🔥الصفحة 44🔥(مكتملة الجزء الاول)

part5

//الصفحة 44//

🌷بارت 5🌷

أرسلان (بتهكم) : سي مراد زيدان ما يمكنش يفلت و لو فرصة باش يتزلل على الواليدة. ياك اولا؟
مراد (بعصبية) : اش هاد قلة الأدب باش كدوي معايا نتا دوي باحترام
أرسلان (بصوت مرتفع) : ال*ب نعام ا سي ماشي الاحترام
مراد (بصدمة) : راني راجل ماماك يعني فمقام با..
أرسلان (قاطعو بنبرة تحذيرية) : حدك تم ا مراد زيدان.. هاداك اللي باغي تاخد بلاصتو تجبدو على فمك نتكيك هنا و بربي لا فكك مني شي زامل
مهيرة (بالغوات) : صافي باركة!!! اش هاد قلة الاحترام ا ارسلان؟ واش كل صباح نصبحو على صداعك نتا و مراد؟ راعي غير شوية لحالة ماماك
أرسلان شاف فماماه بحزن و يالاه بغا يقرب عندها و هي تنوض خلاتهم و طلعات لبيتها. بغا يتبعها و هي تشدو مهيرة
مهيرة : خليها... انا غادي نمشي نشوفها (تنهدات) الله يهديك ا ولدي صبر غير على قبلها
مشات مهيرة و بقات دارين جالسة وسط أرسلان و راجل مو مراد و هي حاسة باللي الحرب اليومية ديال هاد الجوج مزال ما سالات
ارسلان (و عينيه كلهم شر) : هاد المرة دوزتها ليك و لكن شحال ما بقيتي نهايتك غتكون على يدي ا مراد زيدان
مراد (بتهكم) : طير و لا نزل غنبقى راجل ماماك
َارسلان (شنق عليك) : ينعل ديلمك يا الزامل
طلق منو!!!! واش هاد لعب البراهش ديالكم مغاديش يسالي ؟؟ ما بقا احترام فهاد القصر؟؟؟؟
أرسلان (طلق من مراد) : نتا اللي بقيتي ناقصني.... خرج منها ا أزاد
أزاد (بنظرات ثاقبة) : نتا راه كيزمل عليك الضمير مرة مرة و الا بغيتي راه نبردو ليك
أرسلان (بتحدي) : يالاه بردو ليا و فرجني
يالاه جاو هاد زوج يتشادو و هوما يسمعو صوت جداهم اللي كيتعتبر جرس إنذار فالقصر... كطل عليهم من الطبق الثاني و شادة تسبيحها فيدها
عزيزة : ازاااااد تبعني للمكتب (و بابتسامة تهكم) اما نتا ا ولد بنتي من بعد و نتفاهمو حسابك تقااااال معايا
شاف فيها أرسلان ببروووود و خرج من القصر بلا فطور اما أزاد لقى نظرة أخيرة على ختو دارين و راجل عمتو مراد. نظرة اللي كانت كافية باش توصل ليهم ان الكينغ طلعو ليه تصرفاتهم الصبيانية فراسو، نظرة اللي من خلالها كيخلي كل واحد يرجع لمكانو الطبيعي.
أزاد فطبيعتو كلامو قليل مع كلشي تا من مو و ختو، و كيوصل اي حاجة بغاها غير بشوفة من عينيه. الا كان شي واحد قريب ليه فهاد الدنيا فهو صاحبو أركان و جداه عزيزة.
اما حتا أرسلان ولد عمتو مكيتفاهمش معاه بزاف حيت الا كان هو العناد فارسلان هو قصوحية الراس. و داكشي علاش ديما بيناتهم المشاكل حيت أزاد مستحيل ميخضعش ليه شي واحد و أرسلان مستحيل يحني الراس لازاد. شكون يصدق باللي هاد زوج اللي مستحيل يتلاقاو دابا كانو مكيتفارقوش فالصغر. أزاد و أرسلان كانو كيكملو بعضياتهم، كانو وجهان لعملة واحدة. ما كانت غير الموت اللي تفارقهم و معاهم حتا أركان اللي كان صديق طفولة لازاد. كان كلشي كيسمي عليهم ثلاثي A حتا وقع الشيء اللي خلا شق كبيييير يتولد بين أرسلان و أزاد.
فالمكتب....
عزيزة : خلينا من مشاكل أرسلان و مراد التافهين...كاظم وصل ليا شنو وقع البارح فالديبو
أزاد (جلس فكرسي كبير مرجع راسو و غمض عينيه) : مكنبغيش اللي ينبش مورايا ا مدام
عزيزة : مكنقلبش من موراك ا أزاد... انا كنحمي ظهرك راك وريثي الوحيد من بعد ما باباك
أزاد (حل عينيه اللي فرمشة عين ولاو جمرة و نطق بصوت رجولي مبحوح) : ما تكمليهاش ا مدام... و فيما يخص انك تحمي ظهري كنظن نتي أكثر وحدة عارفة شنو ربيتي لمدة سبعطاااااش لعام (طولها)
عزيزة (ربتات على كتفو بابتسامة جانبية) :عارفة مزيااان و متيقنة باللي انتقامنا غيكمل
رجع غمض عينو و رخا راسو على الفوتوي بلاما يجاوب جداه حتا سمعها خرجات و سدات الباب موراها و هو ينوض بشوويييية و وقف قدام واحد اللوحة و هو يكتب رقم سري فواحد الشاشة حداها و هي تبدل الصورة للي خلات وجهو حتا هو يتبدل معاها و عروقو خرجو و قال بصوت  مبحوح كفحيح الأفعى : إذا كنت انت النار فأنا الماء التي تطفأ شغف روحك... اني توعدتك الموت و ما أنا بوعودي مخالف.
كلمات خرجات من الأعماق كالشعلة اللي غير مكتزيد تحمي النار اللي فداخل أزاد... كلمات اللي ما ان خرجات من فمو حتا هز ستيلو فوتر كان قريب ليه و شوه ملامح الشخص اللي فالصورة و رجع بدلها بالصورة اللي كانت قبل بنفس الكود و خرج مسرع من المكتب فاتجاه شركتو.