السحر الملعون " الجزء الثاني تابع لشيطان زوجي "

الحلقة 75

🕯السحر الملعون 🕯
#شيطان زوجي 2
#صونيا
🤍الحلقة 75🤍
********************
شهر بعد شهر كرشها تبان وهي تضعاف وتمرض ؛ سلمى تتحمل كلشي غير باش تشوف البيبي لي في كرشها.
التعامل مع جنة تبدلت بزاف رجعت ما تحملهاش تعيط عليها وجنة مسكينة حست بهاذ الشيء ...
الدموع في عينيها راحت ليه حابة تفهم واش راه صاي ليماها ...
جنة : بابا علاش ماما رجعت ما تحبنيش ...
وائل: لا بنتي ماماك تحبك وبزاف راهي غير مريضة وتتقلق بالخف ...
جنة : البيبي لي في كرشها هو لي دارلها هكذا حبيتو اموت خلاها تتوجع ...
هبطو دموعها من واش قالت ؛ شغل حست بالضر لي راه في سلمى ....
وائل: ما تبكيش بنتي ماماك ذرك تولي مليحة ؛ ترجعي ترقدي معاها وتحكيلك حكايات كيف ما كانت ...
خلاها عند هند باش تنحيلها هاذ الفكرة من راسها وراح عندها ....
وائل: علاش راكي ديري لجنة هكذا رجعت تقول بلي ما تحبيهاش ...
سلمى : وائل دخلت في شهري ما كفانيش الشيء لي راني فيه قول ؛ كل ليلة نشوفك في منامي اقطعوا فيك وقولولي خيري بينهم وكي نفيق نلقى روحي بالد.م تقريب 7 شهر وانا هكذا رايح انت ذرك تزيد تحملني مشاكل جنة ؛ انا نفسي ماشي متحملتها ...
جا ارجع عليها وباين بلي غضبان منها ؛ حتى رجعت تعيط ؛ بسيف ما وقفت سال عليها ماء ....
وائل ما عرفش واش يعمل .
سلمى : رايح يهبط راني حاسة بيه وائل اجري البيبي راه هابط ...
رجعها فوق السرير ما جا اجيب هند حتى سمعو صوتو يبكي ...
دخلت هند وحسام لقاو السرير كامل د.م سلمى تبكي والبيبي تحتها في السرير...
لفو حسام وطلب من وائل اعيط للاسعاف لي ما لحقتش 10 دقايق كانو عندهم ...
رفدو سلمى والبيبي وديريكسيو سبيطار .....
كامل قاعدين يستنو برا زادت جات زينب وعايلتها ..
غير شوية خرجت الطبيبة : كلشي مبروك طفل كيف لقمر صحتو مليحة والمدام ثاني الحمد لله لي كانو فوق السرير والا موحال اعيش اذا طاح ...
وائل ميت بالفرحة رجع اب للمرة الثانية...
جنة : يعني انا عندي خويا ذرك وصغير شفتو في الدار ....
زينب: ايه حبيبتي لازم انت تحافظي على خوك هة صغيرون ما يعرفش ...
ميسون: ماما زينب حبيت نقولك حاجة مي حشمت منك ...
هبطت راسها وجها حمار كيف حبة طوماطيش .....
زينب : قولي راني كيف يناك يا بنتي ....
هزت يدها وحطتها على كرشها؛ زينب ماشي مصدقة لي هي اونسانت...
مراد : كنا حابين نقولولك اليوم مي كي تلمينا هنا ايا قلنا هكذا كامل تعرفو ....
زينب: اليوم راني اسعد وحدة في العالم ولد وائل؛ وخبر ولدي يا ربي دومها هاذ الفرحة ...
ميسون: لازم دارنا ما يعرفوش بهاذ لخبر والله نموت انا هو قبل ما أزيد...
زينب: بعيد الشر عليكم يا لطيف...
جا وائل بعد ما راح شافهم مع باباه ويماه ...
وائل: راهم ملاح الحمد لله غدوة ان شاءالله يقدرو يخرجو ؛ ماما ادي معاك جنة الليلة انا نقعد معاها هنا ....
هند : لا شفت روحك تعبان نريح انا ...
وائل: لا معليش انت ريحي روحك حبيبتي...
مراد : واش رايح تسميه ولي العهد تاعنا ههههه
وائل: خممت بزاف وقررت نسميه حسام على بابا .
دار ليه حسام والفرحة في وجهو ...
حسام : الحمد لله لي شفتو وجا على خير حتى إذا مت ذرك ما اهمنيش يا ولدي ...
وائل: بعيد الشر عليك ربي اطول في عمرك يا بابا ....
روحو كامل كل واحد وين راح قعد وائل مع سلمى والطفل حسام ...
وائل اشوف معاه والفرحة ما فارقتش وجهو ....
سلمى فاقت من الرقاد تعبت بزاف اليوم ...
سلمى : راه راقد ياك راه حي ماشي ميت قول طمني على ولدي ...
وائل هزلها يدها : ايه ربي اطول في عمرو راه راقد كيف الملائكة مسكين صغير بزاف بزاف ....
سلمى: علابالي نقعد مقلقة عليه موحال نرقد انا ذرك ...
وائل: لي كتبو ربي كامل مرحبا علاش تحكي هاذ لكلام ؛ سلمى لازم تهزي صحتك باش تقدري ترضعيه فهمتي هايا راني هنا نعسكم في زوج ما تخافيش...
رجعت حطت راسها في صدرو وحكمها النعاس رقدت ...
مابين كانت راقدة زادت شافت نفس الحلم تاع كل ليلة اعذبو في وائل مي هاذ المرة ما خيروهاش بينهم هاذ الليلة خلوه يتعذب بلا حتى ما قالو حرف واحد ؛ يا درا واش رايح اكون مصير وائل بعد هاذ الشيء لي صرا ....
#يتبع 😈