:ماالو
ادم:هتبقاي شاداه فيديك جري هاديك طبلة حطيه فوقها
فدوى:ااا اه سمحلي صراحة هادي اول مرة هنخدم بهاد طريقة وماعارفاش كيفاش نتصرف
ادم:مااشي مشكل خودي راحتك
جريت ليه طبلة حداه وحطيت ليه لبلاطو قدامو قلبت دوا عطيتو ليه ومن بعد بقيت واقفة كنشوفيه
فدوى:وداابا شنوو
ادم:شنوو
فدوى:هاني عطيتك دوا ومن بعد ،فلكلينيك كنبقى ندور من مريض لمريض وهنا كاين غير نتا شنو هندير ليك مثلا
ادم:واش خايفة لا يجيك لملل
فدوى:شوية
ادم:ولكن غادي يجيك
فدوى:هه شكرا بزاف ريحتيني اجي هنا كاين لويفي ياك
ادم:من المفروض يكون
فدوى:شنوو باليك ليك نقصرو شي طرح bubgi
ادم:مكانعرفش ليها
فدوي:هنعلمها ليك فين هو تيليفونك نتيليشارجيوها
ادم:تيليفوني طاح اﻷرض
تحنات فدوى مدات ليه تيليفون وتيليشارجاو ج1bubji علماتو وبركو كيلعبو فدوى م
رة مرة مكاتحسش براسها حتى كتنقز وكتبدا تضحك وادم غير كيبتاسم ودقيقة من بعد دقيقة كيزيد يتغرم بيها وهي كعما حاسة بيه
#فجردة_ديال_لقصر
كبيرة:لبنت زوينة بزاف ارجاء
رجاء:بصح زوينة برأيك هادشي لدارت سوسن صحيح نخاف غير لا يتعلق بيها كثر من القياس وهي تجيها شي حاجة لهتخليها تمشي من هنا ومايرجعش يشوفها
كبيرة:حتى انا خايفة فحالك والمشكل هو ان لبنت كيصحاب ليها جاية على اساس لخدمة ماشي جاية تحت طلب ولدنا لغارق وهيمان فيها
رجاء:مافهمتش هو كيفاش قدر يبغيها بهاد سرعة
كبيرة:هذا كيتسمى حب من أول نضرة نتي ماغاديش تفهميه غادي يفهموه غير ناس لدازو من نفس تجربة
جيهان:(جات)عرفتو شنو داابا دزت من حدا بيت ادم سمعت ضحك على جهد (كتهضر وتبعكك)
كبيرة:وااش ادم كيضحك
جيهان:ولله حتى سمعتو
ناضو كيجريو دخلو وقفو حدا بيت ادم كيسمعو صوت ضحك على جهد
رجاء:سمعتوو هذا صوت ضحك ادم،ههه ختي لكبيرة سمعتتي
لكبيرة:سمعتت
جيهان:(راجعة بلور وهي تضرب لفاز وهو يدير صوت)😰😰
لداخل عند فدوى
فدوي:سمعتي صوت
ادم:ااه
فدوي:شي حاجة طاحت قدام لباب
ناضت فدوى حلات لباب وهي تلقاهم واقفين بتلاتة
فدوى(باستغراب) واشش وااقعة شي حاجة🙄
لكبيرة:لاا ابنتي شنوو هيكون واقع غير جينا نطمأنو على ادم
فدوى(مبتاسمة) ااه دخلو
دخلو وادم بقا كينخنزر فيهم عاق بيهم
رجاء:ولدي واش مابدلتيش حوايح نعاس
ادم:نسييت
فدوى:فيين هوما حوايجو نعاونو فلبس
جيهان:هالماريو قدامك لبسيه على دوقك (غمزات ادم)
ادم:😑😑😑
رجاء:من احسن نخرجو حنا،شوية وهيجيبو ليكم لغدا
فدوى:شكرا امدام
خرجو وسدو لباب وفدوى مشات لماريو
فدوى:(وهي كتقلب بين الحوايج) شنوو تبغي تلبس
ادم:لكاان ماكيهمش(بتاسم) ولاعرفتي شنو لبسيني علي دوقك
فدوى:وااخا شنو ظهر ليك فهاد تيشورت
ادم(غوبش) :لغوز ،ياكما قالو لييك سميتي سكينة
فدوى:هههه لا مااشي هكاك مي لغوز حاليا راه الاموض
ادم:ههه لاموض عندهم هوما ماشي انا شوفي حاجة اخرى
فدوى:وااخا شنو ظهر ليك فهاد تيشورت زرق وهاد سروال لبيض
ادم:وااخا
قربات ليه وهي حسا باﻷحراج هي متعودة تعاون وتلبس المرضى ولكن ماشي فديورهم فسبيطار
#بصوت_فدوى
قربت ليه ودمي كنحس بيه كيفور يمكن من لحشمة جاتني شي حاجة فشكل قربت حداه شفت فعينيه تحنيت لعندو وحطيت صباعي على لبيجامة للابس وبديت كنحل ليه فصدافي ديال لبيجامة حيدتها وولا قدامي عريان ماكانش جسمو شي جسم مثير سبق لي وقلت ليكم بلي ضعيف والمرض مامخلي فيه والو  ،هزيت تيشورت لبستو ليه ودابا دزت لسروال
ادم:ماكاين لاش انا هنبدل لراسي
فدوى:ولكن كيفاش خليني نعاونك
ادم:مكانخلي حتى واحد يقرب لي ،عمر شي حد بدل لي حوايجي كنبدل لراسي
نفدوي:اووكي
ادم:خرجي لبالكو بينما بدلت
حدرت راسي وخرجت لبالكو كنشم فلهوا وعقلي وتفكيري عند منير فكيفاش غادي نقوليه بلي انا خدامة فدار مقابلة راجل وكنبقاو بسوايع بوحدنا فلبيت
صونا تيليفون جبدتو من جيبي كان منير يالاه بغيت نجاوبو وانا نسمع
ادم(غوت) :فدوىىىى
غوت تا قفزت وطاح تيلي من يدي تهرس
فدوى:اففف افف على زهر (دخلت)نعاام محتاج شي حاجة
ادم:ممكن تعاونيني نطلع فوق لكروسة بغيت نخرج لبالكو نشم لهو
فدوى:وااخا
دفعتو وخرجنا لبالكو لكان بالكو سفلي ومفتوح على جردة
فدوى:شنو ظهر لييك نمشيو جهة ربيع
ادم:لاا خلييني غير هنا مرتاح ،جلسي وااش هتبقاي واقفة
فدوى:كااين صهد
ادم:تبغي تشربي شي عصير
فدوى:ااا لا بلا مانبرزطو مالين دار
ادم:ايناا تبرزيط اصلا هذا وقت لغدا وراهم تعطلو بزاف
ايوا اش هنقوليكم جلسنا تما وجابو لينا لغدا لكان عبارة على صالاد كيفدايرة ولحوت الغالي ولفريت افييينك ارقية تشوفيني اش كناكل قهرتينا غير بسردين لخانز وبالعدس تقول عايشين فعكاشة
#فالعشية
كنت جالسة كنبدل لفاصمة لرجلين ديال ادم وكنمسح ليه بلبيطادين ساليت وقفت حيدت ليكات وشفت فيه
فدوي:اناا هنمشي
ادم:لفيين
فدوى:لدارنا
ادم:وعلااش
نجوى:هه كيفاش علاش ،كيفما نتا عندك ام وخوت كيتخلعو عليك حتى انا راه كيتخلعو علي
ادم:هترجعي غدا ياك
فدوى:من المفروض نرجع حيث هنا خدمتي
ادم:وااخا هنبقى نستناك
نجوى:انا هنمشي دابا بسلامة
ادم:بسلامة
خرجت من بيت ادم لقيت سوسن واقفة
سوسن:كيفداز نهارك
فدوي:مزياان الحمد لله
سوسن:خويا كيف بقا رجليه مزيانين
فدوي:كلشي مزيان عقمت ليه بلاصة لعملية ودرت ليه فاصمو
سوسن:لمهم كيفما تافقنا 10 صباح تكوني هنا و 6 ديال العشية تخرجي شيفور هيديك ويجيبك
فدوي:صاافي واخا
لكبيرة:(جات)بنتي وااش غادة
فدوي:اه هنمشي
لكبيرة:اجي شربي معانا كاس ديال اتاي عاد سيري
فدوي:لا نخااف لا نتعطل وماما تقلق علي
لكبيرة:وااخا لبغيتي
فدوي:بسلاامة (زدت وخليتهم)
سوسن:عمتي
لكبيرة:نعاام ابنتي
سوسن:هاد لبنت ماتعطيوهاش كثر من حجمها تصرفو معاها عادي فحالها فحال اي واحد خدام عندنا ماتدمجوهاش معاكم
لكبيرة:علااش كتقولي هاكا واش مارتاحيتيش ليها
سوسن:ماشي مارتاحيتش ليها غير هو هي كتبقى وحدة برانية ومن اﻷحسن نخليوها بعيدة علينا
لكبيرة:واخا نتي دابا فين غادة
سوسن:هنطلع بيتي هنبدل حوايجي وهنخرج عندي عشاء عمل هاد ليلة
لكبيرة:وااش ابنتي مكاتعيايش من الخدمة طلعي شوفي بنتك من لبارح فصباح ماشافتك
سوسن:وااخا
لكبيرة:خغفي من الخدمة ابنتي
سوسن:واخا نبغي نخفف مهانقدرش حمل شركة كامل على كتافي خوتي كاع هربو وخلاوني بوحدي ،واحد نهار وقع معاه اول مشكل سمح فينا ومشا مع هداكشي ديال لمافيات ولاخور مراتو دايرة فيه مابغات لقالت ليه ماكيقولش ليها لا وانا بقيت فالوسط ماحيلتي لخدمة ماحيلتي لراجلي وبنتي وماحيلتي ليكم حتى نتوما
مسعود:(من وراهم)شي لكديري فيه معانا عمري مهانسااه ليك اسوسن كلشي تخلى علي ولكن نتي بقيتي معايا لله يرضي عليك
سوسن:(مشات لعندو عنقاتو)واخا يبقى في عرق واحد جامي نتخلى عليك هنبقى معاك ونهار بعد نهار هنهزو سميتنا وشركاتنا لفوق
مسعود:انشاءلله انشاءلله ابنتي
#عند_فدوى
بعدما خرجت من عند هادوك ناس وصلني شيفور قلت ليه يحطني شوية بعيد على درب راكم عارفين ناس ديال احياء شعبيين هيبقاو يدويو واخا ماكاين والو عاد درت بحساب منير لباقي ماقلت ليه والو ،مشيت فلول طركت مول تيليفونات خديت تيليفون ومشيت لدار مع دخلت بانو لي اﻷجواء ماشي حتى لهيه رقية غير شافتني قلبات وجهها وجعفر جالس حداها كيمص لحامض
فدوى:سلااام
رقية:(الصمت)😖😖
فدوى:ماالكم شنوو وااقع
جعفر:شنوو واقع؟؟علاش هداك لكلب ديال منير ماعاودش ليك شنوو كاين
فدوى:لا تيليفوني تهرس صباح ماقدرتش ندوي معاه مالكم شنو واقع
رقية:منين بغيتيني نبدا ليك نبدا ليك منين مشيت عندو وخرجات مو صبناتني ولا نبدا ليك من كيفاش منير خرج حتى هو سبني وماشي غير هادشي راه ضربني
فدوى:بلااتي بلااتي مافهمتش نتي اصلا اش داك عندو
جعفر:نتي دابا همك غير فعلاش مشات عندو ماهمكش ملي شد مك ضربها وطيحها اﻷرض
فدوى:كتكذبو هو مايقدرش يحط يديه عليك
رقية:كنت عارفة مهاتيقينيش ايوا سمعي ابنت كرشي هداك لكلب لفاضحة بيه دنيا شدني ضربني فزنقة قدام لعادي ولبادي والى ماتيقتينيش سيري سولي عباد لله
بقيت كنشوف فيها لحت صاكي من بين يدي وخرجت بزربة غادة قلبي هيخرج من بلاصتو بصح انا وماما مكانتفاهموش بزاف ولكن هي كتبقى مي وبلاصتها فقلبي بوحدها ويوقع ليوقع جامي نسمح فيها وليد لتمد عليها نقطعها من جدرها وصلت قدام باب دار منير دقيت وهي تخرج لي مو
رشيدة:هاادي نتي شنوو باغا
فدوى:(كنترعد)كلمي لي منير
رشيدة:منير ماكاينش خارج
فدوى:فيين مشا
رشيدة:ونتي سووقك يمشي فينما بغاا مالك اش كتجيه
فدوى:مهانجاوبكش ومهانديرش فيك راسي حيث بنت ناس
رشيدة:(كتغوت)هااكيلي هااكاوا قالت ليك بت نااس واش سمعتو اعباد لله قالت ليك بنت ناس هههه بيننك وبين بنات ناس فرق كيف لفرق لبين سما واﻷرض حيث اول حاجة ماعندكش باك وثاني حاجة حيث بنات ناس ماكيخرجوش مع ولاد ناس بلعلالي كلشي هنا عارف بلي ولدي شابع منك ونهار غادي يخدم ويهز راسو غادي يلوحك وهيتزوج بلبنت لباغا انا
فدوى:نتي ماشي بنادم واش لهاد درجة قلبك قاصح ،كيفاش عطاتك خاطرك تقولي هاد لهضرة فوجهي
رشيدة:يااكما بغيتيني نقولها ورا ضهرك ودابا سيري من هنا قبل مانضربها ليك بشي ترييشة والى ولدي ضرب مك صباح وطيحها انا هنضربك نتي
فدوى:(سرطت ريقي)يعني هو بصح ضربها
رشيدة:اه ضربها على شنوو كنتي باغاه يدير مثلا يسمعها ويسكت
فدوى:ولدك غاادي يندم على هادشي لدار
ضربت فيها وتميت غادة كلي كنترعد شوية وهو يبان لي منير جاي اونفاس معايا غير شافني وجهو تبدل عرف بلي لقضية مهاتدوزش سالكة
منير:فدوى
فدوى:امم فدوى
منير:من صباح وانا كنعيط ليك علاش مكاتجاوبيش
فدوى:شنوو درتي مع ماما
منير:خليينا نمشيو من هنا ونشرح ليك
فدوى:(غوت)مهاانمشي معاك لفييين (شنقت عليه)نتااا شنوو كيصحااب لييك راسك حتى تحط يديك على ماما
منير:فدوى نااس كيتفرجوو فينا
فدوى:يتفررجوو الى بغااو يتفرجو ،جااوبني شنوو قاليك راسك ملي دفعتي ماما
منير:مك جات بدات كتعاير ماتحكمتش فراسي حتى لقيت راسي دفعتها
فدوى:(كندفع فيه)دفعتييها الكلب دفعتييها
منير:(شد يديها)فددووى جمععي يديك
فدوى:واااش عاارف انا شحاال من مرة مك كنتلاقى معااها كتعايرني فوجهي عمري ماقللت عليها اداب ونتا شنوو درتي دفعتي مي (نترت يدي منها)ياكماا كيصحاب ليك نتا مك لالا مولاتي وانا مي لاقيااها فزبالة حتى نخلي زاامل فحاالك يمد يديه عليها
منير:نتي رااك واقلة واكلة شي حاجة من غير الخبز انا راه لحد ساعة صااابر وصبري ليه حد
رجل:(دخل بيناتنا)يهديكم لله اش هادشي كديرو فيه