السحر الملعون " الجزء الثاني تابع لشيطان زوجي "

الحلقة 59

🕯السحر الملعون 🕯
#شيطان زوجي 2
#صونيا
🤍الحلقة 59🤍
******************
واقف ماشي حاس برجليه؛ وائل ماشي مصدق واش راه يسمع ....
وائل: كيفاش هاذا قبيل كانت مقلقة على سلمى كي ديتها ....
هند : عيطتلي يسمين قالي ماما رقدت من بعد فطنت عيطت عيطة وطاحت لقاوها ميتة وجها مقلوب ما فهموش علاش اصلا راهم جايبينها لهنا؛ تسمع سلمى تهبل يا ولدي ....
وائل: ماما سلمى ضيعت البيبي 😓😓😓😓 .
هند : ما كتبش ربي يا ولدي؛ مزالكم صغار بربي اجيكم اولاد بزاف ....
وائل: كي طيحت المرة لولة قلت سور هاذي راهي اللعنة مي علاش عاودت طيحت ذرك رايح نهبل ...
هند : ما تكفرش بربي يا ولدي كلشي مكتوب علينا قول الحمد لله لي رانا فوق التراب نتموشو......
************
راقدة في لاشومبر لي حذاهم ، عطاها الطبيب دوا باش ترقد ...
سلمى تهلوس بكلام ماشي مفهوم....
دور في بلاصتها وتحلم...
هي تمشي في غابة شابة بزاف بزاف ؛ لقات واد كبير قعدت عند الضفة تاعو حطت يدها في الماء لي كان يلمع مع ضوء الشمس ...
جاتها طفلة ملور وقعد حذاها ....
دارت سلمى شافت معاها ...
سلمى : نعرفك انا شايفاتك من قبل .....
الطفلة: وي ماكانش يومين كنت معاك في بيتك وقتلك استعدي تخسري واحد عزيز عليك ...
سلمى ما فهمت والو من كلامها ؛ اما ذيك الطفلة مدتلها يدها ...
شافت فيهم سلمى لقاتهم مسخين وظفارها طوال بزاف دايرة كيف يد عجوز ؛ مي هي طفلة ما تفوتش 18 عام ....
بلا ما تفيق لقات روحها تمشي معاها يديهم مع بعض....
سلمى : وين رايحين قولي ...
الطفلة: نديك تشوفي وين رايحة تعيش ذيك لعزيزة على قلبك .....
وصلو لواحد لبلاصة كانت تخوف ذيك الغابة لي تهبل رجعت مكان مهجور الشجر تاعها ميتين وفي وسط الغابة قبر مفتوح ....
سلمى : واش هاذا قولي .....
الطفلة: هنا رايح اكون مكان امك لي عاشت باش دمر الناس بوسخها ...
طلت سلمى لقاتو معمر باللفاعي هاذي تاكل في لخرى دارت عند ذيك الطفلة لقاتها في وجها ضحكت معاها ودزت سلمى طاحت في ذاك لقبر ودخلت في وسط ذوك الفاعي....
ما قدرتش حتى تعيط اللفاعي من كل جيهة وحدة جايتها حابة تعضها فتحت عينيها شافت يسمين واقفة قدامها .....
سلمى وجها مبدل شغل عارفة واش رايحة تقولها ختها مي ماشي حابة تسع منها اي حاجة .....
دارت وخلاتها واقفة جنبها رجعت رقدت .....
زمان بعد 3 ساعات عاودت فتحت عينيها ؛ لقات هند راقدة فوق كرسي ؛ جات تنوض ما قدرتش ؛ وهي تتحرك في سريرها فطنت هند وشافت معاها.....
سلمى : وينها يسمين خليتها هنا واقفة قبيل ....
استغربت هند من كلامها ..
هند : ما جاتش يسمين كامل اليوم ..
سلمى : قتلك كانت هنا واقفة سبحان الله شفتها .....
هند قربت ليها بالشوية وقالت : سلمى يسمين ما تقدرش تجي راهي في الدار في سريرها الطبيب قال راهي مشوكية ومحال تقدر تمشي يعني ختك تعوقت سلمى .....
شافت معاها والدموع في عينيها ...
سلمى : انت وحدة كذابة ومنافقة؛ ملي زوجت مع ولدك ما حبيتينيش حتى كي عرفتي بسمية رحبتي بالفكرة ؛ كانت ديما ماما تقولي بلاك منها ....
هند : سلمى يماك توفات ربي يرحمها لازم تعرفي هاذ الشيء ؛ مهما واش تقوليلي مانيش رايحة نزعف منك سمعتي ؛ انت ذرك بنتي ومحال نتخلى عليك ....
شافت معاها وفي عينيها حتى الدموع نشفو ما قدرتش تبكي ....
سلمى : شفت قبرها يا ماما هند شفتو؛ معمر باللفاعي ؛ كيفاش يعطيهم قلبهم يدفنوها ثمة قولي كيفاش ....
حكمتها عنقتها وبدات تبكي هند : يا بنتي مزال ما دفنوهاش راهم جابوها هنا باش يعرفو واش صرالها وغدوة يدفنوها غدوة انت ثاني تخرجي تروحي لجنازة تاع يماك ....
سلمى : ياك انت ماما علاش مالة نروح للجنازة تاعها قولي ؛ راني خايفة بزاف والله خايفة ....
حطت راسها على كتفها وقاعدة تشوف في الزاوية تاع لاشومبر شافت ذيك الطفلة واقفة واقفة ثمة وتضحك معاها ....
غلقت عينيها وعاودت فتحتهم شافتهم في زوج هي ويماها واقفين ؛ يماها تعنق في ذيك البنت ويضحكو ...
سلمى عيطت لربي لي خلقها من الخوف وهند تسطت فيها وتقولها : خرجي كلشي لي في قلبك بنتي مي ما تعيطيش ابكي ابكي ذرك غدوة تولي مليحة ....
#يتبع 😈