السحر الملعون " الجزء الثاني تابع لشيطان زوجي "

الحلقة 82

🕯السحر الملعون 🕯
#شيطان زوجي 2
#صونيا
🤍الحلقة 82🤍
********************
خرج لبرا وقعد اعيط على طول صوتو ويبكي على التوأم لي ماتو في نفس النهار؛ زوج اولادو رايح احطهم في حفرة باردة تحت تراب ...
اب ميسون قلبو تقسم ماشي قادر أصدق بلي ماتو ...
يبكي ويحكي بصوت قاوي: علاش ديتلي أولادي؛ درت كلشي واش طلبت مني حتى اني جبتلك حسام عند لبلاصة لي حبيتها علاش ديتلي أولادي علاش هكذا ....
قعد يخبط في شجرة بيدو حتى ساح منها الد.م ...
دار لقا طارق واقف من وراه سمع كلشي واش قال ؛ تلاح عليه طارق وقعد يضرب فيه بكل قوتو وقول : انت سباب موت خويا يا حقي.ر انت سباب موت بنتي خلات زوج اولاد ...
يبكي ويضرب فيه حتى لحق عليه مراد وشدو جبدو من فوقو ....
مراد : واش معناه كلامك بابا قول كيفاش هاذا هو سباب موت خوك وبنتك احكي قول ...
دار شاف في نسيبو وجهو كامل مجروح ومشوه من كثرة الضرب ..
اب ميسون: ماتت بنتي مات ولدي داري خلات ؛ كان واعندي اذا نسلملو حسام اخلي أولادي في حالهم درت هاذ الشيء باش أولادي اعيشو ....
ورجع يبكي بالصوت ....
مراد ماشي مستوعب كلامو قرب من باباه شاف معاه ؛ طارق هبط راسو ماشي قادر اقولو بلي كامل ماتو اليوم واش من فم لي يقدر اخرج كلام  كيف هاذا ...
مراد قعد يتمشى مخليهم وراه حالتو صعيبة بزاف حاس روحو يغرق في بحر وهو يتمشى على رجليه ...
مع دخل شاف الطبيب لي يعرف يماه قرب منو بالشوية ...
الطبيب: اصبر يا ولدي قدر الله وماشاء فعل ربي يرحمهم علابالي ضربة كبيرة ثلاث عباد في فرد وقت والله لا صعيبة ....
مراد غير اشوف فيه وفي لحظة مد يديه وحكمو من عنقو: وانت وين كنت علاش ما ساعدتهمش علاش خليتو ام أولادي تموت قول علاش خليتو عمي حسام اموت ؛ راني هنا زيدو اقتلوني اناااا راني متمني الكوت انا ثاني علاش ....
الطبيب احاول اهدي فيه والو ما حبش يهدى تلاحو لاسيكوريتي شدوه ودخلوه لواحد الغرفه اعصابو ماشي متحملة كامل ....
الطبيب: كتفوه في السرير الخبر جاه صدمة كبيرة ذرك نمدلو دوا يرقد مكانش حل اخر للأسف...
كل واحد في صدمتو ؛ هند ؛ زينب ؛ مراد ...
وائل قاعد مع يماه ما قدرش حتى يبكي على باباه لي راح ؛ قاعد معاها خايف عليها من الشوك لي صرالها والضربة لي على راسها ...
زينب في غرفة وحدها ؛ مراد كيف كيف وحدو ؛ اما طارق راه كيف الشجرة لي هب عليها ريح قاوية مكسر من كل جيهة ؛ منا فقد خوه لي الدنيا عطاتهالو ومن جيهة خرى فقد بنتو لي كانت كيف الدوا على الجرح ليه ولعايلتو ...
ثلاث عايلات دمرت على الآخر بسبة سحر ملعون ؛ بسبة جهل الجدة لؤ كانت متمسكة بالعادات والتقاليد تاعها ؛ جيل بعد جيل خلصو الشيء لي هي دتراتو مع المشعوذ لي في قلبو لا رحمة ولا حتى ذرة من الإيمان....
****************
فاتت ذيك الليلة طارق و وائل ما غمضوش عينيهم ؛ سلمى قاعدة في الدار مع لولاد تبكي على لي ماتو ماشي مصدقة لخبر لي قالها عليه وائل...
هند ؛ زينب؛ مراد راقدو الليل كامل تحت تأثير الدوا ....
دخل الطبيب عند وائل؛ خزر معاه وطلب منو يخرجو برا ....
الطبيب: كنت عارف بلي باباك عندو ورم في الرأس...
وائل: كيفاش هاذي ورم في الرأس جامي قالنا هاذ لكلام قال بلي مريض بالقلب برك ...
الطبيب: كنت متأكد بلي ما قالكمش الورم كبار بزاف يعني حتى وان ما صراتلوش سكتة قلبية مستحيل كان اكمل هاذ الشهر ؛ هو رفض كل أنواع العلاج قال حايب عايلتي تقعد تتفكرني بهاذ الصورة ماشي تشوفني ضعيف ومهزوم؛ وفي الاخير يا بني الموت حق علينا كامل والواحد ماشي عارف كيف رايح تكون النهاية تاعو ....
انت راك وريث حسام يعني رايح اسمو اعيش معاكم للأبد صدقني ...
وائل طاحو دموعو شاف معاه وقال : صدقني كنت حايب نقولو يسحملي؛ كنت حايب يعرف بلي نحبو بزاف بزاف وموحال فضلت عليه أي واحد في حياتي ؛ هو وماما هوما لولين في حياتي حتى أولادي ما نقدرش نفضلهم على والديا ....
الطبيب: انا حكيت معاه بزاف حسام كان كي يحكي عليك عينيه يلمعو نحسو فخور بيك وانت كلشي في حياتو وصدقني راه يعرف قيمتو عندك ؛ شحال من مرة اقولي ولدي حاطني في عينيه ....
هز يدو وحطها على كتف وائل.
الطبيب: انا نوصيك على لي مزالت حية يماك يا ولدي لازم تقعد معاها وتنطهلى فيها هي لي رايحة تنضر بزاف على فراقو ؛ انا نعرف كلشي عليهم وصدقني الايام الجاية رايحة تكون بزاف صعيبة عليها ....
مزالو يحكو حتى شافو مراد خرج من لاشومبر الد.م في ذراعو بويسك نحى الكاتيتاغ من ذراعو ...
غير شافهم قعد اعيط...
مراد: حبيت نشوفها ذرك ادوني ليها ميسون وينك حطوك في كونجيلاتور يا عمري ...
طاح على ركايبو وقعد اعيط ويبكي على موتها ماشي متحمل كامل هاذ لخبر موحال كان أصدق بلي رايحة تخليه بهاذ الطريقة ....
#يتبع 😈