لبنات طلعو القصة صوتوا على النجمة وكثروا لي كومنتار. مدابيا حلل وناقش كيفاش راح نتكون النهاية ✨
بدينا نتعشاو نطق خالي وحيد قال لأصيل شفت صاحبك هذاك فؤاد تاع دوار عيطلي باباه الصباح قالي راك معروض للعرس وقالي بلي عيطلك مهزيتش عليه راه عارضك. قالوا وي علابالي راه جاني قبل المغرب . نطقت مرت خالي قاتلو شفت اصيل صحابك بكل لي خاطب خاطب ولي متزوج متزوج بقيت غير انت مفهمتش في واش راك تستنى حتى يشيب راسك وتدخل للأربعين. وانت هكذا لا مرا لا ولاد . طلعت راسي شفت فيه لقيتوا يخزر معايا المأكلة حبستلي حطيت المغرف راح نوض بيسك علابالي وش كاين ورا هاد الهدرة علابالي راح نسمع كلام يوجعني من الأحسن نطلع منيش قادة نوجع قلبي اكثر ما راهو موجوع مسحت فمي راح نوقف حتى نطقت قاتلوا وش رأيك نخطبك هاد الشهر ما يوصل الصيف تكون لعروسة واجدة ودير العرس . من كنت راح نوقف عاودت قعدت فشلت هو غير يشوف معايا وساكت حسيت الوقت حبس وانا نستنى فيه وش راح يجاوب قالها لا هكدا راني هاني . قاتلوا كيفاش لا ياك قبل ما تروح لصحرا قتلي كي نجي نخطب ونفتح ، قالها بدلت رايي . قاتلوا علاه بدلت رأيك إذا على جوليا طفلة مقبلتش بيك عندها لي تبغيه وما كثر النسا والبنات راهم على رأسهم يستناو فيك. في رمشة عين يهز للاتابل بيها بلي فيها ويخبطها زجاج يتطاير في كل بلاصة. يعطوا كامل من الخلعة. قالها انتي هكدا ياك تبغي هكدا شا مجبدك في ربها درك الحكاية . وقفوا كامل مخلوعين غير أنا بقيت جامدة غير نشوف فيه شفتوا النار وصبيت عليها الزيت هكاك عاد يطير وحدو ، قاتلوا ونخليك هكدا قول وتبقا هكدا . قالها شا دخلك فيا اهدري شا دخلك جيت شكيتلك اهدري تحبي نهز قشي ونهج من الدار قولي . قاتلوا هكدا يا اصيل شا مدخلني فيك مالا عليك دعوة الشر إذا ما درتلي شا راني باغية لا عاد بيني وبينك ليوم تغمض عيني يا أصيل إلا كسرت كلمتي نموت ومنيش راضية عليك . خالي غير يستغفر قالها يا مرا خطينا من المشاكل العبد مش ناقصهم. قاتلوا ماكاين حتى مشاكل راني حابة راحة ولدي حابة نشوفو عريس نفرح بيه علاه حرام . نطق اصيل قالها هكدا يما هكدا راكي تحكمي فيا من اليد لي توجعني ياك . قاتلوا بغيت نتهنى عليك ً، قالها علاش أنا وليهّ تتهناي عليا . قاتلوا هدرتي قلتها لا عاد بيني بينك ادا مدرتليش شا راني باغية . تلفت ليا شاف معايا زمان وقلها معليش ديري لي بغيتي قاتلوا سمانة الجاية نخطبلك إذا تعرف وحدة قولي عليها وإذا معندكش أنا ندبرلك وحدة تليق بيك دارلها ايه براسو وهز مفتاحو وتلفونو وخرج . بقيت نستوعب في الهدرتو يعني قبل . نطق مسلم قالها علاه هكدا يما راكي غير تزيدي تصعبي فيها . خبطت صدرها قاتلوا ما نصعب في والوا أنا راني ندير في الصح أنا نعرف مصلحتكم قالي ربي يسهل راني خارج حتى هو خرج بقينا غير حنا . شفت مع اسمهان لقيتها تشوف فيا وغايسة وليت وقفت وطلعت لشمبرتي دخلت غلقت الباب ورأيا وقعدت في الأرض . واش ندير أنا يخطب علابالي تصرالي حاجة علابالي قلبي يحبس علابالي نهبل علابالي مش راح نقدر حطيت راسي بين يديا وبكيت كيما جامي بكيت في حياتي وناجيت ربي اول مرة ندعي وناجي هكدا يا ربي خفف عليا ولا أديني يا ربي قرب ساعتي يا ربي منيش باغية نموت كافرة منيش باغية توصل بيا اللحظة لي يتغمضو فيها عينيا ونقتل روحي يا ربي راك شايف حالتي ما عندي حتى واحد علابالي بلي غلطت بصح تبت يا ربي أوقف معايا منقدرش نشوفو مع غيري بقالي هو كلشي في حياتي . بقيت شي زوج سوايه وانا هكدا حتى حسيت باب شمبرتي تفتح وانا قاعدة هكاك دورت لقيتها اسمهان . شافت معايا زمان وخرجت لا أنا هدرت لا هيا هدرت .
