🕯السحر الملعون 🕯
#شيطان زوجي 2
#صونيا
🤍الحلقة 78🤍
********************
واقف عند راسو وهو يتخبط ؛ ما فهمش علاش راه هكذا كاين باين عليه غير راقد ....
الشيخ: اسي حسام فيق واش لي صرالك ...
قعد افيق فيه أكثر من 15 دقيقة ...
كي فتح عينيه شافو واقف قدامو هز غير شوية شواربو ...
حسام : اه وين .......
الشيخ: راك ترعف يا ولدي ؛ وش بيك ...
حسام فتح مليح عينيه باين بلي رجع لوعيو ...
حسام : شفتو لقبر وراني متأكد بلي هو ...
الشيخ: لحكاية هاذي تدي وقت طويل يا ولدي ...
ممكن شهر ولا سنوات ...
حسام : ما اهمنيش الوقت ؛ اذا ربي طولي عمري نلقاه لازم نلقاه ؛ بنت ولدي؛ خوها ؛ ميسون ولدها كامل مربوطين بهاذ لقبر ....
الشيخ: ميسون علاش نورمالمو يحميها باباها ماشي اخليها هكذا ....
حسام: راحت عندهم خرجت قبيل يدها مجروحة ؛ قالت بلي ربطها مع خوها يعني واش يصرا ليهم لزوج ...
الشيخ: أعوذ بالله واش هاذ العباد ؛ سبحان الله بنتو وما رحمهاش؛ شوف ولدي اعطيني كل التفاصيل لي تعرفهم وانا نحوس من جيهتي هكذا نربحو وقت ....
روح حسام لدارو بعد ما تفاهم مع هاذاك الشيخ ؛ غير ما دخل شاف دارو كامل د.م رجع اعيط على طول جهدو خايف عليهم ؛ خرجت ليه هند تجري خايفة...
لقاتو ينهج ماشي قادر يتنفس ؛ غير بالشوية تحكي معاه رجع يتنفس وتنحالو الخوف ...
مراد راح ليهم باش اشوف واش كاين لقاه في لرض ...
مراد : عمو حسام غير الخير مالك ...
حسام : لازم نروح نشوف طبيب يا ولدي ....
هزو مراد وخلى ميسون مع هند وزينب ....
دقايق وصلو ليه ؛ دخل حسام وحدو ومراد قعد برا يستنى فيه ...
الطبيب: مرحبا سي حسام راك تعبان يضهرلي وجهك ماشي عاجبني...
حسام : ايه والله ماني مليح كامل ...
الطبيب: ياك قتلك المرض تاعك ما احبش لقلق ؛ شوف لازم نديرلك فحوصات من بعد نحكو ....
دخلو دارلو سكانار على جسمو كامل ...
مع خرجو النتائج الطبيب وجهو ماشي مليح نقلب كامل ...
حسام : انت لي وجهك ما افرحش ذرك ماشي انااااا ...
الطبيب: والله ما لقيت ما نقول ماشي عارف منين نبدا ....
حسام : اصبر انا نقولك عندي ورم في راسي وما بقاليش ونموت هكذا ...
الطبيب طاحلو الستيلو من يدو ...
حسام : عندي كثر من شهر وانا علابالي كل ليلة نحلم بيه نفس الحلم والمشكل اني نحس في راسي يوجعني ما نقدرش نتحمل سورتو كي نتقلق ؛ مي مستحيل تقول هاذ لكلام لعايلتي ممنوع يسمعو فهمت انا تقبلت الموضوع من مدة كبيرة ؛ خيرت ولدي هو مزالو صغير ....
الطبيب شوف فهمت نص كلامك اما لخر واش قلت أبالي لغز كون تشرحلي كلامك ....
ضحك حسام ضحكة صفرة : لا مكان والو كنت نحكي مع نفسي بصوت مرتفع انا الحاجة لي نحب تدنعرفها شحال بقالي ...
الطبيب: ما نقدرش نعطيك وقت محدد مع انو حسب ما راني نشوف عامين ما تفوتهمش ؛ اما الأعمار بيد الله .
مي كاين حل ثاني la chimiothérapie نقدرو نربحو وقت بيها ...
حسام: راك قلتلها الأعمار بيد الله نحب الوقت لي بقالي نعيشو مهني في وسط عايلتي فهمت اذا كاين دوا نشربو معليش اما الباقي لا ....
الطبيب: نمدلك تراتمو مي لازم ومحتم عليك مرة في شهر لازم تجي نشوف وضعك ......
تفاهم حسام مع الطبيب وخرج من عندو في لول وجهو مهموم ماشي قادر اخمم انو وقت قصير ممكن اموت وحطوه تحت التراب كان متمني اشوف حفيدو يكبر ويرجع راجل ؛ غير ما شاف مراد رجع يضحك معاه شغل مكان والو ....
مراد : عمو حسام واش قال الطبيب...
حسام: مكان والو جديد ولدي بدلي الدوا برك هايا ولدي نشري دوايا ؛ ونعيطو لوائل اجيب مرتو ولولاد توحشتهم ....
غلق عينيه باش اريح روحو من التخمام ؛ رجع احس روحو في دوامة كلشي ادور عليه ؛ حتى شداتو الدوخة ...
غير ما دخل لدارو قالهم نريح شوية ونجي ...
ميسون حست انو كاين حاجة خلاتو يطلع ولحقاتو ...
ميسون: عمو حسام نقدر ندخل ...
حسام : تفضلي بنتي...
دخلت شافت معاه وقالت : شوف ندخلها ديراكت ؛ شفت في وجهك مارة في الجيهة اليسرى عندك علامة وانا نعرفها مليح مليح ؛ بلا ما تكذب عليا غير احكي وقولي شا عملت .....
حسام : واش عملت يا بنتي شريت الدوا هاو ليك وجيت حتى الطبيب قالي كلشي مليح...
ميسون : يا تحكي يا نهبط ليها نحكيلها وانت دبر راسك معاها .....
حسام شدها من يدها ودارلها إشارة بيدو لخرى باش تقعد .
حسام : ما بقاليش بزاف يا بنتي ونموت على وجه ربي غير هند لي موحال تسمع ...
ميسون عينيها دارو بالدموع : يعني قبلت بالعقد هكذا؛ علاش يا عمو حسام ؛ علاش خليتو دارلك هكذا وتقبل بحاجة هاذي ...
حسام: راه ولدي موحال نشوفو ميت قدامي موحال نقدر نتحمل ؛ عندو زوج اولاد مزالو يحتاجوه ؛ انا عشت حياتي الحمد لله يعني حتى وان نموت ؛ ولازم نموت راهي حق علينا يا بنتي ماشي حاجة نقدرو نهربو منها ...
ميسون: شحال الوقت غير قول ...
مجا اكمل كلامو خرج مازر من وراه وشاف فيها وقالها بصوت مرتفع : 3 سنين نخليلو ؛ من بعد نجي نديه هو وانت واش رايك !!!؟؟؟؟....
#يتبع 😈
VOUS LISEZ
السحر الملعون " الجزء الثاني تابع لشيطان زوجي "
Horrorحصريا على #🕯chronique-DZ 🕯 🤍#السحر الملعون🤍 #شيطان زوجي 2 #الكاتبة : صونيا #الكوفر : زينب راقد على كرشو يحكي في التليفون والنعاس يدي فيه ماشي قادر يفتح عينيه وصوتها خارج من التليفون: وائل اهدر علاش سكتت وينك .... سمعت شخير عرفت بلي رقد حكمها...
