السحر الملعون " الجزء الثاني تابع لشيطان زوجي "

الحلقة 86

🕯السحر الملعون 🕯
#شيطان زوجي 2
#صونيا
🤍الحلقة 86🤍
********************
قاعد حذا قبرو اهز في التراب ويلعب بيه ؛ الدموع في عينيه...
طارق : تشفا يا صاحبي كي كنا خاوة كنت نخدم معاك وعشقنا نفس لمرا المشكل اني مزالني نعشق فيها ؛ بعدت عليها على خاطرك كي شفت حبك ليها كبير انا تخليت عليها ؛ لقيت الزمان عند زينب صح مي طلعت ختها مؤ صدقني صح مزالني نحبها كيف اول مرة شفتها فيه مي موحال نشوفها اكثر من مرة خويا هاذا وعد مني ؛ الله غالب الحب لي في قلبي ماشي بيدي ما نقدرش نقلعو منو ؛ حاجة خارجة عن سيطرتي يا حسام .
فراقك قتلني خلاني نعيش في دوامة كبيرة ...
راني كل يوم نقعد نرجع بذاكرتي لهاذاك النهار لي خرجت فيها روحك وانت توريلي ذاك لقبر ؛ عييت نتفكر ويناه فيهم كل يوم نروح نقعد غير نشوف ونرجع بلا ما نعرف ويناه فيهم ...
كون غير تقدر تعاوني من وين انت مي علابالي هاذ الشيء مستحيل ؛ انت صايي رحت حتى اني متأكد بلي راني نحكي وحدي كيف المهبول ؛ كون طل عليا زينب ترجعني لذيك المصحة العقلية هههههه ...
مابين مزالو يحكي عند قبرو حس بحاجة نحطت على كتفو شغل يد حط يدو ما لقا والو ....
مي قلبو كان مرتاح حتى وان جسمو كامل زوغب من هاذ الاحساس الغريب ..
طارق : سبحان الله راني حاس شغل راك قريب مني كون غير صح يا ريت تكون قريب واحساسي يطلع صحيح ...
ما كمل كلامو سمع حجر يطايرو من حذاه ناض مخلوع ؛ يعني صح ماهوش وحدو كاين شي واحد حذاه ...
قرأ سورة الفاتحة على قبرو وكيف كل يوم ركب في الطونوبيل وراح لذيك الجبانة وصل لبلاصة وين طاح فيها حسام .
وقف في نفس لبلاصة اشوف ويتفكر اعاود في ذيك اللحظة حتى شافو واقف عند لقبر ومد يدو عندو ؛ طارق ماشي مامن واش راه اشوف حسام واقف عند لقبر يضحك في ضحكة خفيفة ونعتلو في لقبر ...
قرب منو طارق كي قريب يلحق سمع لحمام اطير من اوراه دار شاف مكان والو كيف رجع عند لقبر ما لقا حتى واحد استغرب من الموضوع ؛ قرب اكثر لقاه قبر صغير ما عليه حتى شاهد ولا اسم حار ليمن هاذ لقبر صورو باش ما ينساش بلاصتو جا اخبي بورطابلو صونا في يدو ؛ شاف لقاه الشيخ لي عيطلو ....
طارق: سلام عليكم مرحبا بيك ....
الشيخ : يا ولدي وين ما راك ابعد ؛ ابعد ذرك ما تستنا حتى دقيقة اهرب راني نحكي معاك ...
طارق حس بموجة بطاقة غريبة حذاه ؛ جسمو كامل ترعد طلق التليفون من يدو وراح يجري قلبو يخبط الف في الساعة ....
لحق لطونوبيل طلع وديمارا ديراكت بلا ما اشوف موراه ....
اوصل لدار الشيخ بعد ما دار لافيتاس ما قدرش يتهنى من لكلام لي قالهولو ....
دخلو مرحب بيه ...
الشيخ : الحمد لله على سلامتك كون زدت ثانية وحدة كانو يقتلوك....
طارق : مي شكون هوما علابالك حسيت روحي نغميت قلبي رايح يخرج ؛ حسيت بالخطر حذايا جسمي كامل شغل تخذر والله واحد الاحساس جامي حسيت بيه في حياتي .
الشيخ : ذاك لقبر راه محروص من جنود تاع الشيطان ؛ تبالك كيفاش مات حسام ربي يرحمو؛ كي تعرف على القبر هجموا عليه ضربوه حتى لي مات في بالك اخلوه حي بعد ما شاف لي شافو ...
وانت ثاني لازم تعس روحك مليح مليح وتحصن نفسك منهم حتى نلقاو حل لهاذ لقبر راني في عقابو ؛ ذرك انت الوحيد لي تعرف بلاصتو ؛ ذرك يل ينتاقمو منك ولا من واحد يقربلك راني وصيتك يا بني خلو القرآن ديما ادور في دياركم ...
اه ونسيت مرة المرحوم حسام ماهيش مليحة ماذا بيا تجيبها نرقيها راهي بعدت بزاف على الطريق؛ وصدقت الشيطان بلي هو حسام لي راهي تشوفو ...
طارق : انا شفتو حسام واقف عند لقبر ومد صبعو ليه وراهولي ...
الشيخ : موحال اكون حسام موحال يا اكون القرين تاعو تعرف بلي القرين ما اموتش مع مولاه والا كانت مكيدة منهم باش تقرب من هاذاك لقبر ويقتلوك ؛ سبحان الله مزال عمرك طويل يل بني مي عس روحك ...
طارق : حايب نعرف كيفاش عرفت بلي راني ثمة ...
الشيخ: والله كنت راقد وشفتك في منامي شغل كنت معاك حتى اني حطيت يدي على كتفك وانت كنت تحكي عند قبر المرحوم حسام ...
من بعد شفتك قدام ذاك لقبر وشفت ذاك الشي لي كان متخبي يستنى فيك ...
عشت كلشي معاك كي فقت لقيت الساعة خمس دقايق قبل مل انت تموت قلت نجرب نخبرك بويسك كي نام حوايج هكذا تتحقق من بعدها ....
طارق قعد باهت في هاذ لحكاية ...
الشيخ طلع التريكو على كروشو لقاه مخبوش من فوق لتحت ثلاث خبشات والد.م نازل منو ....
طارق : هاذ الشيء صرالك وانت تحلم !!!!؟؟؟؟؟
الشيخ: انعم ايه ٠يت نعاونك جرحني هاذاك لي كان مستنيك ثمة .....
#يتبع 😈