السحر الملعون " الجزء الثاني تابع لشيطان زوجي "

الحلقة 52

🕯السحر الملعون 🕯
#شيطان زوجي 2
#صونيا
🤍الحلقة 52🤍
******************
كانت  متسطحة طبطبت الباب عليها طلبت تدخل....
سلمى : ادخلي ....دخلت وراحت ديراكت قعدت عند رجليها فوق السرير ...
هند: بنتي جيت نعتاذر منك ما حقنيش......
قطعتها سلمى: صايي لي فات مات شغل ما سمعت والو انساي ؛ انا ذرك همي غير البيبي لي في كرشي برك ؛ لازم تحموني منها نخاف ديلي حاجة ....
هند : سمية عاقلة موحال تضرك صايي رجعت نعرفها ذرك.....
سلمى : هي ضرتي وانا نخاف منها سمعتي .....
شافت معاها هند وضحكت ليها ضحكة صفرة ...
هند: كشما تشهيتي تاكلي ولا حاجة نديرهالك ....
سلمى : لالا مي حايبة غير نرقد برك ....
خلاتها تروبوزي وخرجت.....
غير ما غفات شافت روحها تهوم في دار كبيرة وشابة بزاف تمشي وتشوف في ذيك الدار مي فيها جانب أخوف حتى انها لحمها كامل تشوك .....
سلمى شافت طفلة صغيرة تلعب قربت منها هربت ذيك الطفلة وقاعدة تضحك ؛ وصوتها عبا لمكان ورجعت ظحكاتها تتردد في كل بلاصة ؛ .
حست بحاجة شادة فيها من رجلها كي هبطت راسها شافتها بين رجليها وحاكمة فيها مي يديها كلهم د.م ....
نخلعت سلمى وفاقت من النوم تاعها ؛ كانت عرقت بزاف بزاف حتى انها ماتت بالعطش ؛ خافت تحط رجلها في لرض على جال هاذاك لمنام ....
دخل وائل لقاها هكذاك عرقانة قرب ليها ؛ هز منشفة ورجع يمسحلها في وجها ....
سلمى : من نهار لي زوجت فيه هاذي اول مرة تكون حنين معايا ؛ واقيل السبة هو البيبي ياك ....
وائل: المرة لي فاتت كي كنتي بالحمل قتلك حوايج ماشي شابين وندمت على بيها انت ضيعتيه؛ اما هاذ المرة ننطهلى فيك أن شاءالله....
جبدها ليه وحطها في حضنو .
سلمى : كون علابالي هكذا دير راني حملت من مدة وكل عام نجيبلك طفل كيف الارنوبة .......
قعدو يضحكو ؛ نفس الوقت جات سمية هابطة وسمعت ضحكتهم هبطت راسها وراحت تخمم اسكو دارت حاجة مليحة كي زوجت بيه ولا غلطت حياتها ......
****************
نزلت قعدت مع هند وجها شهب ....
هند : سمية غير الخير واش صرالك ....
سمية : لا والو تعبانة برك ؛ نريح شوية نولي عادي ما تخميش ؛ قلت لوائل نروح لدارنا اليوم نقعد ايامات هو يرتاح وانا ثاني ....
هند : زعفتي كي سمعتي بلي راهي اونسانت ؛ ان شاءالله ربي يرزقك انت ثاني ما عندكمش بزاف ملي زوجتو يعني مزال الحال ....
سمية : صدقيني راني خايفة نجيب لولاد ويتعذبو شفتي حالتنا ؛ رانا كيف حكايات المسلسلات ....
او زيد خلص الكونجي ؛ لازم نرجع نخدم عندي بزاف قضايا معلقين ....
هند : معليش بنتي معليش انطهلي في روحك ...
اوصل وائل ولا تروحي وحدك ....
سمية : قلت نخليه على راحتو نطلب من عمي اوصلني اذا راه قاعد ....
هزت شوية قش غير باش تبدل وراحت مع حسام حتى انها ما شافتش وائل.....
غير لحقت لدار باباها دخلت سلمت على ختها
سمية : هاكي صاكي حطيه في البيت نغسل وجهي ونجي ....
ختها : قبل كاين ضيف راه في الصالو يستنا فيك ...
حارت سمية ودخلت كي شافاتو ما أمنتش عينيها ....
وائل: صار هكذا تروحي حتى ما حوستيش عليا وين راني ....
ضحكت سمية وقربت ليه : شفتك لاهي ما بغيتش نزيد عليك هذا مكان ....
وائل: سمية حكاية سلمى والبيبي ....
ما خلاتوش يحكي حتى كلمة وقالت : انا كنت راضية بكلشي يعني حتى هاذ الشيء راه داخل في رضايتي؛ ماشي معناها ما نغريش عليك بالعكس كي نشوفك معاها عقلي اطير نهبل مي من بعد نتقبل ونقول المهم راني معاه وحبني ؛ حتى انا نتمنى نجيبلك اولاد ونولي ام أولادك بعد ما راني مرتك ....
فرح وائل بكلامها عنقها وقال : واش درت انا حتى ربي يعطيني مرا كيفك ....
سمية : اصبر نجيب قهيوة نقعدو بيها ريوسنا واش قلت ....
وائل: راني خدام وخليت كلشي وجيت ....
سمية : خلاص مالة انت معاقب باباك اعاقبك من بعد كمل فيها وشرب مع مرتك قهوة ....
قعدو يضحكو وريحت القهوة معمرة لمكان ......
******************
سلمى فطنت قعدت تحوس عليه ما لقاتوش ...
هزت تليفون عيطتلو ما اهزش رجعت تمدت في فراشها؛ شوية زادت نعست وحست يدين يسمحو في جسمها كامل ؛ مي ما قدرتش تتحرك خلاص كانت شغل مشلولة ....
تسمع في ضحك اولاد ويتجاراو؛ تلمح في خيالات برك مكانش حاجة باينة قدامها ...
خافت مي ما قدرتش تتحرك ؛ شوية وسمعت تليفونها اصوني كيفاش ناضت وكيفاش تحركت ما فهمت والو رجعت تقول سور راني نحلم ....
#يتبع 😈