🕯السحر الملعون 🕯
#شيطان زوجي 2
#صونيا
🤍الحلقة 29🤍
**************
غاضبة منو ماشي مصدقة كيفاش تعامل معاها في سبيطار دارت شافت فيه حالة عينيها ..
هند : كاش واحد يرضى بالشيء لي انت رضيت بيه قول وديجا انا هاذي سلمى موحال نقبل بيها اذا دارت هاذ الشيء معناها قادرة على كلشي يا لطيف.
وائل: يا ماما يا حبيبتي انا رضيت ماشي ناقصنا مشاكل وسلمى نحبها ودارت هكذا بويسك انا قلتلها خلاص ..
هند : معناها شفت حاجة خاطية على بيها قلتلها خلاص وائل خمم مليح هاذا مستقبل يا ولدي ماشي لعب..
وائل: انا قررت صايي موحال روحها تقعد معلقة في رقبتي فهمتي ...
خلاها واقفة وراح هند جنت منو قريب تندب ...
زينب : خليه هند اصلا كون حنا في بلاصتو موحال نسمعو لكلام ...
هند عندي هدرة نقولها وممكن تزعفي مني ختي ...
هند : غير قولي مكانش حاجة تزعفني كثر من لي صرا اليوم ...
زينب: تعرفي مراد شاف باباه خطرة برك في حياتو مي اليوم جاتني دعوة باباه حايب اشوفو مراد ثاني يعني اذا ما تزعفيش انا حابة نشوفو ....
دارت ليها باين بلي وجها تقلب كثر من لي كان ..
هند : ما نقدرش نمنعك على راجلك وأب اوليدك ربي اجيب الخير برك ...
خرجت وخلاتها واقفة وباين من تصرفاتها الهدرة لي قالتها من فوق قلبها ...
**********
مراد راح مع ميسون يفطرو برا ....
مراد: معليش تحكيلي عليك حايب نعرفك ...
ميسون : انا البنت الوسطانية عندي خويا كبير واحد صغير وكاين انا وختي واحد مات بكري هو لول ...
العايلة تاعنا محافظة بزاف ؛ تخطبت لواحد صاحب خويا وفسخت كلشي كيف ما قتلك ...
راني نقرا باش نقدر نخرج من ذيك الدار والعائلة حابة نبدل حياتي كلها ...
مراد حس بلي تاع الصح الطفلة مهمومة لدرجة موحال يقدر اصبرها....
مراد : في كل دار مشاكل وأسرار انا بابا شفتو مرة وحدة وكنت صغير بزاف حتى اني ماشي متفكر مليح وجهو ...
وماما عاشت حياتها كامل بعيدة على دارهم رباتها جدة ام حسام ...
هنا ميسون تخطفت شافت معاه : كيفاش ام حسام كنت نعرف بلي يماه توفات لا ...
مراد : هاذيك رباتو برك يماه الحقانية عايشة هي لي ربت ماما وانا نقولها جدة ذرك ...
ميسون تخمم اذا تخبر باباها بهاذ المعلومة ولا تسكت قاعدة بينهم ماشي عارفة شكون تخير ...
مراد هزلها يدها وقال : راني معاك موحال نتخلى عليك ...
ضحكت ميسون وحست بلي راه صادق في كلامو .
**************
ام سلمى عيطت وائل وخرجو كيف كيف يشرو خاتم الخطبة ...
سلمى قعدت في سبيطار مع ختها ...
سلمى : كون ماشي انت كون ذرك راني نحسب في دموعي في الدار ....
ختها : انت راسك يابس يا ختي كون سمعتي كلامي من اول ليلة درتي هكذا كون راه قريب عرسك باين بلي وائل طايح فيك ودير واش تحبي غير اعرفي كيفاش تلعبي اللعب معاه ....
سلمى : كنت خايفة هاذاك الدوا كشما اديرلي ...
ختها : يا بنتي مديتلك دوا لعظم ما عندو ما ادير ادوخك برك كي تشربي منو بزاف مي ذرك لازم تخلصيني شوفي رجعتلك حبيبك ؛ وسمعي بالاكي تخلي يماه تدخل بينكم باين بلي واعرة سمعتيها كي قالت لماما كاش وحدة تزوج في سبيطار شغل هي زوجت في لاصال والحطة وعرس الله الله 😅😅😅.
سلمى : نوريلها العين الحمرة ملول ما تخافيش عليا يا ختي ...
اصبري نعيطلو نشوف وينو ....
سلمى : الوووو حبيبي وينك ...
وائل: راني مع يماك نخيرو خاتم وحوايج الخطبة ...
ياك انت مليحة قولي الصح ..
سلمى : شوية كنت نتقيا وجعتني كرشي بزاف جيت نوض دخت قريب جبتها على راسي ...
وائل: اقعدي في بلاصتك وعيطي لختك تقعد معاك من بعد نفوت نشوفك ...
قطعت عليه وقعدو يضحكو في زوج كيفاش خلاتو جاها على ربعة ...
**********
ام سلمى : يا ولدي ما تفهمنيش غالط انا راني في عرض يماك فهمت وانت ديجا وصلت بنتي للحالة هاذي بغيت غير نحميها ....
وائل: معليش خوذي راحتك خالتي ..
ام سلمى : ا لا هكذا ما تصلحش لازم تقولي يما ...
ضحك وائل وقال : اكي ميمتي ....
دخلو شافو خاتم جابت أثقل واحد فيهم وهو شرا واحد صغير لختها كادو ...
من بعد شراو شوية حوايج خاصين بالخطبة ....
وصلها لدار وراح عند سلمى كي جا يدخل لشومبرة لقاها راقدة والظلمة معبية لمكان قدم باش احل الريدو شاف واحد واقف طويل وكبير بزاف ....
مازر : انااااا راك تعرفني مليح مليح قريب نتلاقو وتمدلي حاجة لي نبغيها ...
#يتبع 😈
VOUS LISEZ
السحر الملعون " الجزء الثاني تابع لشيطان زوجي "
Horrorحصريا على #🕯chronique-DZ 🕯 🤍#السحر الملعون🤍 #شيطان زوجي 2 #الكاتبة : صونيا #الكوفر : زينب راقد على كرشو يحكي في التليفون والنعاس يدي فيه ماشي قادر يفتح عينيه وصوتها خارج من التليفون: وائل اهدر علاش سكتت وينك .... سمعت شخير عرفت بلي رقد حكمها...
