🕯السحر الملعون 🕯
#شيطان زوجي 2
#صونيا
🤍الحلقة 57🤍
******************
جميلة تنظف في الدار من آثار الد.م لؤ فيها ....
سمية : سمحيلي خالتي كنت حابة نعاونك مي نكره نمسو؛ نخاف منو ما نعرف علاش .
جميلة: هاذي خدمتي ورزقي يا بنتي مي نوصيك تروحي ترقي احسن شي ؛ لي دار هاذ الخدمة راه ناوي على الشر ....
سمية : نو مكانش منها هاذ الشيء ؛ لي دارو هكذا قصدهم اخوفوني مي موحال نتراجع اصلا راني شاكة في وحدة ان شاءالله تطلع خاطية.....
جميلة : يا بنتي الناس ما تخافش ربي ساعفي روحك وروحي رقي خوذي برايي ....
سكتت سمية ما لقات ما تقول ....
شوية ورجع وائل لقا الحالة مقلبة في الدار .....
وائل: ماما واش لي راه صاري هنا ...
هند واحد دخل لدار ؛ لقينا الدم في كل بلاصة قش سمية كامل نقطع حتى تاع سلمى ما فهمنا والو....
وائل: وعلاش راكم تنظفو كون عيطتو لابوليس سع ....
هند: سمية كانت خايفة ما بغيتش تكبر المشكلة ....
طلع ليها يجري ...
سمية : مزية جيت حبيبي شفت واش راه صاري هنا ....
عنقها لقاها ترجف من الخوف ...
وائل: ما تخافيش ممكن كاش واحد احب اخوفنا ...
كنت حايب نخبرك بحاجة نسيت نحكيلك عليها سمية ؛ حاجة تخص العايلة تاعنا.....
مزال ما قالش حرف صونا بورطابلو؛ شاف لقاها سلمى هز عليها ديراكت ....
سلمى: وائل قتلني السطر في كرشي واش ندير....
وائل: جاي ليك ذرك ما تتحركيش....
قطع شاف في سمية : اسمحيلي نروح نشوفها راهي مريضة ....
سمية: معليش روح نستناك اليوم نقعد هنا ...
باسها وخرج راح عند سلمى في الطريق اخمم شكون يعني دار هاذ الشيء واش قعدو منها ....
طلع ديراكت لقاها حاطة لاقلاص فوق كرشها وحكمتها الحمة ....
سلمى غير شافاتو ضحكت ....
وائل: انت في حالة غير تشوفيني تضحكي هههه ...
سلمى: ايه باين نشوف راجلي نضحك...
وائل: هايا نديك لطبيب مكان لاه نستنو ....
سلمى : لا كان هنا طبيب عمري غير ريح شوية معايا ...
قعد عند راسها يلعب بشعرها شوية وشافها رقدت ....
رجعت تتخطف وتحكي وحدها وهو غير اشوف .....
سلمى لقات روحها في وسط مدينة كلها بالنار شاعلة فيها ؛ كرشها لفمها عيات تتمشى ؛ شوية لمحت ناس تمشي في قروب مي مشيتهم ماشي نورمال .
قربت ليهم لقاتهم شغل يتلواو ما عندهم لا عينين ولا فم ؛ نخلعت وهربت منهم تجري وهوما يلحقو فيها دخلت لواحد الدار تخبات ثمة ؛ حست بالسطر في كرشها مع شافت لقات بزاف د.م هابط منها وحاجة تخرج بين رجليها ...
بيبي صغير مي قاعد كيف هاذوك لي هربت منهم ...
تعيط وتبكي مي واحد ماشي سامع بيها .....
تحلم وتتخبط في فراشها حتى وائل شاف الد.م هابط بين رجليها بلا ما اخمم هزها حطها في الطونوبيل ودمارا ....
لحق لسبيطار جراو بيها لحقو مدولها دوا ؛ الحمد الله الدم حبس ....
البيبي مليح...
الطبيبة: شربت كاتالجين دارلها نزيف صغير مكانش حاجة تخوف تقدر تديها تروح مي منا على ايامات رجعها نشوفوها ....
وائل ما لقاش روحو بين سمية وسلمى حس روحو ضايع مالقا كيف يعمل ؛ هز سلمى وداها عند هند ...
غير ما دخلو حارت هند وحكمها الخوف ....
حطوها في بيت هند بويسك ماشي قادرة تطلع الدروج ...
سلمى : وين راني علاش مانيش عند ماما ....
وائل: تقعدي قدامي صايي مكانش حتى هدرة ....
طلت عليها سمية حابة تطمن عليها ...
سلمى دورت راسها من بعد قالت دخلي دخلي راني مليحة ...
دخلت سمية وقالت : الحمد لله على سلامتك ان شاءالله ترجعي توقفي على رجليك ...
سلمى : مرسي...
وائل: هاي ليكم نروح نجيبلها الدوا
..
غير ما خرج لحقاتو سمية ...
سمية : مالها غير الخير ...
وائل: شربت دوا دار فيها هكذا اقعدي معاهم راني جاي..
جات تدخل سمعتها تحكي لهند ...
سلمى : نمت حاجة خرجت مني ما عندها لا عينين ولا فم ؛ وجهو كامل مكانش شوية وجا واحد كحل بزاف ابانو غير عينيه هزني وقعد يمشي بيها كي فقت لقيت روحي هنا ....
دخلت سمية وقالت : ممكن من الدوا لي شربتيه نورمالمو انت حامل ديري اطونسيو لروحك ...
سلمى : وانت واش دخلك فيا قولي ولا عاجبك الحال كي راكي شايفتيني هكذا ....
سمية : استغفر الله علاش يعجبني الحال ...
هند : صايي ماشي وقت هاذ لكلام؛ نروح نوجدلك حاجة تاكليها ...
سمية : ماما خالتي جميلة دارت الماكلة اقعدي انا نجيبلها ....
سلمى: موحال ناكل من يديك قادر ديريلي كاش حاجة فيها ؛ علاش انا نأمن فيك ولا ....
خرجت سمية ما حبتش ترجع عليها ...
هند : بنتي ماشي هكذا هي ما غلطتش معاك حتى مرة وحدة وزيد لي فيها اكفيها .....
سلمى : ولي فيا ما اكفينيش مانيش قادرة نشوفها قدامي سمعتي ...
#يتبع 😈
VOUS LISEZ
السحر الملعون " الجزء الثاني تابع لشيطان زوجي "
Horrorحصريا على #🕯chronique-DZ 🕯 🤍#السحر الملعون🤍 #شيطان زوجي 2 #الكاتبة : صونيا #الكوفر : زينب راقد على كرشو يحكي في التليفون والنعاس يدي فيه ماشي قادر يفتح عينيه وصوتها خارج من التليفون: وائل اهدر علاش سكتت وينك .... سمعت شخير عرفت بلي رقد حكمها...
