السحر الملعون " الجزء الثاني تابع لشيطان زوجي "

الحلقة 83

🕯السحر الملعون 🕯
#شيطان زوجي 2
#صونيا
🤍الحلقة 83🤍
********************
طلعت زوج جنازات من دارها راجلها وعروسة ختها ؛ الدنيا ظلامت في وجها ؛ هند صايي طفات شمعتها.
جنة : ماني يعني ذرك طاطا ميسون راحت عند ماما سمية ؛ او أميرة محمد أمين راهم كيفي انا كنت نسمع عمو مراد اقول ديما جنة مسكينة اتيمة 😥💔 حتى اني ماشي عارفة واش معناها ...
مسحت دموعها شجعت دارت ليها ..
هند : هايا عندي حبيبتي ؛ يتيمة معناها لي ماتت امو ولا باباه وانت حبيبتي صح يماك ماتت مي عندك باباك احبك من كل قلبو موحال رايح اخليك ....
جنة: يعني حتى بابا رجع ايتيم ؛ كي مات جدي يعني انا بابا رجعنا كيف كيف ...
تنهدت هند ما حملتش تسمع هاذ لكلام ....
هند : حبيبتي روحي جيبي حسام نقعدو معاه شوية ....
خرجت جنة تجيب خوها مابين سلمى دخلت ليها ...
سلمى : خالتي راكي طولتي في الرقاد اليوم عمي عندو شهر ملي توفى يعني ذرك لازم ترجعي لحياتك كاين ولدك وولادو معاك ؛ جنة متأثرة بزاف بيك وهاذ الشيء اضرها ...
هند ما قالتش حتى حرف ما حبتش حتى تشوف معاها ...
سلمى : ما توحشتيش دارك سريرك ؛ كون انا موحال نخلي داري لي عشت فيها حياتي مع راجلي ؛ اجي شكون اجي موحال ازعزعوني منها ...
"بعيد الشر على اوليدي " رجعت عليها هند دارت وخزرت معاها واحد الخزرة كون نشقت لرض راهي دخلت فيها ....
خرجت سلمى مقلبة خليقتها ؛ ورجعت جنة مع خوها...
حسام الصغير : ماني مزالك تبكي قولي ....
هند : كي جا حبيب جدة موحال نبكي اناااا ...
حسام الصغير :  علاش ماما ما تحبكش ؛ ديما تقولي ماني راهي حابة تروح وتخليكم...
هند ماشي مصدقة واش سمعت .
هند : يا عمري ما عنديش أغلى منكم في هاذ الدنيا ....
قعدت معاهم تحكي حتى وبلا ما تخبر حتى واحد رفدت قشها ورجعت لدارها ..
هند غير ما شافت الدار رجعت تشهق بالبكا كل ذكرياتها مع حسام رجعو ليها كيف التسونامي لؤ ما يرحم حتى واحد ؛ كلشي فيها مخلط الغضب الفرحة البكا كلشي داخل في بعضاه هاذو كامل تحس بيهم ضربة وحدة ؛ حابة تهز مارطو وتقعد تهدم في هاذ الدار حتى يبرد خاطرها ....
دخلت وخلات الباب مفتوح من وراها ماشي هامها حتى حاجة....
تمدت في بلاصتو هزت مخدتو حضنتها ودموعها كامل ما حبسوش ...
تبكي وتعيط عليه زعفانة منو لي راح وخلاها وهو عارف بلي رايح اموت عارف بلي ما بقالوش وقت ؛ كانت حابة تقولو الشيء لي في قلبها قبل ما اموت ...
******************
في دار مراد .....
ملي حطو ميسون تحت التراب ما حطش رجلو برا ؛ حكمو شوك حتى الطبيب قالهم خلوه على راحتو بالشوية يرجع للحياة على خاطر التوأم تاعو ....
كل يوم زينب تهز لولاد تديهملو يقعد غير اشوف معاهم ويبكي....
في شهر نقص 35 كيلو رجع جلد على لعظم حتى انهم اديرولو السيروم تالمو ما ياكلش....
زينب : طارق لازم نديرو حل اكمل هكذا اضيع منا ولدنا شوف لولاد مساكن واش ذنبهم مهم ماتت ازيد اروح باباهم يا لطيف لازم نديرو حاجة ....
طارق : راني متأكد بلي شفتو زينب عندي شهر وانا نخمم في هاذ لقبر راني سور بلي شفتو ...
زينب زعفت وقالت : خلينا منو على جال هاذ لقبر مات حسام سمعت مانيش حابة تموت انت ....
دار ليها وضحك : زينب الموت بالساعة اذا كتب ربي ما تقدري ديري والو ؛ انا المهم عندي هاذ لصغار موحال نخليهم يتعذبو كيفنا ؛ كاين اولاد وائل ثاني ؛ هاذوك أمانة خويا حسام يعني لازم نعملو حاجة ....
زينب : عارفة والله مي ما نحبش نخسرك ؛ كنت حابة ندي لولاد ونروح عند هند مي ما نحبش ذيك سلمى سمية بزاف كون غير هند تروح لدارها نروح انا نقعد معاها مسكينة ....
طارق : عيطيلها نشوفو اذا حابة تجي تريح هنا ايامات ....
هزت تليفون وعيطت لختها مي ما تردش...
زادت عاودت مرة زوج ثلاثة والو ...
رجعت عيطت على وائل....
زينب : حبيبي واش حوالك وينها ماماك ....
وائل: خليتها في الدار مع لولاد ممكن ما سمعاتوش انا راني رايح لدارنا نشوف حوايج بابا والله توحشتو بزاف ...
زينب : ربي يعطينا الصبر ان شاءالله اخر الاحزان يا ولدي ...
وائل: ان شاءالله واش مراد ماشي حايب اشوفني مزال غالق الباب على روحو ؛ راني نعرف احساسو جربتها قبلو ربي اكون في العون ...
زينب : ان شاءالله انطهلى في روحك وعطيني خبر على يماك ....
قطع عليها وهبط من الطونوبيل حاير كيفاش الباب مفتوح والكابة تاع يماه مطايشة برا ....
هزها ودخل لقا كلشي مفتوح الضوء الباب ...
دخل احوس في الدار على شكون قادر اكون دخل ...
حتى وصل لبيت والديه ثمة سمعها تبكي وتحكي مع واحد ؛ ما قدرش يدخل فضل يقعد برا ويسمع كلامها ودموعو على خدو من واش راهي تقول ....
هند : حسام كسرتلي ظهري يا حسام خليت الناس تستشفى فيا ؛ خليتني حمل ثقيل عليهم ؛ راني حاسة بلي ماشي قادرة نتنفس ؛ كون غير ديتني معاك يا حبيبي ....
سكتت وشوية هكذا سمع وائل صوت خشين ماشي عارف تاع شكون من الشوك دخل على يماه وقال: شكون هاذا لي كان يهدر معاك يما قولي شكون لي قال انت ملكي والعائلة كامل ملكي وحدي ؛ اهدري وينو وين راه مخبي...
قاعد احوس كيف المهبول.....
هند : كنت نحكي مع باباك كان هنا واقف كيف انت دخلت هو راح ...
وائل حس بلي يماه بدات تخرف مي لالا سمعو هو ثاني موحال كان يحلم ...
شوية ورجعو بيبان الدار كامل ينفتحو ويتغلقو شغل كاين زوبعة في الدار ؛ وصوت ضحك معبي الدار ...
هند : قتلك حسام راه هنا معانا ....
#يتبع 😈