السحر الملعون " الجزء الثاني تابع لشيطان زوجي "

الحلقة 8

🕯#السحر الملعون🕯
#شيطان زوجي 2
#صونيا
🤍الحلقة 8 🤍
************
طلعت تجري مع حسام كي سمعو الزجاج تهرس دخلو لقاو كلشي مكسر في بيتو ...
خرج وائل من الدوش قالهم بالاكو لا تتجرحو ..
حسام : واش صرا هنا قول علاش
كلشي مكسر ....
وائل: كنت ندوش خرجت لقيتكم هنا وكلشي مكسر 🙄🙄🙄🙄 يعني ماشي انتوما لي كسرتو الحالة اه ....
طلعو رأسهم فيه حايرين من كلامو ....
هند : تحكي من نيتك ولدي ما سمعت والو ....
وائل: حتى شيء ما سمعتو اكون ريح خبط الحالة 😏😏😏😏 دار الريحة قعدت غير هي واقفة وشاف مع يماه ...
وائل: ماما عندي رونديفو اذا طولت ما تخافيش اكي ....
هبطت هند بلا ما تحكي خلات حسام مع وائل  ...
تتمشى حطت رجلها في الدروج حست يد ورا ظهرها
مجات دور حتى دزتها ذيك اليد وطاحت في الدروج من فوق لتحت ....
سمعو الطيحة خرجو يجرو لقاو هند تحت فاقدة وعيها ما تتحركش ...
هبط حسام يجري مخلوع في مرتو لي راهي لتحت خايف عليها بزاف ماشي مصدق الشيء لي صرالها .....
وائل غضب بزاف وتوقع شي كيف هاذا يتهجمو على واحد فيهم باش هو ما يخرجش هبط عند يماه لقاها فطنت وتحركت مي يدها وجعتها باين بلي تكسرت مي الحمد لله جات هكذا ولا أكثر.....
حسام تفكر هدرت هاذاك الشيخ لازم اسقسيها
لازم يعرف الحقيقة من هند ممكن راهم اهددو برك هاذ الشياطين ماهمش حابين يقتلوها....
******
خرج ركب الطونوبيل تاع باباه مع شعل الضوء شافها واقفة قدام البورطاي كلشي كحل غير عينيها لي حومر
عقد حواجبو وبان عليه الغضب ....
وائل: تحبي تمنعيني ما عليك غير تاخذي روحي هاذا هو الحل ....
وحكم ديمارا ديراكت حتى الطونوبيل دارت الحس خلات حسام خرج اشوف واش كاين ....
وهنا شافها حسام اول مرة اكون ماشي في حلم اشوفها واقفة  تشوف معاه وحاطة صبع على فمها لي كبير بزاف وديرلو إشارة تاع اسكت ....
قعد مفيكسي فيها سمع صوت هند دار اشوف كي رجع راسو هاذيك راحت خاف على وائل بزاف ودخل اعيطلو باش يرجع ماهوش حابو ابعد عليهم سورتو هاذ الليلة .....
مي وائل ماهوش ارجع وحسام لازم يدي هند لسبيطار على يدها تخلطت عليه ولا دخل وجد مع مرتو صاكها وهز اللوطو لخرى وراح لسبيطار .....
******
وصل وائل لقا صاحبو يستنا فيه قارا اللوطو وخرج عندو كانو في الكورنيش سلمو على بعض وبداو يتمشاو ....
وائل: مالك صحبي باين لحكاية واعرة ....
ولد زينب : ايه ماشي غير واعرة ما لقيتش منين نبدالك ....
وائل: لي في لسانك ابدا بيه راني واجد ما تخافش ....
شاف معاه مليح وقالو : انا ولد زينب صاحبت هند ....
وائل وقف من المشي دار ليه عل عويناتو وقرب ليه شدو من التريكو تاعو وقربو ليه وجهو في وجه لوخر وقال : عاود انت ولد زينب اه هاذو سنين وحنا صحاب هاذا وين تفكرت تقولي عشرة كثر من عشر سنين جاوب عليا مراد ......
مراد هبط راسو وقال : كون تعطيني فرصة نحكيلك وتبطل عليا خشونية الراس تاعك .....
جبد روحو وقالو : اسكت خلي نهبطو لشط نشعلو النار وحكيلي كلشي بلا ما تنسا حاجة حتى التنهينة لي درتها ما تنساهاش فهمت ....
هبطو حوسو على حطب شعلو نار وقعدو....
مراد : ماما كانت تحب واحد وهاذ الإنسان كان داير حاجة ماشي مليحة في باباك مي ماما مكانش علابالها زوجت بيه بالفاتحة وحتى انها حملت منو قبلي انا وطاحلها في الشهر الرابع من بعد جيت انا اصلا زدت خارج لبلاد كانت ماما تقرا كي رجعت لقات بابا في ذيك المصحة تاع لمهابل ويماك مزوجة باباك وكثرو المشاكل عليكم وعلينا ماما فضلت تبعد وتقرا باش تقدر تعاون بابا وانا قعدت عند جدة هي لي رباتني وسنين من بعد تلاقيت بيك في المدرسة وكبرنا مع بعض حتى اني ما كنتش نعرفك حكاتلي عليك ماما ....
هي تحبكم بزاف بزاف وانا ثاني .... وائل انت خويا ماشي صاحبي فهمت كرهت اني نخبي عليك حقيقتي قلت لماما باش نخبرك مي خافت خافت عليا لا ما  تتقبلونيش ؛ كي عاد انا ولد طارق ... الله غالب ماشي انا لي خيرتو حتى اني شفتو مرتين في حياتي صدقني اني تحرمت منو تحرمت من كلمة بابا من حنانتو عشت طفولتي مع ولاد الجيران هوما يجرو عند والديهم وانا نجري عند جدة لا ماما ولا بابا كانو حاضرين في حياتي ههه انت راك فيها أكثر منهم ....
وائل قلبو تقسم على صاحبو هبط
راسو وحشم لي تعامل معاه بهاذ الطريقة لي ماشي مليحة ....