🕯السحر الملعون 🕯
#شيطان زوجي 2
#صونيا
🤍الحلقة 31🤍
**************
هند واقفة قدام لمراية حاصلة اذا تخبر ولدها بكلام حماتو ولا تخلي كلشي في قلبها بلا مشاكل تسيي تحلهم هيا وائل ماشي ناقصو ...
دخلت عليها زينب فرحانة ...
هند : جيتي ختي وينو مراد توحشتو ...
زينب: شوية مقلق راح عند ميسون عيطتلو ...
هند : ميسون شكون ثاني هاذي ما كنتش علابالي بلي بدال حبيب خالتو ...
ضحكت زينب: ميسون هي نفسها آية عندها زوج اسامي وحنا عجبنا لول ...
هند : وكون اقوللنا وين تسكن وبنت شكون نخطبوهالو نفرحو بيه حتى هو ...
زينب: عييت فيه قالي مزال الوقت خلي نستونو وصايي ؛ واش وائل قرر العرس السمانة الجاية ما حبش ابدل رايو ...
هند قعدت فوق كرسي غلبت من هاذ لحكاية .
هند : يا ختي راه غالط فيها كون غير ما يزوجهاش ماهيش مليحة لا هي ولا يماها قباح بزاف بزاف ولدي غير ساكتلهم ما فهمتش واش بيه .
زينب: وائل ما اديرش حاجة غير هكذاك نعرفو مليح ممكن شاف فيها خير ممكن يعرفها خير منا منين علابالي...
هند : اليوم عيطتلي وبهدلتني والله ما لقيت ما نقولها قعدت غير ساكتة مانيش حايبة المشاكل ...
بالشوية نسكتو حتى يزوجو نهار اكونو مع بعضاهم هي تهدى ...
قعدو يحكو مي ما علابالهمش بلي وائل راه يسمع في كلامهم حتى بدلو السوجي باش دقدق الباب ودخل ...
وائل: خالتي مرحبا واش حوالك شفتي عمو طارق ان شاءالله راه مليح باين عليك فرحانة ...
زينب: الحمد لله يا وليدي راه مليح ...
وائل: قريب يخرج هكذا قالي مراد قعد كثر من 20 عام ثمة يعني خلص دينو ...
شافت زينب في هند وسكتت ...
هند : كون نبدلو الموضوع ماشي خير ولدي حصلتني بالعرس هاذا تاع سمانة كيفاش نوجد الحال ضيق ...
وائل: انت سع اليوم نحي البلاطر من يدك و ما تخافيش انا وبابا نوجدو كلشي انت وخالتي غير ريحو ....
خرج خلاهم اشوفو فيه وجهو باين ماشي نورمال وزيد باين بلي حايب اخبي غضب تاعو ...
عيط لحماتو وطلب منها تهبط للكافيتيريا عندو كلام معاها ...
كي هبطت طلبلها قهوة وشاف معاها : انت كيف ميمتي ما غلطتش معاك حتى في حاجة حتى نهار لي جيت وقلتلها خلاص كانت هي مع واحد آخر يعني ما ظلمتهاش...
وذرك حاولت تنتاحر مع هاذ الشيء قبلت نزوج بيها قلت كلشي افوت عادي مي انكم تلحقو يما هاذي لي موحال نقبلها عندك شي حاجة احكي معايا انا يما ما نحبش نزيد نسمع بلي درتو عليها لا انت ولا بنتك نديرلك الجنة فوق لرض اذا انت تحتارمي يما اما اذا العكس تشوفي مني شي عمرك ما شفتيه ...
ناض حتى قهوتو ما كملهاش باسها على راسها وراح ...
قعدت تشوف معاه والشر خارج من عينيها ...
ام سلمى : معليش احكي كيف تحب ذرك انا لي رايحة نخليك تركع تحت رجليا وتطلب مني السماح على واش قلت اليوم ؛ نولي انا هي كلشي انا لي نمد الأوامر وانت تنفذ ....
شربت قهوتها وطلعت عند بنتها شافت معاها ..
ام سلمى : العرس مكانش باش اكون في علمك .
عيطت لهند خبرتها بلي لغاو العرس هكذا المرة الجاية تشد فمها...
هند : علاش غير احكي واش صرا ...
ام سلمى : ولدك جا وبهدلني قالي انت عايبتي يما ما خلى ما قال وانا كرامتي ما تسمحليش ناسب واحد كيفو هاذا غير خاطبها وهكذا كي تزوج كيفاش ...
هند : راني جاية استنيني ..
خرجت تجري مخلوعة في الكارثة لي صرات بسبابها وقالت سور وائل سمع كلامها مع زينب على بيها وجهو مقلب اليوم ....
وصلت عندها ما حبتش حتى تسلم عليها ...
ام سلمى: لا سلام لا والو تبهدلو فينا ونحبو تسلمو ...
هند : امسحيها فيا سامحيه وائل احبني بزاف وصدقيني ما قتلو والو ...
ام سلمى : انا قلت لي عندي كملت لحكاية ...
هند : كون يسمع وائل والله ادير حالة قوليلي كيفاش نرضيك وانا مستعدة مانيش حايبة فرح وليدي اروح في جرتي ..
ام سلمى: دار لبنتي وحدها وتزيديلها بارور والشيء لي نقولو ديريه وكون يسمع وائل هاذ المرة والله ما نتراجع...
هند : مي راه تفاهم مع باباه اعيشو في الفيلا راهي كبيرة بزاف .
ام سلمى : مام اعيشو ثمة لازم تمدولها دار علابالي بلي عندكم علاش خسارة فيها ولا كيفاش ...
هند : اكي قابلة مي يقعد كلشي بينا ...
راحت هند تروح وهي راحت عند بنتها ...
سلمى : ماما فريتيها قولي ...
ام سلمى: كلشي كيف خطتت انا راه ماشي ....
#يتبع 😈
VOUS LISEZ
السحر الملعون " الجزء الثاني تابع لشيطان زوجي "
Horrorحصريا على #🕯chronique-DZ 🕯 🤍#السحر الملعون🤍 #شيطان زوجي 2 #الكاتبة : صونيا #الكوفر : زينب راقد على كرشو يحكي في التليفون والنعاس يدي فيه ماشي قادر يفتح عينيه وصوتها خارج من التليفون: وائل اهدر علاش سكتت وينك .... سمعت شخير عرفت بلي رقد حكمها...
