السحر الملعون " الجزء الثاني تابع لشيطان زوجي "

الحلقة 3

🕯#السحر الملعون 🕯
#شيطان زوجي 2
#صونيا
🤍الحلقة 3 🤍
************
قاعدين اوجدو لعشا يضحكو في الكوزينة زينب بايتة عندهم هاذ الليلة عندها شحال ما شافتهمش....
زينب: هند ريحت لحريق ماكيش تشمي ....
راحت هند تجري لطنجرة لقاتها فيها المرقة كلشي عادي في الكوزينة قعدو احوسو وتبعو في ريحت لحريق حتى وصلو لتوالات فتحوها لقاو نار صغيرة شاعلة في الكوانة تاعو شافو في بعضياتهم وصبو عليها الما كي طفات لقاو رماد ونص ورقة مزالت ما تحرقتش رفدتها زينب وتقرا ما فهمت والو منها ....
هند : شكون شعلها حسام وائل ماهمش هنا حتى لي تنظف ما جاتش اليوم .....
زينب: لا راكي شاكة فيا كنت معاك ....
وجه هند تقلب وزينب ثاني  ..
هند : اصلا موحال نقدر نشك فيك انت ختي لي الدنيا مدتهالي ....
حطو الورقة في الكوزينة وقعدت هند تنظف في التوالات كي رجعت لقات زينب واقفة قدام الباب تاع برا وهو مفتوح قدمت ليها تحكي معاها تقولها واش راكي ديري ثمة ....
زينب ما تحركتش قاعدة غير تشوف برا مسمرة في بلاصتها كي عيطت عليها هند طاحت تغاشات .....
هند : زينب ختي حلي عينيك واش صرالك زينب ....
دخل حسام لقاهم بهاذيك الحالة هند تبكي وزينب في لرض حار واش بيهم كانو فرحانين كي رجعو تلاقاو .....
حسام : في بالي نهزوها لسبيطار على الأقل نعرفو واش بيها .....
هند : راهي طبيبة ممكن نلقى نيميرو تاع طبيب عندها نعيطولو ....
حسام : خلاص انا نعيط لصاحبي ذرك اجي اشوفها....
رفدها حطها فوق الفوتاي بدات تفيق بالشوية حلت عينيها تفزعت كي شافت حسام .....
زينب: مانيش مصدقة انك بخير خويا حسام شفتك شفتك هزيت ذيك الورقة لي نصها محروق وخرجت للجنينة وشعلت النار في روحك حكمتني الصدمة عييت نتحرك من واش شفت ....
هند : لا حسام مكانش في الدار انا لقيتك مسمرة قدام الباب تشوف برا وكي عيطت عليك طحتي......
حطت يدها زينب ورا راسها لقات الدم حسام وهند خافو عليها بزاف اما زينب طمنتهم ممكن من الطيحة برك ....
نظفولها الجرح لي في راسها وخلاوها تريح في الصالو ...
حسام : في بالي رجعو هند رجعو الأمور يصراو كيف بكري لازم نولي عند هاذاك الراقي هاذو سنين ما رحناش عندو ....
هند : كنا ملاح كانت حياتنا مسقمة علاش عاودت تقلبت يا ربي ما ني فاهمة والو وعلاش تعداو عليها وهي واش ذنبها زينب مسكينة....
اي واحد احب يتقرب لينا لازم اعذبوه....
وهوما يحكو شافو ضو جاي من الجنينة خرجو يجرو لقاو النار شعلت ثمة في كوانة يجري حسام طفاها زادو لقاو رماد وطرف من ورقو خرى ماشي محروق ....
هند : أواه سور كاين لغز مع هاذ لورق لي نصهم محروق ياك تشفا قاللنا الراقي تبعو بالتفصيل الشيء لي يصرا باش هو يعرف الشي لي راهم احوسو عليه ....
دخل عليهم وائل لقاهم بهاذيك الحالة تخلع على يماه شدها من يديها ....
وائل : ماما تحرقتي من يدك شوفي واش لي صرا هنا وعلاش ريحة لحريق معبية الجنينة .....
حسام : والو ولدي ما تقلقش روحك ....
وائل زعف كي قالو هكذا : واقيل تحسب فيا مزالني صغير بابا راني كبرت ذرك تقدر تحط حملك عليا تقدر ترتاح وانا نهز همك اصلا بلا ما تحكي علابالي بالشيء لي راه واقع هنا لحوايج لي يصراو اصلا مام عندي صراو النار تشعل بلا سبة هكذا تشوفو مرة على مرة خيالات تسمعو ضحك اولاد وبزاف صوالح هكذا .....
هند مشوكية من كلامو وهي لي كانت حاسباته عايش عادي حاجة ما تقيسو .....
#يتبع 😈