السحر الملعون " الجزء الثاني تابع لشيطان زوجي "

الحلقة 40

🕯السحر الملعون 🕯
#شيطان زوجي 2
#صونيا
🤍الحلقة 40 🤍
**************
دخل لدار حالتو حالة ماشي منجم اهز روحو ولا يحكي هند وزينب مقلقين عليه بزاف وجهو مبدل شغل الروح تاعو تغادر جسمو بالشوية ....
تسطح فوق سريرو شاف معاهم وقال : كنت حايب نعاونها حرقتني من يدي هي سبابي ...
قدمت ليه هند ماشي فاهمة واش راه اقول ...
هند : حبيب يماه قولي شا خصك راني هنا ....
مدت يدها لقاتو بالحمة تاكل في جسمو وهاذوك البقع تاع لحريق رجعت تضهر على جسمو وأكثر من قبل ...
خرجت هند تعيط من الطاقة : حسام اجري ليا حسام وائل ماهوش مليح ....
طلع حسام وطارق يجرو ..
غير قرب منو حسام لقاه في حالة وجهو ماشي كيف قبيل عينيها حومر كيف النار ؛ دار عند طارق ....
حسام : روح جيبو وذرك ولدي راه اموت طارق اجري ...
خرج بلا ما يستنا ركب في اللوطو وديمارا ؛ مسافت الطريق لقاه برا يستنا فيه ...
الشيخ : كلشي راح مني ورجعلو الشيطان راه ناوي عليه لازم نزربو بيه سمعت هايا رانا طولنا ...
راحو ديراكت خايفين عليه لا يلحقو روطار ....
هند وزينب قاعدين عند راسو كلو وحدة تبكي من جيهة ..
طلعت ليهم زليخة حايرة واش راه صاري ....
مع دخلت لاشومبر حست روحها ضياقت عليها ماهيش مرتاحة هنا ...
شافت معاهم وقالت : واش كاين غير الخير ماله بني علاش راكم تبكو ....
هند : يا يما مانيش عارفة شا صرالو راه بالحمة وهاذوك لي في جسمو زادو كثر من بكري وهو غير اهترف والله قلبي رايح يحبس ...
قربت منو حطت يدها حست بلي راه شغل مخنوق ؛ قعدت تقول في بالها : يالي راك شادو من رقبتو اخطيه انا اولا عليه ...
تعاود في هاذ لكلام شحال من مرة ...
حتى حست يد تشد فيها من سيقانها كل مرة تشد بقوة .
زليخة ما خافتش بالعكس اذا تقدر تنقذ حفيدها وتمدلو حياتها تعملها ....
تعاود في نفس لكلام وهاذيك اليد تشد اكثر واكثر ؛ حتى دخل عليها الشيخ ورجع اقول لا لا ما تعمليهاش ماشي بهاذ الطريقة ...
مي المشكل لحق روطار زليخة طاحت على لرض تغاشات ؛ وائل فتح عينيه ماشي فاهم واش لي صاري ...
الشيخ الدموع طاحو من عينيه على هاذ المنظر مكانش حايب يصرالهم هاذ الشيء حتى انو فضل يسكت ولا اقول واش راه صاريلهم ...
حسام قرب من امو هزها بين ذرعيه : يما حلي عينيك على وجه ربي يا يما ؛ مانيش قادر نخسرك بعد ما لقيتك ؛ ماشي قادر نزيد نعيش نفس الألم مرتين ؛ ديجا خسرت نصف روحي يا يما راهي تحت التراب ؛ خليك معايا انت النص لوخر كون تروحي انا سموني عايش بلا روح ؛ يا يما حسام محتاجك راني مزالني طفل صغير في غيابك ؛ يا عمري فتحي عينيك شمي ريحتي ياك قاتيلي يا يما نحب غير نمس وجهك ونشم ريحتك؛ يا ربي علاش هكذا علاش كل مرة قلبي يتقطع علاش .....
قرب ليه الشيخ : حطها فوق الزربية خلي نقرا عليها ممكن ترجع تفيق يا ولدي ....
هزوها حطوها فوق الزربية هي ممدودة على لرض ؛ وائل ممدود على فراشو ؛ منا تحرق ومنا تشوي حسام كل مرة اشوف في واحد فيهم ....
الشيخ طلب منهم اغطوها بدرا حتى ما تتكشفش.
راحت هند جابتو وغطاتها ؛ طلب منهم كامل يبعدو عليها وحط يدو على راسها ورجع يقرأ في القرآن وكل مرة يرفع صوتو بالشوية ...
رجعت تتحرك في كل الاتجاهات كامل حايرين علاش ...
جا حسام أقرب منها هز الشيخ يدو وطلب منو يبعد عليها ...
هو يقرأ وهي تتحرك حتى شاف حاجة خارجة من تحتها حشرة غريبة جاية في اتجاه تاعو تتمشى بالشوية دايرة كيف العنكبوت مؤ كحلة بزاف حتى شكلها أخوف .
الشيخ رجع رفع صوتو اكثر من قبل زادو خرجو منها هاذوك الحشرات مي راهم بزاف جاو كامل في اتجاه تاعو هز موس وقسم ذيك لولة لي خرجت منها ؛ ويا عجابة ما ماتتش بالعكس كل طرف رجع يتحرك في جيهة ...
كامل رجعو اعيطو من الخوف ؛ الشيخ طاب منهم بريكي لذا كاين ورجع اعيط باش امدولو بريكي قدم طارق لانو يتكيف ومدلو شعل النار في ذيك الحشرة ماتت وحتى لخرين ماتو من دون سبب.....
الشيخ : للأسف ما قدرت ندير والو لحقت عليها روطار ما عندكم ما ديرو من خلف تستنو ربي اهز امانتو ....
زينب داخت وطاحت ؛ حسام قعد على ركايبو ماشي مصدق الشيء لي راه صاري في دارو ؛ الشيخ من التعب لي هلكو قعد فوق لرض والعرق في وجهو ...
الشيخ : كون تهزوها تدوها لسبيطار احسن ...
طارق دار الكوراج قنع حسام هزوها وراحو ....
حاط راسها فوق حجرو وهي شغل راقدة ؛ طارق اسوق بسرعة عالية ...
حسام غير اشوف معاها ؛ شوية فتحت عينيها تبسمت ودورت وجها ...
حسام : يما يما ؛ شوفي معايا يما ....
ما قدرش افيقها؛ شافها ماشي تتنفس والو ...
حسام : طارق يما ماتت .
#يتبع 😈