السحر الملعون " الجزء الثاني تابع لشيطان زوجي "

الحلقة 73

🕯السحر الملعون 🕯
#شيطان زوجي 2
#صونيا
🤍الحلقة 73🤍
********************
راقدة ماشي جايبة خبر لحالها ؛ هو يقرأ في القرآن وهي ترجف وحدها كيف الورقة .
هاذو تقريب 5 سنين وهي بهاذ الحالة ملي ماتت سمية؛ سلمى فيها شيء غريب ؛ تصرقاتها غريبة .
وائل خايف عليها وعلى البيبي لي في كرشها ؛ خايف على جنة لي كل ليلة تنوض من الرقاد تعيط وتبكي خايفة من لعجوز لي تقرب منها اكثر واكثر .....
وائل قرر يرجع لطريق ربي ؛ حلف ما أزيد يهمل صلاتو حبس الخمر والسهرات نهائيا ..
وعد ربي انو ادير كلشي باش اتوب توبة نصوحة .
الشيخ: يا ولدي لازم أداوم الرقية بإذن الله تولي مليحة ؛ ما تخلوهاش وحدها جامي ..
وعندكم على الطفلة؛ مدام قلت راهي تشوف حوايج راهم حابينها....
وائل: كيفاش هاذي حابينها ما كفاش الشيء لي صرالنا .
الشيخ: لازم نعرفو لقبر وينو لازم نلقاو السحر لول باش نقدرو نفكوه...
سكت وائل وتفكر كلام باباه : بابا كان يحلم بزاف بقبر حتى ماني ربي يرحمها كانت تقولو على قبر حتى انها رسمتلو كيفاش كان داير ولبلاصة لؤ كانت تشوفها ...
وزيد بنت المشعوذ راهي معانا ممكن نلقاو حل ...
الشيخ: لازم نشوفها ؛ لازم نحكي معاها ....
وائل: اصلا راهي في دار مراد هربت من دارهم ....
الشيخ: علابالي بكلشي عن قريب جدا رايح نتلاقاها ؛ مي يا ولدي لازم تعرف حاجة ؛ من كل عايلة داو منها صغير الا انت مزال ما دواش يعني ممكن اطالبوك بهاذا ....
وائل: مي سلمى كانت حامل في وقت بعيد يعني داو هاذاك الطفل لا ....
الشيخ: لا للاسف ما كانتش وعلى حسب ما علابالي ما كانتش حامل كانت عندها كيس بلا جنين يعني ما تعتبرش صفقة ؛ اما زوجتك لي توفات هي ما قبلتش انهم يدو بنتك خيرت الموت على انها تمدهالهم.
وائل تالمو شوكا من كلامو طاح على ركايبو؛ حتى رجليه ما قدروش يرفدوه ؛ الدموع في عينيه وقال : واش هو الحل قولي راني مستعد لكلشي ....
الشيخ: الحل الوحيد انك تكون ديما في طريق ربي ؛ صلاتك ؛ صيامك ؛ عبادتك تبعهم وما تفرطش في حتى حاجة ..
وثانيا السحر لازم نلقاوه يعني رايحين نتعبو ما نكذبش عليك ...
وائل: انا عاهدت روحي وعاهدت ربي موحال ننحارف ذرك موحال ندير حاجة تغضبو مني ؛ ان شاءالله نكون قدوة لولادي يا رب ...
وهوما يحكو دخلت عليهم جنة راحت ديراكت عند الشيخ باساتو وقالت : شكون هاذي لؤ راهي معاكم وعلاش كي شافتني تخبات موراك ...
الشيخ حل عينيه ونباهر في كلامها ...
الشيخ: هاذي رايحة تحميك يا بنتي ما تخافيش منها ...
جنة : مانيش حايفة منها هي خايفة من هاذيك لي ليهت....
هزت صبعها ودراتو اتجاه الشوك لخرى ...
دارو في زوج ما شافو والو ...
وائل: يا بنتي راكي تتخايلي برك ...
الشيخ: وائل لازم توصيها بنتك جامي تقول بلي راهي تشوفهم؛ قادر يخطفوها وديرو بيها السحر باش احوسو على الكنز ؛ بالاك يا ولدي ....
وائل: منك بالصح بنتي تشوف حوايج في الظلمة لي انا ما نقدرش نشوفهم ...
الشيخ: للأسف ايه لازم تحميها منهم او من المشعوذين بلاك اب ميسون يعرف بهاذ الشيء والله ادير كلشي باش يديها ويستغلها ....
فاقت سلمى شافت معاهم : صايي كملتو ما حسيت بوالو اليوم انااااا ...
ضحك معاها وائل: صايي ايه اليوم كانت خفيفة عليك الحمدلله...
#يتبع 😈