🕯السحر الملعون 🕯
#شيطان زوجي 2
#صونيا
🤍الحلقة 34🤍
**************
قاعدة عند الطاقة لمطر داير حالة الريح بزاف وهي فاتحتها ماشي هامها اذا تمرض ؛ سلمى حياتها رجعت جحيم مع وائل...
حتى الهدرة مع يماها كي اكون هو في الدار يعني مكانش أسرار ما كانش كلام من وراه ....
تخمم في حل لهاذ المصيبة سمعت الباب أدق ما قدرتش تقول ادخل قعدت ساكتة و لهوا يضرب في وجها مع قطرات لمطر الباردة غالقة عينيها حتى سمعت : بنتي علاش ديري في روحك هكذا حرام هاذ الشيء...
دارت لقاتها حماتها هند بلا ما تفيق ترمات في حضنها وتبكي بحرقة كبيرة حتى رجعت هند تبكي معاها ...
تمسحلها على شعرها وتسكت فيها ...
هند : نوعدك يا بنتي نوعدك ندخل ونعرف الشيء لي خلاه هكذا ..
سلمى شافت معاها : انا علطت معاه مي سلكتها وذرك ما حبش اسامحني حتى الشوفة ما اشوفهاش فيا ما لقيتش حل معاه اتخيلي حرمني حتى من لولاد قالي تهزي نطلقك ...
نخلعت هند من كلامها ..
هند : ما كنتش ناوية ندخل بيناتكم مي هنا لحكاية كبرت وموحال نسكت يا يرجع عادي معاك يا اسيبك تولي لداركم مي باش يقعد يحقر فيك هكذا لالا ما نقبلش ....
غلقت الطلقة وقالتلها تبدل قشها وتسيي ترقد ...
هند هبطت مقلقة وزعفانة بزاف من وليدها ؛ هزت التليفون وعيطتلو ..
وائل: اهلا ماما راكي مليحة ...
هند : مانيش مليحة ولدي عندي جرح ينزف ما نعرف لا يبرا ولا لالا..
وائل: راني في البيتزيريا جاي ليك ضرك غير قطع راح يجري طلع في اللوطو وديمارا ...
10 دقايق كان قدامها ...
قعد اقلب فيها في يديها في راسها حتى رجليها مالقاش حتى اثر تاع جرح ولا د.م حار ...
وائل: ماشي قلتي عندك جرح ينزف وين يا ماما ما شفت والو والله خلعتيني.....
هزتلو يدو وحطتها على قلبها ..
هند :كي نشوف ولدي ماشي فرحان و ديما تعبان قلبي ينزف ؛ كي نشوف كنتي كل الوقت وهي تبكي ؛ قلبي ينزف ؛ كي نسمع وليدي ما حبش اجيب لولاد افرح ميمتو قلبي ازيد ينزف أضعاف؛ موحال يبرى كون تقعد على هاذ الحال وائل هاذ المخلوقة أمانة عندك من رب العالمين يا تقوم بيها يا طلق مي تعذبها لالا مستحيل لا ربي ولا العبد يقبلها ..
وائل جا يحكي هزت يدها وحطتها على فمو ...
هند : علابالي لحكاية كامل الحمد لله لي خوك مراد طلع راجل ماشي كيف باباه كون انت ما ديرش فيه الثيقة موحال تجيب مرتك لهاذ الدار ؛ مي صدقني راك تعذب فيا وفي روحك برك هي تبكي ايلمات مي تفوت تروح تنساك مي انت لالا ظميرك يقعد انبك طول حياتك ؛ حط يدك في ي ربي سبحانو توكل عليه وخليها كيما جات تجي ؛ اذا راك متأكد حايب تكفي معاها لازم تسامحها واذا شايف ماشي قادر رجع الأمانة.....
شاف معاها طاحو دموعو من كلامها ...
وائل: تعرفي نهار عرفت واش دارت متت الف موتة ونهار حبت تنتاحر هنا مات قلبي صح كنت انا سبابا والشيء لي راني ندير فيه نعذب في روحي بويسك انا نستهل؛ مانيش عارف حتى إذا راهي صح تحبني ولا لالا كيفاش حبيتي نجيب معاها ولاد ....
هند مسحتلو دموعو : المهم انت تحبها وقلبك نضيف من جبهتها وصدقني موحال ربي اخليك وحدك ..
اسمع لكلامي تنجح يا ولدي ...
عنقها وطلب منها السماح وقالها بلي رايح تتغير معاملتها معاها ...
كل هاذ لكلام سمعاتو الفعة وطلعت تجري تخبات تحت لاكوات ودارت روحها مريضة ...
طلع ليها وائل لقاها ترجف ...
وائل: سلمى واش بيك علاش ترجفي ...
سلمى : نحس بالبرد برك مكان والو ...
ناض هبط عند يماه وقالها دارتلها تيزانة؛ طلعهالها وشربلها...
وائل: أرقدي شوية منا لعشية اذا راكي مليحة نديك نتعشو برا واش قلتي ...
فرحت بزاف وطارت عنقاتو كيف الطفلة الصغيرة ...
رجع للخدمة وخلاها توجد روحها ...
طلعت عندها هند لقات الباب مفتوح دخلت ...
لقاتها لابسة غير سروال وعريانة من فوق ...
هند : سامحيني يا بنتي حسبتك راقدة ...
سلمى : على الاقل كون دقيتي الباب واذا كنت مع وائل في بوزيسيو #### كيفاش...
نورمالمو رانا عرسان جدد تحتارمو شوية لا ....
هند ماتت بالحشمة وحطتلها باطة فوق سريرها قالتلها : كنت شريتهالك كادو ونسيت نمدهالك ...
خلاتها وخرجت والدموع في عينيها حست قلبها ضياق عليها ...
راحت سلمى خبطت الباب من اوراها حتى هند تخطفت ...
سلمى : انتوما لي يسكتلكم تركبو فوق راسو ياخي عباد؛ داخلة ديراكت كوري هنا واقيل ....
حلت الباطة لقات فيها سنسلة رووووعة وكبيرة جربتها جاتها طوب ...
تليفونها صونا لقاتها يماها : الوووو ماما توحشتك بزاف بزاف...
ام سلمى : واش بنتي امورك مليحة قولي ...
سلمى : اليوم راني مليحة وائل الحمد لله رجع كيف نعرفو والحربايا تاع يماه جابتلي كادو ...
ام سلمى: ما تمسيهش ممكن كشما دارتلك فيه ...
نخلعت سلمى نحاتو ورماتو في لرض ...
حست بدوخة كلشي ادور طاحت في لرض ويماها تعيط سلمى ردي مالك سلمى ....
عينيها يتغلقو وحدهم وهي تشوف في واحد أقرب ليها بالشوية ...
كوثر : قتلك ديري حاجة تخلصيها غالية ...
#يتبع 😈
VOUS LISEZ
السحر الملعون " الجزء الثاني تابع لشيطان زوجي "
Horrorحصريا على #🕯chronique-DZ 🕯 🤍#السحر الملعون🤍 #شيطان زوجي 2 #الكاتبة : صونيا #الكوفر : زينب راقد على كرشو يحكي في التليفون والنعاس يدي فيه ماشي قادر يفتح عينيه وصوتها خارج من التليفون: وائل اهدر علاش سكتت وينك .... سمعت شخير عرفت بلي رقد حكمها...
