السحر الملعون " الجزء الثاني تابع لشيطان زوجي "

الحلقة 80

🕯السحر الملعون 🕯
#شيطان زوجي 2
#صونيا
🤍الحلقة 80🤍
********************
رجعوها لدار راجلها كل يوم تجي فرملية تشوفها ؛ هكذا طلب منهم مراد حايب اشوفها كل صباح وكل ليلة موحال اخليها راقدة وحدها في سبيطار...
فاتو شهورا وحسام الصغير يكبر ويكبر ؛ الوقت تعدى فيساع من غير مراد لؤ شافو طويل بزاف بزاف...
لحقو 8 شهر وصلت لادات تاع السيزاريان ؛ ميسون مزالها في غيبوبة ؛ عاودو رجعوها لسبيطار غير دخلوها لغرفة العمليات دارت جاست خلات الطبيب شك انا فاقت ستنو نصف ساعة وهوما اعسو والو مكان حتى ردت فعل ....
الطبيب: لازم نديرو العملية موحال نأجلوها...
كلشي واجد قالو باسم الله خرجو الطفلة لولة ؛ صحتها مليحة كيف لقمر تضوي ...
لحق البيبي الثاني جبدوه مي ما بكاش قعدو يضربو فيه على ضهرو بسيف ما خرج صوت ...
قعد الطبيب يفحص فيه وشك انو ماشي كامل النمو تاعو ....
طبيب ١: تبالي هاذا ما راحش اعيش موحال مزالو صغير أعضاء تاعو ناقصة بزاف حتى التنفس ما يقدرش وحدو ...
طبيب ٢: انا ثاني نقول نفس الشيء مي تعرف ممكن تصرى معجزة ويقدر اعيش حنا نعملو المستحيل...
حطوه في لاكوفوز وخرج الطبيب عند مراد ...
الطبيب: كلشي مبروك عندك بنت وولد ؛ الطفلة كيف لقمر ماشاء الله ؛ اما الطفل عندو مشكل كبير ماشي قادر يتنفس وحدو حطيهناه في الحافظة ان شاءالله يقدر يتغلب على الوضع وعيش ...
مراد فرح وزعف في نفس الوقت ...
مراد : مرتي واش حوالها ياك لباس ...
الطبيب: راهي مليحة ما تخافش عشر دقايق وطلعوها لاشومبر تقدر تشوف أولادك مي لازم تبدل قشك تلبس لبس لي مدوهولك وتعقم يديك ؛ اصلا ممنوع تقيسهم لولاد راهم فراجيل تشوفهم من لبعيد برك ...
دخل معاه مراد ؛ زينب هند طارق قعدو برا اما حسام كان شاد احفادو في الدار مع سلمى لي مشاكلها ما حبتش تخلص كامل .....
في دار حسام ***************
سلمى : عمي في بالك صايي كملو العملية تاع ميسون...
حسام : ايه تكون كملت ربي اكون في عونها هاذ المسكينة ...
سلمى : هاذي جزات كل واحد يخدع يا عمي هي كانت حابة تقتل مراد ؛ انا حرت كيفاش دار فيها الثيقة وزوجها ....
حسام طلعتلو السخانة من كلامها : يا بنتي الناس كامل تغلط وباين بلي تحب مراد ؛ مالة كيفاش تحدات عايلتها كامل على خاطرو......
شافت معاه سلمى وضحكت ضحكة صفرة : بعد واش قولي كون جا وائل راه حرقها ولا دمرها كيف ما عمل معايا ...
وقف حسام غاضب : باش تطلبي من ربي انو يحسن عونها ونجيها من هاذ المحنة راكي هنا تحكي على الغلطة تاعها ؛ كون غير كل واحد فينا اشوف عمايلو الدنيا تولي بخير يا بنتي ....
خلاها غير تشوف فيه ودخل لدار قعدت هي في الجنينة وحدها ....
سلمى ما عجبهاش كلامو وكيفاش قعد ادافع عليها ...
سلمى تحكي مع روحها : زعما أشر عليا ههههههه كون هوما ثاني شافو الشيء لي عملوه فيا جابولي وحدة وحطوها في وجهي مي تالمو دعيت ربي على الظلم لي كنت فيه راهي تحت التراب وعلى زهري لمسود انا تربي بنتها ؛ ويكت نتهنى ما علاباليش ......
قاعدة تخمم حتى سمعت حسام الصغير يبكي بصوت طالع ماشي كيف عادتو طلعت تجري ليه لقات جدو هازو وجنة خايفة ....
سلمى : جنة بنتي واش درتي قولي ....
جنة : ما درت والو ماما كان راقد وجاتو ذيك لعجوز ناض يبكي ....
سلمى بصوت طالع : بركاي من لكذب شحال من مرة نقولك مكانش لعجوز فهمتي ...
حسام : بركي ما تعيطي عليها هاذا آخر مرة نقولهالك جنة ما تكذبش....
سلمى : عمي من فضلك ما نحبش تدخل في تربيتي مع أولادي.....
حسام : واقيل نسيتي بلي جنة ماشي بنتك صح هي اخت حسام مي انت ماشي يماها هاذ الشيء جامي تنسايه ......
سلمى دارو الدموع في عينيها ....
سلمى: عندك الحق ماشي بنتي مي نحبها كيف بنتي ربيتها وكبرتها مع لخر هكذا تقولي ؛ صحا يا ربي ....
قربت ليه نحاتلو ولدها من بين يديه؛ قعد غير اشوف معاها حاير فيها ....
سلمى : نخليك مع حفيدتك انا وبني ما عندناش بلاصة في قلبك واقيل ...
داتو وخرجت رفدت صاكها وراحت هزت طونوبيل وروحت لدارها ....
جا وائل احوس عليها باش اروحو اشوفو ميسون ما لقاهاش ....
حسام : روحت سلمى يا ولدي ؛ انا زدت معاها شوية في لكلام واقيل ما كانش قصدي نقيسها والله ....
وائل: واش صرا يا بابا غير الخير ...
حسام : كنت زعفان شوي جات هي في طريقي رجعت عليها الزعاف راحت روحت .....
وائل هبط راسو ما لقاش واش اقول شوية ورجع على حسام ..
وائل: بابا سلمى نظلمت بزاف في حياتها خلوها في بلاصتها تحملت مني بزاف ما نحبش انتوما تقيسوها ثاني ....
كلامو كان كيف الموس في قلب حسام ....
حسام : صدقني يا ولدي مكانش قصدي مي مكان لاه تقولي هاذ لكلام اصلا قريب بزاف رايح تتوحش حتى صوتي ...
راح وخلى وائل واقف حاير واش معناها كلامو هاذا ...
وائل: بابا واش معناها كلامك علاش راك مسافر ومخلينا قول بابا ......
#يتبع 😈