السحر الملعون " الجزء الثاني تابع لشيطان زوجي "

الحلقة 88

🕯السحر الملعون 🕯
#شيطان زوجي 2
#صونيا
🤍الحلقة 88🤍
******************
قرب ليه وطارق يرجع لور ؛ خايف منو خايف كشما اكون من هاذوك الناس ....
طارق بصوت يرجف : حبس أوقف ما كان لاه تزيد تقرب مني سمعت ...
الراجل : يا ولدي انا هو راني مزالني حي صح درت قالب وقتلو واحد راح في الجرة وكامل حسبوني متت حتى انهم دفنوه في قبر منسي بلا شاهد ولا اسم خافو عليا ؛ حتى عايلتي ماهمش عارفين بلي مزالني حي ....
طارق : مستحيل لا تكون انت ؛ قتلوك ودفنوك حتى انو واحد ما علابالو بقبرك هكذا كان في بالي ...
سور انت تتمثلي وجيت تنتاقم مني ...
الراجل هز موس جبدو من حزامو قرب من طارق لي قاعد يرجع لور والخوف باين على وجهو ...
الراجل : شوف بلي انا لجم وشحم...
جرح كف يدو وسال منها الد.م ...
طارق: كيفاش كيفاش مزالك حي كيفاش هربت للشرطة قول ....
الراجل : باش اكون في علمك انا لي خبرت الشرطة على بلاصت حسام ذاك الوقت كنت ديجا وصلت لشيء لي بغيتو ؛ ولي قتلوه كان مساعدي ؛ تخبيت وقلت ذرك ولدي افيق مع نفسو م الأسف زاد راح معاهم وكلفاتو زوج اولاد .....
طارق : شوف حل وذنيك مليح ممكن اني نسامح ولدك مي انت مستحيل نسامحك كلشي لي صرا انت سبابو انت لي درت السحر انت لي خليت الشيطان يقتل هاذ الناس كامل أو زيد خطفت حسام....
الراجل : بيني وبين حسام كانت أمور شخصية ما عندها حتى علاقة مع السحر والشعوذة ؛ كنت حايب ننتاقم من موت بنتي فهمت ؛ بنتي قتلت روحها وحسام كان السبب في موتها ؛ الحقد عمالي عينيا خليتك انت تجيبهولي وانا درت الباقي في بالك شكون كان أوري لقبر لحسام شكون كان اخليه اشوف مكانو باش توصلو ليه .....
طارق : يا سي حواس حسام مات من اورى هاذ لقبر يعني قتلتو ؛ او قولي شكون هاذي بنتك لي ماتت اه وعلاش حسام هو سبابها ....
اه ما تقوليش هاذيك بنتك يا ربي واش هاذ الحالة لي رانا فيها كيفاش بنتك موحال لا تكون بنتك ....
قعد على لرض رجع كلو تراب مشوكي من واش سمع ذرك بدا يفهم الأمور لي كانت مخلطة في راسو .....
سي حواس : شوف انا تبت لربي وندمت على واش عملت اصلا نهار جاتني جداتو كنت صغير ما كنتش نعرف واش نعمل كنت نتعلم غلطت وربطت السحر بشيطان وعجبتني القوة لي كنت انا فيها مي من بعد كل مرة كان يطلب اكثر.
كلن احب ادير الشر ؛ كان احب السحر يتمادى في العايلة اكثر وانا كنت نعمل واش كان اقول ؛ ماشي نحكي باش نبرر واش عملت لا راني نفهم فيك واش صرالي.
نهار لي حسام كان مربوط قدامي كنت معمي ماشي مصدق انو هو لي خلى بنتي تقتل روحها ...
جربت فيه كل أنواع التعذيب حتر لي ما تجيش على بالك ....
وفي ليلة مافيها قمر كنت قاعد تشلو يديا في زوج ما قدرتش نتحرك شفتها واقفة قدامي فمها مخيط تبكي وصبعها عند حسام درت شفت فيه غاضني نزلت بليس وقررت انو نخليه اروح لدارو ...
طارق : هي كان عنبالها بلي انت باباها ....
هي ثاني مثلت دورها مليح بزاف عرفت تكذب علينا انا و هو ...
سي حواس : لا يا ولدي ما كانش علابالها بيا قالولها بلي باباها مات وخي صغيرة ؛ نهار دخلت لدارهم قلبي وجعني ؛ بنتي كبرت بلا بيا درت هاذ الشيء باش نحميها مع لخر قتلت روحها على جال حسام ؛ ما قدرتش نتحمل الشيء لي صرا ؛ انعزلت طول هاذ المدة تخبيت تبت لربي سبحانو ...
طارق : واش تحب ذرك انت واش الهدف تاعك كي وليت قول ....
سي حواس : هاذ السحر مستحيل تقدرو تفكوه بلا بيا باش اكون في علمك اذا انا صح متت وشبعت موت يعني صايي موحال ينفك وتقعد اللعنة تبع فيكم وفي أولادكم ليوم الدين ...
حايب نشوف اولاد احفيدتي فهمت ماشي نشرط عليك هاذا طلب برك اصلا عاهدت ربي اني نعاونكم.
طارق حن قلبو بعد ما سمع كلامو اصلا هو جدهم لكبير مي كيفاش يقنع لخرين بهاذ لكلام كيفاش اقولهم انو هاذا اكون باباها ؛ هند غير تسمع بهاذ الشيء تموت موحال تقدر تسامحو ...
طارق: لازم نقنعهم ولا نقولك خلي نهد مع وائل هو راه كيف حسام يمشي بعقلو ماشي بمشاعرو مي نهار تسمع هند شكون انت وشكون بنتك رايحة تقوم القيامة عليك وراني متأكد منها ....
سي حواس : وانا راني واجد ومتقبل اي حاجة رايحة تصرالي ......
#يتبع 😈