السحر الملعون " الجزء الثاني تابع لشيطان زوجي "

الحلقة 46/47

🕯السحر الملعون 🕯
#شيطان زوجي 2
#صونيا
🤍الحلقة 46🤍
**************
قاعدين يستنو فيهم يلحقو .... وائل اعيطلو وعاود ؛ تليفون مغلوق ...
هند حايرة من لي كانو فرحانين رجعو كامل مقلقين عليهم ...
لحق واحد كان معاهم في الكورتاج هو ثاني كان متأخر غير ما دخل وبلا سلام ولا والو ...
عاطف : راهم دارو اكسيدو كبيرة وجات لومبيلونس والشرطة الحالة مقلبة داوهم لسبيطار لكبير ؛ ما نعرف لا ماتو ولا عايشين ما خالاونيش نفوت ليهم ....
وائل: على من راك تحكي ....
كامل تهولو ؛ناضو من بلايصهم ....
عاطف : نحكي على مراد ولي كانت معاه دارو اكسيدو كبيرة وتخلطت مع 3 طونوبيلات والله الحالة كارثة ربي يسطر ...
خرج وائل يجري بلا حتى ما شاف موراه ؛ مراد ماشي غير صاحبو ولا ولد خالتو ؛ مراد خوه لي الدنيا ولداتو ....
هند ماتت الف موتة كي سمعت هاذ لكلام رفدها حسام من يدها شاف معاها وقال : هايا مكان لاه تستني هنا ....
سمية : حتى انا نجي ما نقدرش نصبر ...
من لي كانو دايرين كرتاج للبيتزيريا يتعشو رجعو دايرين كرتاج لسبيطار نقلب العرس والفرح لجحيم ....
وصل وائل هو لول كان كيف المهبول احوس عليهم حتى شدوه وراولو الطابق طلع يجري وصل لقا زوج واقفين .
وائل : نحوس على زينب طبيبة تخدم هنا دارت اكسيدو هي ولدها .
فرملية : اه ولدها راه في غرفة العمليات والطبيبة راهي هنا وانت شكون ...
بلا ما رجع عليها دزها ودخل ليها لقاها معمرة د.م راقدة ماشي واعية للحالة لي راهي فيها ...
تقدم ليها...
وائل: خالتي راكي مليحة خالتي ...
فتحت عينيها ..
زينب: مراد وينو مراد علابالي ماشي مليح وينو...
وائل: راه مليح ما تخافيش ان شاءالله اكون مليح...
سيات تنوض مي ما قدرتش شدها وائل وقعد اعنق فيها وهي تبكي بحرقة على وليدها ....
زينب : شفتو الطونوبيل كانت تلعب بيه وهو اقول مالها واش بيها تلعب هكذا حتى سمعنا ترطيقة ودخان طلع ما فقناش لقيت لروحي معمرة دم ومراد مرمي على برا وحاجة داخلة في كرشو راني خايفة اموت يا وائل اروح وخليني ولدي فرد واحد يا ربي كون مات اديني معاه لاش تخليني نتحرق بعدو....
وائل قلبو تقسم من كلامها ؛ وهوما على هاذ الحالة دخلو عليهم هند وحسام اما الباقي قعدو برا يستنو ....
حسام مشوكي من منظر زينب كيفاش كلها د.م ...
هند قربت ليها بالشوية وترعش ماشي قادرة حتى توشيها....
زينب مدت يدها لختها وقعدو يبكو في زوج حتى لكلام ماشي قادرين يحكو ...
خرج وائل مع حسام على برا وسمية غير شافت وائل راحت تجري عندو ...
سمية : كيفاش حالتهم ان شاءالله اكونو ملاح ...
هبط راسو وائل؛ فهمت بلي الحالة ماشي مليحة...
قاعدين يستنو كامل نساو طارق واحد ما سقسى عليه شافت سمية وقالت : وعمو طارق كان معاهم ولا لالا ...
حسام خزر في وائل وعاود رجع عند زينب ....
حسام : وينو طارق قولي ...
هبطت راسها وقالت : طارق كان معانا كان قاعد قدام مع مراد كي فتحت عينيا ما لقيتوش مانيش عارفة وينو ....
خرج وقاعد احوس عليه وين داوه واش خبارو حتى جاهم الطبيب ....
طبيب : يا جماعة بالشوية من فضلكم ؛ كاين مراد راه في حالة خطيرة تقاست الكلية تاعو ولازم نلقاولو وحدة في أسرع وقت ممكن .
اما على طارق عندو نزيف داخلي حالتو حرجة بزاف بزاف راه ثاني مع العملية نديرو لي نقدرو عليه ..
زينب مليحة عندها عدة كسور مي مكانش حاجة خطيرة ؛ نطلبو من الله يسترهم لي راهم اعانو ....
في ثانية تقلبت الحالة كامل يبكو من الشوك كانو فرحانين ....
جات الشرطة تستجوب فيهم ...
حسام : ياك قالو اكسيدو ماشي بلعاني ...
الشرطي : لقينا الزجاج في خزان البنزين مما أدى إلى الزيت تفرزع على الموتور وتفلق؛ يعني كاين واحد دارها احبهم اموتو....
حسام جا تفكيرو ديراكت في ميسون كي عاد طارق كشفها ...
الشرطي : كشما عندهم أعداء ولا راهم متخاصمين مع كاش انسان...
حسام : لالا ما كان حتى واحد متخاصم معاهم ان شاءالله افوتو هاذ المحنة ويرجعو بخير وهوما اقولولك بلي ما عندهم حتى مشكل مع واحد ....
*****************
قاعدة تتفرج حتى شافت لخبر في التلفزيون ماشي مصدقة انو مراد توفى ولا كشما صرالو ...
ما لقات لمن تعيط تشجعت وهزت تليفونها وعيطت وائل...
شافو نيميرو تاعها جبد وحدو وهز ....
وائل: كيفاش عطاك قلبك ديريلو هكذا وانا كنت حاسبك تحبيه تاه الصح ....
تبكي وماشي قادرة تحكي ...
وائل: ميسون انت لي درتيها ياك حرام عليك واش عملك مراد كان يبغيك وديما يحكي عليك حتى نهار تكشفتي قالي موحال اكون عندها سبب لي خلاها ما تحكيليش....
ميسون تشجعت وقالت : والله ما انا ؛ كون نلقى نمدلو روحي باش اعيش وائل اعطيني خبرو وين راكم ....
وائل: قالو لازملو كلية رايحين كامل نديرو لي زاناليز نشوفو شكون يتجشع ويتبرعلو بوحدة ؛ انت موحال تقدري تجي فهمتي والله بابا لا يقتلك وما اسالش عليك ...
ميسون : على وجه ربي من بعد عيطلي وقولي كيفاش حالتو سمعت ....
مابين تقول هاذ لكلام دخل عليها خوها ؛ رجعت تقول اكي وداد من بعد احكيلي كلشي نستناك ....
قطعت عليه ؛ وائل فهم بلي كاين شي مشكل على بيها حكات هكذا ...

🕯السحر الملعون 🕯
#شيطان زوجي 2
#صونيا
🤍تتمة الحلقة 47 🤍
*************
ريان : في بالي وصلك لخبر على بيها راكي هكذا....
ميسون : انت لي عملتها سور علاش هو واش ذنبو....
ريان : نو ماشي انا مي مشكور لي دارها كون نعرفو نمدلو كادو هكذا الشيطان يبعد علينا شوية ....
ميسون : والله حرام الشيء لي صاري فيهم ...
شدها من رقبتها وقال : نسيتي جدي ؛ نسيتي عمي لي مات في بلاصة حسام ؛ نسيتي ختنا لي ماتت في بلاصت وائل؛ وحنا واش ذنبنا قولي ....
ميسون جبدت روحها منو : جدي هو لي دار السحر هو لي ما عرفش بلي رايح ادمرنا كامل من بعدو ....
ريان: ذرك يا حنا يا هوما وانت خيري ......
#يتبع 😈