🔥الصفحة 44🔥(مكتملة الجزء الاول)

part8

//الصفحة 44//

🌷بارت 8🌷

دخل أزاد للمكتب ديالو اللي هو عبارة عن حجرة كبيرة سوداء مقسمة عدة أجزاء.
الجهة للولة فيها فوتويات فالبني مغلووق كتوسطهم طبلة زجاجية صغيرة مزركشة بالذهب فالجوانب ديالها و تحتها زربية من جلد الحمار الوحشي و فالحيط معلق رأس حيوان و فالجاانب محطوطة مرايا كبيييرة شادة مساحة من الأرض تال السقف.
اما فجهة أخرى كاينة طاولة اجتماعات صغيرة جات بحال شي نصف دائرة فللون الابيض.. خاصة باجتماعاتو مع باقي الشركاء و رؤساء الأقسام فقط. أما بالنسبة للاجتماعات مع باقي الموظفين فمخصصين ليها قاعة اجتماعات كبيييرة فنفس الطابق.
و فاخر قنت من الغرفة كاين المكتب ديالو اللي مصنوع من أجود أنواع الخشب و كلو اسود بحال كرسيه اللي من أجود أنواع الجلد اللي يليق بالكينغ.
شركة العراقي هي أكبر شركة لهندسة الديكور بالمغرب.. و حتا فالوطن العربي و البلدان الأجنبية قدرات تحقق اسم كبيير فالسوق و تحقق نجاح كبير. هاد شي َكامل كيرجع لازاد و أرسلان اللي واخا العداوة اللي بيناتهم حاليا على الصعيد الشخصي قدرو يكونو ثنائي خطيير على الصعيد المهني. و لكن هاد شي لا يمحي ان أزاد ليه الحصة الكبيرة فالشركة بحكم انه الوريث الوحيد.
بقا أزاد محني على شي وراق خدام حتا كيسمع صوت الباب تحل و شي حد دخل بلا ما يطلب الإذن. بلاما يهز راسو خلا هاد الشخص يتقدم عندو و هو عارفو. و شكون ايكون من غير ذراعو اليمين فالخدمة و رفيق عمرو أركان اللي الوحيد اللي عندو الحق يدخل بدون الأذن على الكينغ فمملكتو حيت كون كان شي حد آخر فغيكون آخر نهار فعمرو.
أركان (شاد وراق فيدو و متردد) : أزاد نتا عارف باللي معهد هندسة الديكور اللي فطنجة دايرين معاه اتفاق اللي كيقول كل عام خاصنا ناخدو منهم  5 لسطاجيير اللي قربو يتخرجو
أزاد (بلاما يشوف فيه) : شنو الجديد؟
أركان (تنهد) : الجديد هو اللائحة ديال لي cv اللي مصيفطين ليا فيها سمية اللي غتخليك مصدوم سمية...
أزاد (قاطعو و هو باقي حاني على وراقيه) : (نطق كل كلمة بوحدها) جينا ياسر الجوهري (شاف فيه بنظرة غرييبة دخلات الرعب فقلب أركان)
أركان (بصوت جدي) : يعني صافي؟ نويتي عليها ا أزاد؟؟؟؟
ناض أزاد بلاما يجاوبو و لا يشوف فيه و مشا لواحد القنت فبيروه فين معلقة صورة لواحد الراجل و منقوش اسم تحت منها <سفيان العراقي>
أركان (حط يدو على كتفو و نطق بحزن) :الله يرحمو ا أزاد تال ايمتا غتبقا شاد فقلبك راه..
قبل ما يكمل جملتو دار شاف فيه أزاد بعيون حمريين كي الدم و نظرة حااارقة. نظرة اللي بحكم قربو منو كيعرفها أركان مزياااان. و كتعني باللي الخرا المخرنن واصل ليه للراس و من الأحسن تا واحد ما يجي فطريقو و لا غيخرج فيه القديم و الجديد و بالأخص الا كان عندو علاقة بهاد الموضوع.
رجع أزاد كيشوف فالصورة للي قدامو بوقفة رجولية كلها شموخ كيبان فيها عرض كتافو اللي قد السخط و هو داير يدو فجيوب الكوستيم الأزرق المغلوق اللي لابس مع قاميجة بيضا محلولة شوية الشيئ اللي كيخلي شوية من الوشمة اللي داير فنص صدرو تبان. هي وشمة شادة من نص صدرو تال كتفو اليسار و هابطة مع زراعو بشكل جمييل.
اما أركان فبقا واقف موراه مربع يديه و كيحاول يكتشف شنو ممكن يكون كيضور فراس صاحبو حتا نطق بجدية
أزاد : خرج........ كلمة قالها بلاما يتلفت و نظراتو باقا مركزة على التصويرة اللي قدامو. و حتا أركان ما عاودهاش معاه و خرج دغيا و بلاما يتقلق من طريقة أزاد الناشفة حيت حااافظو مزيان و كيف لا و هو صاحبو مللي عقلو على راسهم. و حتا أزاد اللي كيبقا الكينغ القاصح اللي ما فقلبو رحمة الا شي واحد غي فكر ياذي اركان فهو مغيترددش انه يمحيه من وجه الأرض.
أركان مغربي من ام تركية داكشي علاش زينو اشقر بحال ستيل ديال مهند. الشهر ازعر طويل شوية مرجعو ديما اللور بالجيل و مرة مرة الخصلات القداميين كيهبطو ليه على عينيه الشيئ اللي كيزيدو جاذبية مع عينيه الزرقيين اللامعين كي الكريستال.