🦋جعلوني زوجة له 🦋 (مكتملة )

part122

💎جعلوني زوجة له💎
جزء 122

فدوى؛وااش ماعلموكش بلي خاصك دقي قبل ماتدخلي لشي بلاصة

ماجاوبتهاش لينا كانت فشكل شعرها مشنتف تحت عينيها كحل وشفايفها مقشرين ومافيهمش لون من حالتها كيبان فيها لعيا والمرض

فدوى:وااقعة شي حاجة
لينا:اه واقع وواقع بزاف،فرحي افدوى لولد لحاملة بيه غادي نمشي نطيحو
فدوى: واخيرا كان عليك ديريها شحال هادي انا قريت تقرير ديالك لعطاتك طبيب لبيبي كان فحالة غير طبيعية وكان خاصك ضروري ماديري اجهاض
لينا:فرحانة دابا يااك
فدوى:انا مكانفرحش لهادشي ا لينا ولدك ماعندو حتى شي دنب فهاد المشاكل لبيني وبينك
لينا:(نزلو دموعها)نتي سبابي حتى ولدي مرض
فدوى:اشس كتخربقي
لينا:بسبابك تقهرت وبكيت بسبابك نفسيتي ولات زيرو وهادشي اثر على ولدي
فدوى:واقلة انا لخاص نقوليك بلي بسبابك نفسيتي ولات زيرو مالك واش نسيتي بلي نتي تزوجتي براجلي حيث حاملة وجيتي بوجهك قاصح دخلتي لقلب داري كتفوحي علي،نتي لوصلتي راسك لهاد الحالة بسبابك ولدك مرض ماشي بسبابي ،نتي جيتي وخديتي لي راجلي ودابا تحملي
لينا:لقمان عمرني ماخديتو ليك هو فالأصل كان ديالي نتي لخديتيه لي نتي لفرقتينا على بعضياتنا
فدوى:ماشي انا لبعتدكم على بعضياتكم لقمان لبعدك عليه وتزوجني بزز مني وهادشي كنضن بلي راك عارفاه انا ا لينا ماجيتش لقيتو معاك فجنبك وخديتو ليك نتي عاندتي لمكتاب وتجننتي وماخليتي مادرتي باش يولي ليك وانا  شنو درت مادرت والو قلت كلمة وحدة هي حسبي لله ونعم الوكيل ولله سمعها مني (نزلو دموعها) فأيام لولة لجيتي فيها القصر كانو عيني ماكيشوفوش نعاس كنت كنبات بليالي كنبكي وفصباح كنت كنضطر نمسح دموعي باش نبان قوية قدامك وقدام لقمان هاديك كانت هي اسوأ ايامي ولكن مع الوقت ولفت وسمحت للقمان وسمحت ليك حتى نتي ماالك كتشوفي في هاكا اه سمحت ليك حيث لوقع مكاتلاميش عليه راسك لقمان حتى هو كيتلام عليه ،ماعلينا دابا (مسحات دموعها)هتمشي تنزلي ولدك شغلك هداك انا هندعي معاك لله يصبرك ويوقف معاك ماشي ساهلة تنزلي ولدك من بعد ماهزيتيه 6 شهور تقريبا
لينا:شفقتك وهاد الهضرة كاملة ديال سمحتي لي وبقيت فيك خليها عندك،انا اه غادي نزل ولدي وغادي نخسر لقمان ولكن تيقيني غادي ندفعك ثمن غالي غادي نرجع ليك حياتك ضلام فضلام
فدوى:خرجي علي من بيتي
لينا:أقسم بالله مهاتبقى فيك انا هنوريك شنو كنسوى الى مانخليك تبكي فبلاصة دموع دم فانا راني ماشي لينا
فدوى:(فيها دوخة) راسي هيتفركع ماناقصاكش حتى نتي يالاه حسبي لخطوات وسيري علي فحالك من هنا
لينا:عقلي على هادشي لقلت ليك ومن هنا لقدام فينما توقع معاك شي مصيبة تفكريني حيث انا لهنكون من وراها (خرجات)
فدوى:ياربي تصبرني على هاد بنادمة،بزز باش كنتحكم فراسي باش ماندير فيها حتى شي مصيبة 

#عند_رجاء
كانت رجاء داخلة وسط سوق جميعة فدرب سلطان ،سوق عامر بصحاب لحوانت لكيبيعو لوازم سحر و شعودة اضافة الى سموم والعقارات وقفات قدام واحد المحل كتبان متوترة عادي هادي أول مرة هتجي لبلايص فحال هادو