السحر الملعون " الجزء الثاني تابع لشيطان زوجي "

الحلقة 1

🕯#السحر الملعون🕯
#شيطان زوجي 2
#صونيا
🤍الحلقة 1 🤍
************
كي نتفكر واش عقبت في حياتي تحكمني الرجفة جسمي كامل يزوغب مكانش شعرة فيه ما توقفش...
تمنيت لو اني كنت في حلم حتى وان كان طويل المهم اكون حلم وجي نهار ونفيق منو .....
حسام : هند علاش تعذبي في روحك هذاك الشيء لي فات مات وحنا رانا في ذرك الحمد لله وائل راه راجل وحياتنا مستقرة واش حبيتي اكثر من هكذا .....
هند : حسام وائل كون ما يشربش دواه يقعد اهترف بهاذوك الصوالح كيفاش تقولي رجع راجل قول كيفاش بغيتني نتهنى عليه ونزوجو ....
بغيت نشوفو عريس خارج بالكوستيم من عندنا حبيت نفرح بيه ....
حسام دار ليها حطها بين ذرعيه اشوف في عينيها لي مزال يعشق فيهم لحد اليوم ...
حسام : تشفاي هند تشفاي كي كنت نشوفك كلشي يتخلط عليا ههههه حتى المشية تروحلي.... صدقيني اجي نهار وابني يعرف نفس الاحساس يعرف واش معناه الحب ويزوج وتفرحي بيه كيف راكي متمنية.....
عنقاتو وهي تضحك تفكرة كيفاش كانو يتعاشقو كيفاش حتى زوجو حتى وان تعذبو بزاف مي المهم راهم مزالو مع بعضاهم واقفين ضد اي مشكل يوقف قدامهم ....
***********
مابين هوما قاعدين يحكو على حياتهم سمعو الباب تفتح وحاجة ترمات على لرض هند تخطفت وناضت تجري ؛ جا حبيبي جا نور عيني وليدي لعزيز روحت يا عمري ......
هند ماتت بالفرحة رجع ولدها من الجامعة عندها شحال ما شافاتوش تبوس وتحضن وهو متابص عليها .....
وائل : حتى انا توحشك يا ماما والله علابالي رايحة تقابليني هكذا .....
اعنق فيها وهزها وقعد ادور وهند تضحك ....
هند : حطني حطني دخت صاييي ....
قعدو يضحكو خرج عليهم حسام
حسام : خلاص نسيتوني ديما انا نجي مع التالي ....
وائل تلاح عليه قعد اعنق في باباه باين بلي متوحشو ....
دخلو لصالو قعدو اقصرو على الجامعة لقراية .....
هند : ولدي ياك تشرب دواك في وقتو ....
وائل هبط راسو وقال : يا ماما نبان مهبول بهاذاك الدوا صدقيني خطرة نشرب وعشرة لا .....
حسام تحلو عينيه وبان عليه لقلق ...
حسام : قولي وائل كي ما تشربش كيفاش تحس روحك .
وائل: خطرات مليح وخطرات ندير بزاف كوابيس نكون مقلق بزاف نولي ما نفرقش بين الحلم والواقع ؛ مي نحتم على روحي حتى نرجع للحقيقة لي عايش فيها يعني نتغلب على كلشي .....
هند دموعها في عينيها وتحكي : واش تشوف حابة نعرف ....
حسام: اخطينا من هاذ لكلام ماشي ناقصك قلقة انت ....
هند : حابة نشارك ولدي انا كون في وقتي حكيت الشيء لي صرالي ما نوصلوش لهاذ الشيء كلشي بسبابي....
وائل: ماما ديما نشوف جنان كبير فيه دار مهدومة طفلة تبكي مواصفاتها ما ابانوش اما شعرها كحل ويديها مسخين بزاف وحتى رجليها يجذبني ليها صوتها شغل نعرفها .....
كي نقرب ليها نحس روحي فرد انسان انا وهي ....
نحسها جزء مني ...
نسمع صوتها تقولي ساعدني يا خويا ساعدني...
نحب نمسها تولي تبعد نلقاها في بلاصة خرى ....
وبعدها نشوف بزاف خيالات ادورو عليا ....واحد فيهم قاعد عند قبر وهاذاك لقبر يشعل بالنار و واحد لمرا تقعد تحفر ثمة فيه كي نحب نقرب ليها تولي تعيط وانا نفيق من واش كنت نحلم ....
هند مشوكية من كلام اوليدها باين بلي كل مرة يتعذب هكذا وتلوم في روحها على الشي لي داراتو ورجع على وليدها .....
حسام ناض بلا حتى ما اقول كلمة وجهو مزير باين بلي مقلق علخر...
وائل: سامحوني ما كنتش حايب نقلقكم معايا مي لازم نلقى حل والله موحال نكمل نشرب الدوا هاذا وما نقدرش تقعد حالتي هكذا.....
دار ليه حسام وقال : والله يا ولدي قلبي راه يتقطع عليك كون غير جات فيا ولا فيك ....
هبط راسو حزين ما لقا كيفاش اسولاجي وليدو ....
وائل ناض ليه هزلو يدو : المهم انت راك بخير يا بابا ربي اطول في عمرك انا ذرك نلقى حل ما تخافش عليا .....
هوما يحكو وتلفون وائل اصوني وعاود كان محطوط حذا هند ....
رفداتو وشافت سلمى ضحكت وشافت في ولديها ....
هند : هاك يا ولدي باين بلي ما قلتلهاش راك لحقت بخير هههه ...
وائل وجهو حمار وهز تليفون حطو في جيبو .....
حسام : ويكت يا ولدي تعرفنا عليها العام هاذا تتخرج ان شاءالله وتولي كونتابل كيف يماك وتبدى تخدم معايا لازم ثاني تخمم تكون عايلة يا بني .....
ضحك وائل وجهو حمار من كلام حسام ...
وائل : ان شاءالله كي اكتب ربي اصلا موحال اكون حاجة بلا رضايتكم.....
ناضت هند باست ولدها وقالت : هايا كشما تاكل يا ولدي كلشي راه واجد اطلع لبيتك حط حوايجك بدل قشك ورواح.....
طلع وائل توحش شومبرتو بلاصتو ....
دخل بدل قشو غسل وجهو مابين هو طلع راسو جا وجهو في لمرايا ......
قعد اشوف في وحدة واقفة موراه تخطف دار مكان حتى واحد .... عاود شاف مزالها واقفة ....
وائل : حتى لهنا ولحقتيني ياك قتلك ما تبانيش حتى انا نقولك ......
#يتبع 😈