السحر الملعون " الجزء الثاني تابع لشيطان زوجي "

الحلقة 66

🕯السحر الملعون 🕯
#شيطان زوجي 2
#صونيا
🤍الحلقة 66🤍
.
********************
واقف قدام قبرها راسو مخيط وداير بونصمو عليه؛ كامل راحو قعد غير هو .
وائل: من نهار متي ما قدرتش ندخل لدار بلا بيك ؛ ما قدرتش نرقد في فراشنا ؛ ما قدرتش نتنفس بلا بيك يا عمري ؛ من هاذ اللحضة لازم نعيش لجنة نبدل الدار كلشي على جالها موحال نخلي حاجة تقيسها؛ هي أمانة منك يا عمري......
هبط على ركايبو هز التراب تاع قبرها بين يديه والدموع اطيحو ....
نوعدك بلي نحافظ عليها أكثر من عينيا .....
جا اروح سمع صوتها ....
سمية : تعرف بلي نحبك اما لازم تعيش حياتك نتلاقو كي ربي يدي امانتو ....
غير ما سمعها رجع احوس عليها في الجبانة يحسب فيها راهي ثمة  .....
رجع مراد لقاه احوس كيف المهبول...
مراد : هايا خويا ماشي مليح تريح وحدك هنا ....
وائل: سمعتها تحكي معايا والله سمعتها ....
مراد: ايه معليش راك ماشي مليح هايا تروبوزي وتشوف بنتك .....
راح معاه يمشي ودور موراه شاف خيال وحدة واقف عند قبرها لابسة غوب بيضة وتشوف معاه وتضحك ....
حبس شاف معاها مليح وكمل يمشي.....
مع وصل لدار ما قدرش يدخل رجع من لي جا راح احوس على دار باش يسكن فيها مع سلمى والطفلة؛ ما قدرش اعاود اعيش وين كانت هي ......
حوس في لي انونص لقا ابارتومو f3  طلع ديراكت عند صاحبها تفاهم معاه ؛ حتى انو قالو اليوم يدخل فيها اما صاحب لابارتومو قالو مدلي وقت باش توجد ؛ وائل ما بغاش دا لمفاتح وقالو : ما تخممش انا ندير كلشي ...
خرج راح جاب خدامة في ضرف 5 ساعات رجع لابارتومو يشعل كلشي واجد لاشومبر تاعو تاع بنتو كلشي كيف ما حب هو ....
راح عند يماه قعد في الجنان ....
وائل مهبط راسو ماشي قادر حتى احط عينو في عينها ...
وائل: يما اليوم رايح لداري ....
هند مشوكية من كلامو شدت يدو وقالت : واش من دار يا ولدي راك في دارك اصلا هاذ الشيء كامل تاعك ؛ علاش راك هكذا يا ولدي واش بيك ......
وائل: يا ماما وين ما ندور نشوفها راهي قدامي ما نقدرش نقعد هنا صدقيني كون نريح نهبل ....
ناض عيط لسلمى خرجت والبيبي في يديها ....
سلم على رأس يماه وخرج معاهم.
قعدت تبكي على وليدها لي هز دارو وخلاها وحدها في هاذ الدار لكبيرة ؛ عمرها كامل وهي حسام يخدمو عليه كبروه من بعد راح وخلاهم وحدهم .
دخل حسام لقاها في حالة نخلع عليها رجع احاول فيها باش تحكي وتخبرو....
هند : وائل دا سلمى وجنة وراح قالي ما نقدرش نعيش هنا ....
حسام قعد اشوف بالدوبل شاف كلشي كحل في عين رجع لور وطاح دايخ....
هند ماتت بالخوف وعيطت لوائل ما ارجعش رجعت عيطت لمراد لي كان راقد خرج ليهم لقاه في لرض ما يتحركش.....
هزوه راحو يجرو بيه لطبيب ...
في الطريق فاق حسام وقال : ما بيا والو رجعوني لدار ...
مراد ما بغاش يسمع كلامو ؛ حسام زعف ورجع اعيط عليه ..
حسام : كي نقولك رجعني يعني ترجعني فهمت .....
مراد رجع من الطريق لي جا منها ...
مع دخلو لدار شاف معاهم وقالهم : عندي كلام لازم تعرفوه .....
هند غير تشوف؛ ترجف من الخوف عليه
....
شدها ليه وضمها ....
حسام : ملي ماتت يما زليخة ربي يرحمها مرضت بقلبي وراني مع الدوا لليوم ما كنتش حايب تعرفو مي ذرك لازم تعرفو .....
هند : كيفاش هاذا مرض القلب اه راك سور قول ....
حسام : ايه زينب تعرف انا خليتها تحلف ما تقولش ....
مراد هبط راسو ما لقاش واش اقول ......
حسام: ماشي مرض صعيب راهم بزاف مراض بيه او عايشين عادي ....
هند ساكتة غير تشوف معاه ماشي قادرة تتخيل انو ممكن في اي لحضة اروح من حياتها ....
حبسلها النفس ماشي قادرة حتى تنطق ؛ قرب منها وقالها : ما تخافيش مزالني هنا نوجعلك راسك عمري .....
ضحكت هند وعنقاتو ....
مراد : انا نخليكم حايب نروح نرتاح ربي يشفيك عمو حسام ....
حسام : سامحني يا ولدي ماكانش قصدي نعيط عليك كنت مجبور سامحني ....
ضحك مراد: راك في عرض بابا موحال نزعف منك ....
خلاهم وطلع لبيتو شد بورطابلو وبعث ميساج وائل:(باباك راه مريض ماشي عفسة ديرها تخليهم وحدهم في هاذ الدار لكبيرة وتروح ؛ تاع الصح طحت من عيني وائل ).
حسام طلع ثاني يرتاح مع حط راسو جاه ديراكت خيال في وجهو قالو : شفت كنت رايح نديه يعني في اي لحضة ودعو ههههههههههه .....
حسام بصوت يرجف : اديني انا راني قابل خلي وليدي مع بنتو ....
#يتبع 😈