السحر الملعون " الجزء الثاني تابع لشيطان زوجي "

الحلقة 7

🕯#السحر الملعون🕯
#شيطان زوجي 2
#صونيا
🤍الحلقة 7 🤍
************
قاعدة تخمم في الشي لي في ذراعها مالقاتلوش حل نزلت عند يماها تسقسي فيها ما قدرتش تشد كلشي ليها جاتها هاذ الحاجة كبيرة وثقيلة عليها ....
زينب : يما والله صرالي حاجة جامي تامنيني حلمت منام وكي حبيت نحكيه لهند صحبتي ياك تعرفيها عرفتك بيها خطرة ايا لقيت هاذا مكتوب على ذراعي حتى ولدي خاف عليا ماشي عارفة لا نحكي ولا نسكت ...
يماها حلت عينيها شغل عارفة بالشي لي تحكي عليه بنتها ...
زينب: من وجهك نعرف بلي عندك علم بواش راني نقول ....
ام زينب : يا بنتي كي كنتي صغيرة كانو يصراولك بزاف صوالح كنا ما نعرفوش علاش غير انت لي يصراولك ديناك عند الراقي حتى باباك ربي يرحمو ابات واقف عند راسك كل مرة فيك حاجة وكانو الناس اقولو بلي هو لي ديما يضربك مي حق الله كان اخاف عليك كثر من خيالو حتى وانك ماكيش من لحمو ودمو ربيناك كيف بنتنا لي جبناها من لحمنا ....
زينب الدموع في عينيها ماشي حابة تتفكر بلي راهم مربيينها ماشي والديها تاع الصح ....
ام زينب: ما تبكيش يا عمري انت بنتي وموحال اي واحد اقول عكس هاذ لكلام ....
زينب باستها من يديها وراسها وحطت راسها في حجر يماها ....
ام زينب : مزالك ماكيش حابة تعرفي باباك الحقني ويماك ....
زينب : بلا ما تكملي مانيش حابة كون جاو يبغوني ما رماونيش في دار الايتام مزية ربي شاف ليا و حطني
في طريقكم ....
ام زينب : راني مخليا في واحد الكوفر النقمة تاع باباك البيولوجي اذا نهار حبيتي تعرفيه شكون حنا جامي شفناه ولا عرفناه غير من لي كنتي صغيرة وكانو يصراولك ذوك لحوايج حوسنا عليه مي كان يرفض اقابلنا وقالنا موحال نقولولك انت شكون وبنت شكون مي انااا ما نقدرش نكذب على بنتي من لي كنت وعرفتي صلاحك خبرتك هكذا نكونو صافيين مع ربي سبحانو .....
او في رأيي يا بنتي الشيء لي شفتيه خليه ليك استري ما ستر ربي وسيي كيفاش ترقي روحك ....
زينب : انا كلشي نقربو للعلم غير هاذا الشيء اول مرة نحس روحي ماني فاهمة والو واش راه صاريلي .....
هوما يحكو احاولو يلقاو حل للمشكلة دخل ولد زينب قعد حذاهم ....
ولد زينب  : ماما لعشية نتلاقى بوائل مانيش حايب نكذب اكثر من هكذا وائل صاحبي وقريب ليا بزاف عندنا عوام مع بعض لازم نقولو او اذا نقولو خبي السر راني متأكد بلي رايح اخبيه....
زينب تخمم هزت راسها جات تنطق قاطعتها يماها.....
تم زينب : بنتي السر اهدم لبيوت خلاص لازم تصارحي صحبتك كون تحبك تاع الصح وانت ختها راهي تتقبل كلشي حتى واذا كانت حاجة ماشي ساهلة سمعتي قولي الحقيقة وراسك مرفوع في السما خير ما تخبي وراسك ديما تحتك والحمد الله ميمتك جامي خبات عليك حتى حاجة يا بنتي .....
قبلت زينب وقالت : مي هند انا لي نخبرها انااا وحدي انت تحب تقول لصاحبك قول .....
فرح وليدها بزاف وعيط لوائل باش يتلاقو ....
وائل: اهلا صاحبي وينك عندي ايامات ما شفتكش ....
ولد زينب : وائل لازم نشوفك عندي هدرة معاك بزاف طويلة وعريضة ومن الأحسن نكونو وحدنا فهمت ....
استغرب وائل من كلامو ورجع قالو ايه لعشية مع المغرب بربي .....
قعد يشرب في قهوتو وطلع يدوش ....
نحى قشو دخل لدوش قعد يسمع في مسيح لمرايا رجع فتح الريدو لقا مكتوب ....
(اقعد مكان لاه تروح ) ...
ضحك وقال مدام قلتو ما تروحش غير ثمة لي راني رايح معناها كاين حاجة ما بغيتونيش نعرفها ....
وهنا سمع مرا تعيط شغل واحد يقتل فيها وحس ظر في ظهرو وجعو بزاف كي شاف في لمرايا لقاه مجروح ثلاث خبشات في ظهرو والد.م اسيل منهم غضب وائل بزاف اول مرة يغضب بهاذ الدرجة وعيط نروح واذا حابة تقتليني غير تفضلي ...
وهنا زادو قواو الأصوات وكلشي تكسر لومبات الزجاج تاع الطواقي لمرايات كلشي جا في لرض وائل مشوكي اول مرة في حياتو يتعاملو معاه بهاذ الطريقة علاش ما حبونيش نتلاقاه علاش ....
مد ضحكة صفرة غسل روحو وقال رايح معناها رايح .....
#يتبع 😈