السحر الملعون " الجزء الثاني تابع لشيطان زوجي "

الحلقة 51

🕯السحر الملعون 🕯
#شيطان زوجي 2
#صونيا
🤍الحلقة 51🤍
*****************
قاعدة فوق كرسي تخمم فيهم واش راهم يعملو؛ داروها ولا لالا ؛ يماها عملت واش قالتلها ولا غير هدرة في هدرة .
تخمم في حياتها لي بالنسبة ليها ضاعت قبل ما تبدى ...
تخمم في شيء حاجة ديرها باش تكون هي الكل في الكل عندهم وسمية تسقط من عينهم ....
تفكرت الشيء لي حطاتو في صاكها ....
سلمى : ان شاءالله ما تشوفوش انا خبيتو مليح يا ربي تفرق بينهم راهي داتلي راجلي وحبيبي راهي بين يديه انا كيف البهلولة هنا نعسلو في يماه ...
دارت شافت معاها وجاتها فكرة في راسها ....
ناضت تجري وهند تشوف فيها ؛ دير في روحها حابة تتقيا ...
دخلت لدوش وقعدت ترجع ....
هند لحقتها خافت عليها ...
هند : سلمى واش بيك غير الخير ...
سلمى : وجعني قلبي وحسيت بالدوخة ما قدرتش نتحمل ما تخافيش ....
وقعدت حاطة يدها على فمها وتضحك ....
هند خممت وجاتها شغل راهي بالحمل ...
هند : عندك لا تكوني بالحمل يا بنتي ....
فتحت الباب سلمى شافت معاها وجها شاحب ...
سلمى : قلتي بالحمل اه ولدك اجيني مرة في زمان منين راح نحمل ؛ وهبطت الباب في وجها ....
هند حشمت من كلام سلمى وراحت خلاتها على راحتها ....
وصلت عند زينب وقالتلها : راني حاصلة بينهم يا ختي كون علابالي والله ما نخليه يزوج بهاذي سمية ...
زينب : احسن حاجة دارها ولدك هو زواجو بيها ؛ سلمى دايرة كيف اللفعة المسمومة صدقيني يا هند غير هي لي تقتلك بقلبك ....
قعدو يحكو عليها وسلمى مور الباب تسمع في كلامهم والحق في عينيها ....
شافت حسام جاي من بعيد رجعت قعدت فوق الكرسي ودارت روحها تخربط في التليفون...
لحق حسام ليها شافها وجها صفر ...
حسام : غير الخير بنتي واش بيك ....
سلمى : والو عمو تعبانة برك ما تخممش ان شاءالله نكون مليحة ...
حسام شدها من يدها وقال : هايا معايا تروحي تريحي في لاشومبر مع زينب ...
تمشو شوية غير لحقو كان باب الشومبرة مشقوق جا يفتحو سمع هند تقول : ساعات نحس سلمى تكرهنا وتحب تنتاقم منا ؛ مي هي لي غلطت معاه وتستاهل الشي لي صاري فيها هكذا تتعلم ....
شافت سلمى في حسام طلقتلو يدو وراحت تجري خلات كلشي تاعها في الشومبرة وراحت تبكي ....
دخل عليهم حسام زعفان خبط الباب شاف في هند ....
حسام : شحال من مرة نقولك ما دخلكش بينهم ؛ علاش تحبي تحطي نفسك في موقف كيف هاذا راهي سمعت كلامك وصراحة اذا كشما دارت ولا هزت منك عندها الحق وتستاهلي هند ...
شافت فيه وخرجت تجري موراها مي ما لقاتهاش سلمى راحت ....
رجعت قاتلو : ما لقيتهاش وخفت كشما دير مشكل اوزيد راني شاكة فيها بالحمل ....
زاد زعف حسام: انت لي رايحة تفزدي كلشي علينا خليهم احلو مشاكلهم وحنا شا دخلنا قولي شحال من مرة نقولك هند مي راسك يابس...
زينب: هند ما قالت والو انا لي كنت نحكي ....
حسام: مكان لاه انا ثاني سمعتها واش قالت .
هزت هند بورطابلها تعيط لسلمى والو ماهيش ترجع من بعد غلقاتو ....
هند تقلقت عليها ورجعت تلوم في روحها كشما يصرالها هي السبة .....
سلمى مسحت دموعها اصلا كلامها ما زاد ما نقص فيها دارت هكذا باش تبين قدام حسام بلي زعفت ...
هزت طاكسي وراحت لدار شغل زعفانة وحابة تشبكهم مع بعض ....
مع دخلت شافت وائل بشورط ادور ...
وائل: مالك سلمى علاش جيتي ....
قعدت تبكي ومابغاتش تحكي معاه طلعت لبيتها شافت بلي كاين لي دخل وستخدم الدوش رجعت تعيط عليه ...
سلمى : ما قدرتش تروح لبيت خرى لازم تستفزوني لهاذ الدرجة ما عنديش قيمة عندكم كيف انت كيف امك تحملوني كلشي انا درت كلشي باش نصلح الغلطة تاعي حتى اني قبلت انك تزوج بوحدة خرى ؛ مي باين بلي موحال تمدولي فرصة مالة خلاص خليتهالكم اشبعوا فيها ....
وهي مزالها تعيط شافت معاه وطاحت داخت ...
وائل خاف عليها جرى عندها هزها حطها فوق السرير وعيط لطبيب يعرفو باباه ...
مدة الطريق وكان عندو فحصها مليح وضحك ....
الطبيب : في بالي راهي اونسانت على بيها صرا فيها هاذ الشيء...
وائل ماشي مصدق كلامو وقعد اشوف فيها حتى سمية كانت واقفة قدام الباب ماشي مامنة واش سمعت ...
سلمى شافتها ورجعت تتوجع وقالت : راك متأكد دكتور ...
الطبيب: شوفي 90% نقولك ايه مي لازم ديري تحاليل هكذا نتأكدو مليح...
خرج الطبيب وائل باين عليه الفرحة ....
سمية ساكتة ما خرجتش حتى كلمة من فمها ؛ شافت فيها وقالت : كشما تحتاجي نديرلك سلمى ...
سلمى : اسمعي ما نحبكش تقربي مني فهمتي نخاف كشما ديريلي ليا والبيبي تاعي اخرجي من بيتي هايا ...
خرجت سمية تكركر في رجليها ما قدرتش تفرح ولا تحزن كي سمعت هاذ لخبر....
سلمى تمدات مليح وقعدت تضحك ؛ الشيء لي كانت دايراتو تمسخيرة طبع صح ههههه .
عيطت ليماها تبشرها بالخبر ...
ام سلمى: مبروك يا بنتي اصلا هي قريب تروح من هاذيك الدار موحال تزيد ترجع ....
@يتبع 😈