🕯#السحر الملعون🕯
#شيطان زوجي 2
#صونيا
🤍الحلقة 5 🤍
************
خرجت رفدت طاكسي راحت لسبيطار تشوف طبيب على راسها زينب مزالها تحس بدوخة ....
قعدت صونا تليفونها ...
زينب : الووووو ولدي راني في سبيطار شوية ونجي راك عند جداتك ياك ....
ولد زينب : ايه ماما غير الخير علاش راكي في سبيطار كشما رايحة تشوفي مريض ولا رايحة عند بابا ....
سكتت شوية وقالت: حسيت بدوخة برك جيت عند زميلي ما تتقلقش ولدي .....
هنا ولدها حس بصوتها ماشي كيف ما يعرفو ....
ولد زينب: راكي سور ماما حتى صوتك متبدل قول الصح واش بيك ....
زينب : يا ولدي البارح سهرت مع خالتك هند وتعبت هاذا ماكان ...
ولد زينب: او ويكت تع فيني عليها راهي جايتني صعيبة كل مرة مع وائل ما نقدرش نقولو انا ولد زينب ماما لازم تحلي هاذ الموضوع بزاف هكذا او زيد ذرك راني كبير ماشي صغير نقدر نتحمل مسؤوليتي
دموعها طاحو تمنات كون هند فرحت معاها في وليدها ماشي تخبي عليها وكون تسمع واش رايح اكون ردت فعلها هي وحسام....
زينب راهي واقعة في مشكل كبير ما عرفتش كيفاش تحلو ومنين تبدأ فيه ....
دخلت عند زميلها وقاتلو بلي طاحت شافها وطلب راديو على راسها مي الحمد لله ما بيها والو حتى انو قالها لازم ترتاحي شوية ......
زينب رجعت لدار عند يماها ووليدها دخلت ديراكت لشومبرة ترتاح ....
غمضت عينيها راسها يوجع فيها شوية ورقدت تالمو عيات .....
دخل ولدها لقاها راقدة وبورطابلها اصوني ....
شاف لقا مكتوب هند رجع عليها ....
ولد زينب: الووووو ...
هند: الوووو شكون معايا ....
ولد زينب: ماما راهي راقدة تعبانة ....
هند شوكات من لي سمعاتو قال ماما ....
هند : قلت ماما زينب يماك ....
ولد زينب: هي في الأصل خالتي مي رباتني على بيها نقولها ماما مي غير تفيق نقولها تعيطلك .
قطع ديراكت عليها ...
قعدت هند حايرة كيفاش زينب جامي حكات حاجة هكذا ....
ندم لي رجع على تليفونها وقال ذرك انوضو المشاكل في جرتي حطو حذا راسها وخرج غلق الباب ....
******
زينب كانت مليحة راقدة في امان ربي حتى رجعت تنام في طفلة تمشي وصلت في وسط قبورا ومدت يدها وبصبعها قعدت تشير لواحد قبر حذاه مرا قاعدة تحفر وتقول لزينب روحي شوفي ....
راحت زينب تمشي بالشوية خايفة من هاذيك لمرا ....
وصلت لقاتها تحفر وتحفر ما بغاتش تحبس ...
زينب: على ماش راكي تحوسي قولي....
دارت ليها ذيك لمرا وهنا زينب تخطفت رجعت تعيط وطاحت من السرير ....
جا وليدها يجري ليها لقا حالتها حالة ماهيش قادرة حتى تتنفس رجع اهدء فيها بالشوية حتى قالت : لازم نشوف هند لازم ....
رجعت ترجف وحابة تخرج ووليدها أشد فيها ....
تعرات على ذراعها شافها مجروحة قعد اقول ماما واش هاذا كيفاش تجرحتي ....
شافو مع بعضاهم او في الجرح لقاوها مكتوب شووت وحذاها يد صغيرة ...
زينب قعدت فوق السرير حايرة من الشيء لي صرا موحال اكون صدفة موحال....
********
رجع حسام وائل لدار لقاو غير هند سقساو على زينب لقاوها راحت ...
حسام : كون غير شديتيها عندنا ايامات تروبوزي ...
هند: خفت عليها حسام مع واش صرالها كون تبعد علينا احسن ....
حسام : لا ياك الراقي ربي يرحمو قال ماشي مليح العزلة لازم نكونو ديما مع بعضانا ....
قعدو يحكو على هاذ الموضوع وائل طلع لشمبرتو تمد فوق السرير ....
تفكر سلمى لي ما حكاش كامل معاها ....
وائل: الوووو حبي اسمحلي والله ما قعدت اوزيد هاذا وين جيت من عند واحد توفى ....
سلمى : كنت غالقة التليفون اصلا ...
وائل: اممممم تتقلشي عليل هكذا ههههه
قعدو يضحكو ويحكو ...
دخلت عليه هند قعدت حذاه حكم هو حط التليفون بلا ما يقطع ورجع يحكي مع يماه ...
هند : ولدي ياك ماكش تشوف حاجة وهكذا ولا ياك تخبرني بكلشي ...
وائل: ماما مانيش صغير ذرك واصلا انا قادر عليها ما تخافيش ....
هند: انت فرد عوينة يا عمري لازم نخاف عليك او زيد راني حابة نفرح بيك هاذ العام تتخرج وان شاءالله تبدأ الخدمة مع باباك وانا نريح شوية ....
كشما عندك وحدة نروحو نخطبوها او اذا مكانش انا نشوفلك كاش وحدة بنت فاميليا.....
ضحك وقالها : كشما اكون نخبرك انت لولة اكي .....
باساتو وراحت خرجت ؛ رجع رفد التليفون وقال : صايي عمرتي لقرع ولا مزال ...
سلمى : عجبتني تاع بنت فاميليا علاش انا بنت برا مثلا 🙄🙄🙄 وائل ويكت تجي تخطبني راك طولت هكذا يماك تبركا ما تخطب في بنات الفاميليا ....
وائل: انت هاذا واش هزيتي من كلامها سبحان الله انتوما النسا واعرات .....
خلي كي قريب نكملو نقولهم عليك يخطبوك هكذا ما نجو نزوجو نكون خدام اناااا مع بابا ....
سلمى : وعلاش ما تخدمش في شركة كبيرة تكون عندك استقلالية ماشي ديما لاصق فيهم ....
وائل: هاذ الشيء ماشي حاجتك فهمتي هاذو والديا تقبلي مرحبا ما تقبليش باي .
قطع عليها مخليها تحكي وحدها ...
سلمى رايحة تهبل من تصرفاتو مي وعدت روحها انها تزوج بيه او تقلبو كيف ما بغات هي ....
وائل تقلق من كلام سلمى وقعد اخمم اذا راه غالط بهاذ العلاقة او وين رايحة توصلو ....
مد عينو شافها واقفة في لكوانة تاع الشومبرة شاف فيها مليح وقال : علاش تظهري غير في الوقت لي انا نكون مقلق زعما تبالك راني مهزوم وضعيف هههه راكي غالطة ومهما ديرو موحال تخوفوني.....
#يتبع 😈
VOUS LISEZ
السحر الملعون " الجزء الثاني تابع لشيطان زوجي "
Horrorحصريا على #🕯chronique-DZ 🕯 🤍#السحر الملعون🤍 #شيطان زوجي 2 #الكاتبة : صونيا #الكوفر : زينب راقد على كرشو يحكي في التليفون والنعاس يدي فيه ماشي قادر يفتح عينيه وصوتها خارج من التليفون: وائل اهدر علاش سكتت وينك .... سمعت شخير عرفت بلي رقد حكمها...
