🕯السحر الملعون 🕯
#شيطان زوجي 2
#صونيا
🤍الحلقة 84🤍
********************
راقدة في فراشها حست واحد قعد عند رجليها ؛ حلت عينيها حسبتها بلي سلمى لي جات ما شافت حتى واحد في لاشمبر ؛ حست بحاجة تتحرك تحت غطاها طلعت لاكوات شافت غير عينين اشوفو فيها ؛ نخلعت ما جات تعيط حاجة شدتها من رجليها ودخلتها تحت لغطا ....
جنة تتخبط وتتخبط؛ حتى طلع صوتها سمعها وائل خرج يجري ليها بالشورط .
دخل لقاها تحت لغطا تتخبط ؛ كي جبدها لقاها مخبشة من وجها كامل لي طراس زورق في رجليها شغل واحد حكمها وعطاها بالضرب ...
وائل: بنتي راني هنا بركي من لعياط جنة حبيبتي...
جنة تشهق وتقول : بابا راهي حابتني حايبة تديني عند ماما هكذا قاتلي وقعدت تجر فيا وانا خفت منها بزاف ...
وائل: شكون هاذي ثاني كل ليلة نفس لحكاية يا بنتي مكان والو هنا شوفي ....
طلعت راسها رجعت توريلو في الشوكة تاع لاشومبر ظلمة بزاف ثمة وقالت : راهي واقفة ثمة بابا وقاتلي بلي جدو راه عندهم ...
شدو البرد في كامل جسمو من كلامها ؛ هزها داها معاه في شومبرتو ...
جنة : وينها ماما علاش ماهيش هنا ...
وائل : راني شوية زعفان منها راهي راقدة مع حسام حبيبتي ما تعمريش راسك....
جنة : حابة نروح عند ماني هند كانت هي لي تحامي عليا مكان تى حاجة توصلني من لي راحت رجعو كل ليلة اجو عندي ؛ بابا علاش ماما ما تحبش ماني علاش خلاتها تروح من عندنا....
وائل شاف معاها مستغرب : احكيلي كلشي لي صرا .
قعدت جة تحكي الشيء لي صرا مع هند وسلمى بادق التفاصيل ؛ وائل رجع ما اشوفش ؛ رقد بنتو وقعد اخمم في حل يرضي يماه ...
طلع النهار شمس مدت نورها على عينيها ؛ جنة فتحتهم لقاتو مكانش ؛ سمعت حسام يبكي خرجت تجري ليه ....
سلمى : واش بيه وجهك جنة شكون عمل فيك هكذا ....
جنة : لعجوزة ..
سلمى شدتها من خدها وقعدت تزير عليها : بركاي من لكذب ياك قتلك لي يكذب اروح لنار علاش ما تفهميش ...
وهي بهاذيك اللحظة دخل وائل لقاها تشد فيها من جدها ...
دارت شافاتو ماتت بالخوف ....
سلمى : اه اه راهي تكذب وقلتلها الكذب حرام يديها ربي لنار ...
جنة تبكي وتقول : مانيش نكذب لعجوزة لي دارتلي هكذا علاش ما تحبيش تصدقيني ...
وائل: بنتي هزي خوك ودخلو تلعبو في البيت راني جاي نروحو عند ماني ....
فرحت جنة هزت خوها وراحت...
سلمى : وائل يماك لازملها طبيب نفساني حالتها ماشي مليحة كامل ....
قرب ليها وجهو في وجها وقال : انت طالق ؛ طالق ؛ طالق .
هاذ الدار تبقي فيها انت ولدك حاجة ما تخصكم اما جنة تروح عند جداتها ويا ويلك تقربي منهم نقسم بربي ندفنك وانت حية فهمتي ...
سلمى شداتو من ذراعو الدموع في عينيها: علاش يا وائل علاش طلقتني واش عملتلك انا قول ....
وائل: كنت ديما نقولك والديا خط احمر كنت عملت فيك بزاف حوايج مي ديما كان حبي ليك يمنعني اني ننطق بهاذ الكلمة مي توصل بيك تمسيلي ميمتي غير هاذي لي موحال نقبلها انا على خاطرها لؤ انت مزالك هنا لليوم كانت دافع عليك كل وقت كانت تحبك كيف بنتها مي انت قليلت الأصل نشوفك قربتي منها والله نقتلك راني قتلك...
راح عند لولاد لبسهم وخرج باش يديهم عند جداتهم...
سلمى : ولدي مستحيل تديه خليه معايا ...
شدها من رقبتها قدام لولاد : اقعدي عاقلة نديه اشوف جداتو ونرجعو اما اذا تحوسي تفهمي نخليه ثمة هي تربيه احسن منك الف مرة ....
قربت جنة حطت يدها على يدو وعينيها كلهم دموع ...
جنة : بابا اطلق ماما مسكينة ...
طلقها دار لبنتو: هايا بنتي ماني سور متوحشتكم......
سلمى رجعت ما تشوفش كيفاش هاذي أطلقها كيفاش ؛ بعد ما عملت كلشي وجابتلو طفل طلقها قعدت دور في الدار كيف المهبولة ...
سمعت صوت جاي من بيت جنة قال : انا عندي حل اذا تقبلي نديرو صفقة مع بعض ...😱😈
#يتبع 😈
VOUS LISEZ
السحر الملعون " الجزء الثاني تابع لشيطان زوجي "
Horrorحصريا على #🕯chronique-DZ 🕯 🤍#السحر الملعون🤍 #شيطان زوجي 2 #الكاتبة : صونيا #الكوفر : زينب راقد على كرشو يحكي في التليفون والنعاس يدي فيه ماشي قادر يفتح عينيه وصوتها خارج من التليفون: وائل اهدر علاش سكتت وينك .... سمعت شخير عرفت بلي رقد حكمها...
