🕯السحر الملعون 🕯
#شيطان زوجي 2
#صونيا
🤍الحلقة 44 🤍
**************
من لي توفات يماها وهي غالقة باب الشومبرة عليها ما تحب تقابل حد ولا تحكي مع حد .....
زينب كيف حسام خسرو الورقة الاخيرة تاعهم حسو رواحهم وكأنهم وحدهم في هاذ الدنيا ...
غرباء في وسط أهلهم ماشي قادرين يتنفسو وامهم تحت التراب راقدة ...
طارق من وا الباب : حبيبتي على وجه ربي افتحي هكذا بزاف ذرك تمرضي.....
ساكتة وماشي حابة تجاوبو ...
طارق : توحشتك وتوحشت ضحكتك صدقيني زينب....
جا مراد وحاول يحكي معاها : ماما ميسون رايحة تجي تفطر معانا ياك قلتي بلي تحبيها وهي حبت تشوفك ....
زينب : ما درت والو لغدا كيفاش تقولها ارواحي فتحت الباب وراحت تجري دير حاجة لغدا....
مراد وطارق ضحكو ...
مراد راح عيط لميسون باش اقولها واش دار لازم تجي الله غالب كان الحل الوحيد باش تخرج من الشيء لي راهي فيه ...
ميسون : مي كون خبرتني من قبل ما نقدرش نجي ذرك ...
مراد : تعيشي ماما على خاطرك انت خرجت من البيت اتخيلي تعرف ماكيش جاية والله كشما يصرا فيها حاجة ...
خمت وقاتلو : اكي نجي وباباك راه ثمة ...
مراد : رايح عند عمو حسام عيطلو ...
فرحت ميسون : اكي نلبس ونجي ....
مراد قال لباباه بلي راهي جاية ونفس الوقت حسام عيطلو ...
طارق: راني خارج ذرك ...
حسام : ماشي ذرك اصبر حتى من بعد خلي نفري واحد الأمر ونقولك ...
طارق شاف مع مراد : مالة كتبلي ربي نتعرف عليها اليوم ميسون هاذي ههههه
وجدو كلشي مع زينب كل واحد دار حاجة لحقت ميسون وفي يدها قاطو ....
دخلها مراد لصالو قعدت تستنى في زينب تجي حتى شافت طارق جايب معاه طباسا وداخل غير شافاتو نخلعت ...
وقف شاف معاها وقال : انت انت وين شايفك ....
مع هاذ لكلام رجع مراد وسمعو ...
مراد : ياك وريتهالك في الفوطو نسيت بابا....
طارق : ايه صح صاي كبرت انت يا ولدي ....
قعدو كامل وجدو الطابلة جات زينب وبداو ياكلو ....
زينب : اه نسيت لهريسة دقيقة ونرجع ...
ناضت زينب طارق شاف في مراد وقالو : الحق يماك نعرفها ذرك طول ....
راح مراد مور يماه اعاونها ...
طارق : انت لي جابك جدك عندي انا موحال ننسى وجه شفتو من قبل ...
ميسون : وين هاذا انا اول مرة نشوفك عمو ...
قرب منها شدها من رقبتها ...
مراد : شوفي لعبي لعبك بعيد قتلك انت بنتو ولا حفيدتو واش وصلك عند ولدي علاش راكي مور العايلة تاعي احكي ....
خافت منو ميسون ورجعت لور ..
سمع طارق زينب ومراد جاين يحكو رجع لبلاصتو وقعد ...
مراد : صايي جبتها كون ماشي انا موحال تجي ذرك ....
قعدو يضحكو وميسون ما قدرتش تاكل حتى حاجة...
زينب : بنتي مالك واقيل حشمناك ...
ميسون : لا خالتي كليت اصلا ما ناكلش بزاف انا ...
طارق : خلوها على راحتها اصلا مزال باش نتعرفو عليها مدام عحبت لولدي لازم نعرف كل كبيرة وصغيرة عليها ...
ضحكت ميسون ضحكة صفرة وقالت : انا كيف اي بنت من عايلة متوسطة المستوى قارية ما بقاليش نتخرج ...
طارق قطع كلامها: شكون باباك وين تسكني وينها عايلتك كون تحكي ماشي خيرلك ...
زينب : طارق احشم واش هاذا ماشي هكذا نتعاملو مع ضيافنا عيب مالك هكذا ...
ناض وخبط عليهم الطابلة ...
طارق : كون تعرفي هاذي شكون موحال تعاودي دخليها لدارك ...
مراد: بابا واش بيك علاش تعرفها قول ...
طارق شاف فيه : هاذي يا سي مراد يل ولدي بنت هاذاك المشعوذ لي من جرتو اللعنة راهي دور علينا كلنا ....
مراد دار ليها : صح واش راه اقول ميسون احكي ...
ميسون بدات تبكي: لا اول مرة نشوف والله ما نعرفو ممكن خربط بيني وبين وحدة خرى اصلا ياك قتلي راه مريض في عقلو ....
دارت ليها زينب : موحال طارق اخربط اذا قال بلي يعرفك معناها يعرفك ....
قولي انت صح بنتو صافي جيتي لينا بالذمة اه وانت سباب كامل المشاكل لي جاتنا ؛ انت سباب موت يما ؛ .....
قربت ليها وكانت حابة تضرب ميسون حتى دخل بينهم مراد....
خرجت ميسون تجري من عندهم ماشي قادرة تتنفس ؛ مراد من الشوك قعد على لرض ماشي مصدق الشيء لي صرا ...
طارق : لازم نقول كلشي لحسام لازم نلقاوها هكذا نعرفو واش راهي مخبية علينا هاذ الطفلة .....
طارق عيط لحسام وخرج من الدار ؛ اما زينب شدت ولدها لي وجهو متبدل ماشي فاهم الشيء لي صرالو ؛ وعلاش كل ما تعجبو وحدة تخرج أحقر من لي قبلها ....
ناض وخرج مخلي زينب متحسرة عليه وخايفة كشما اديرلها ....
مراد جبد تليفون تاعو وبعثلها ميساج : (نحب نعرف كل الحقيقة ولا صدقيني تندمي على النهار لي عرفتيني فيه ) .....
#يتبع 😈
VOUS LISEZ
السحر الملعون " الجزء الثاني تابع لشيطان زوجي "
Horrorحصريا على #🕯chronique-DZ 🕯 🤍#السحر الملعون🤍 #شيطان زوجي 2 #الكاتبة : صونيا #الكوفر : زينب راقد على كرشو يحكي في التليفون والنعاس يدي فيه ماشي قادر يفتح عينيه وصوتها خارج من التليفون: وائل اهدر علاش سكتت وينك .... سمعت شخير عرفت بلي رقد حكمها...
