السحر الملعون " الجزء الثاني تابع لشيطان زوجي "

الحلقة 26

🕯#السحر الملعون🕯
#شيطان زوجي 2
#صونيا
🤍الحلقة 26🤍
****************
وصلو لدارو فتح عليهم دخلهم بالخف حطو في واحد لاشومبر السخانة تاكل فيه ماشي عارفين واش صاريلو.
حسام : ما عرفتش لمن نديه لقينا في ذرعيه هاذ لكتيبة وبدات السخانة تضهر وهو اعيط كيف المهبول ساعدنا غير انت لي تقدر يا شيخ محمود على وجه ربي ...
الشيخ : هاذا راه سحر تعملو غير اليوم وراه يقتل فيه بالشوية منا على سمانة اكملو ...
حسام وائل نخلعو شكون لي قادر ادير فيه هاذ الشيء وقتاه كيفاش مزية زينب ما خلاوهاش تجي سينو تهبل كون تسمع .
وائل: كون تقوللنا شكون لي دارو نقتلو بيديا ..
الشيخ : واحد سممو في الجلد التاعو يا حطلو دوا في كاش حاجة كلاها اما لبس حاجة جديدة خمو شوية واش دار ...
وائل: والو كنا مع بعض ما كلينا مع بعضانا قعدنا الوقت كامل مع بعض ..
راح الشيخ جاب الجمر ودارو مع ماء مرقي خلطو مليح ومدلو يشرب هو يشرب والسخانة تزيد تطلع ومراد اعيط اكثر ...
حسام راك رايح تقتلو هكذا اصبر بالشوية راه كيف ولدي لوكان اموت نقتلك اناااا ..
الشيخ ما شافش حتى فيه كمل في واش راه ادير في نفس الوقت يقرا في القرآن والادعية..
كي كمل الماء كامل مراد هدا خلاص عينيه وفمو نحلو غير اشوف مع السقف مكان حتى حركة رمشت عين رجع يتقيا ؛ ارجع في الدم وكل ما ارجع هاذيك لكتيبة تتمحى من جلدو حتى مع لخر رجع لحمة شوية كبيرة ...
فطن مراد ورجع يتنفس عادي شاف معاهم لقا وائل  وحسام ميتين بالخوف عليه...
وائل تلاح عليه حضنو فرح كي خوه فاق ورجع للحياة ...
الشيخ : الحمد لله  لي قدرت نرجعو شحال من واحد مات بهاذ السحر اروحو للطبيب وما يعرفوش واش عندو كي يلحقو بيه عندي اكون خلاص فات الوقت ...
حسام : سامحني ما كنتش قاصد واش قلت ...
الشيخ: والفت هاذ لكلام يا ولدي مي لازم تعرفو الإنسان لي راه معاكم وقادر يوصللكم بسهولة لازم تعرفو شكون هو هكذا نقدرو نحوسو على المشعوذ او اصل السحر كون تكملو هكذا تموتو بالواحد صح الموت حق مي كي تكون من عند ربي سبحانو..
مدام وصلو ليه يعني انتوما دوركم جاي ...
كي سمع مراد هاذ لكلام جاتو آية في راسو ؛ يعني تكون هيا لا مستحيل هي ثاني ضربوها شفتها هي ثاني تتعذب موحال تكون هي مستحيل.
وائل فرحان لي مراد خرج منها سلامات شوية وجاه ميساج ( كون حبيت تعرف الحقيقة شغل هاذ المسجل ) .
خرج برا وقعد يسمع لقا صوت مراد وهو يحكي على سلمى والعلاقة لي صرات بينهم طاحلو التليفون من يدو تكسر دار شاف مع دار الشيخ ورجع وقال : سلمى خدعتني معاه اه .
ركب في اللوطو وديمارا مخلي بورطابلو موراه...
ديراكت 10 دقايق كان قدام دارهم نزل طبطب الباب خرج بوها...
وائل: انا وائل كنت حايب نجي ونخطب بنتك معليش تعيطلها عندي كلام قدامك تسمعو .
اب سلمى عيطلها حاير كيفاش جا وهاذ الجرأة لي عندو مي كان حايب يفهم واش لي صاري ...
جات سلمى شافاتو فرحت بزاف تحسب فيه جاي يحكي على الخطبة .
سلمى : اهلا وائل وينو باباك ولا جيت وحدك !!؟؟
وائل: انا كنت معاك سيريو وجامي خممت حتى ناذيك حتى شعرة منك تمنيتك حلالي مي نقولهالك قدام باباك المكتوب بينا خلاص وانت ذرك حرة تقدري ديري واش حبيتي دار وخلاهم واقفين ماشي فاهمين حتى حاجة.
باباها دخلها فورصي وهي تعيط على وائل: واش درت انا حتى نستاهل هاذ الشيء قول حرام عليك ...
حكمها باباها ضربها ودخلها ...
اب سلمى : بهدلتي بيا تعيطي قدام الجيران و زيد هاذا لي ماشي مربي واش خصو اه حتى يحكي هكذا وروح تفوووووه على التربية تاعك خلاها مرمية في لرض الد.م في فمها تبكي ...
راحت عيطتلو مغلوق بعثتلو ميساج تقول فيه : اذا انت تخليت عليا انا نسمح في حياتي يا انت يا الموت لي تديني ...
وائل رجع عند مراد قعد حذاه كي شاف باباه خرج مع هاذاك الشيخ هبط راسو وقال : علابالي بكلشي حتى اسمها آية وعلابالي ..
شاف معاه مراد لقاه وجهو متقلب مي ضحكة مستفزة في وجهو ..
مراد : كنت حايب نقولك مي شفتك كيفاش تحبها ما بغيتش نفسدها عليك خويا ...
وائل: انت كنت فحل وراجل كي بعدت مين عرفت الحقيقة مي كون جيت وقلت انا ندبر راسي مي ذرك صايي كلشي كمل بينا .
مراد هبط راسو وشاف بلي بورطابلو مكسر وكانش حايب اقولو كيفاش عرفت خلى كلشي هكذا احسن ...
*********
فاتو ايامات ومراد رجع كيف كان جسمو رتاح؛ عندو شحال ما خرجش .
سلمى قعدت غير تعيطلو وهو ما ارجعش بعثت شحال من ميساج تهدد بلي تقتل روحها مي والو شعرة ما تحركت فيه حتى وائل بدل النيميرو الفايس كلشي بدلو هكذا موحال ديرونجيه ....
مراد ناض يدوش كي خرج لقا ميساج ؛ فتحو لقا صورة تاع سلمى مرمية على لرض ودوا في كل مكان ؛ ميساج مكتوب فيه ( قولو انت لي قتلتها انت لي سمحت فيها موحال نسامحكم تخلصوها عند ربي راهي بين لحياة والموت )
مراد هبط يجري عند وائل حتى قشو ما لبسوش مدلو البورطابل وقالو شوف .
وائل تخطف من بلاصتو ناض : دارتها الكل.بة بنت الكل.ب
#يتبع 😈