🔥الصفحة 44🔥(مكتملة الجزء الاول)

part26

//الصفحة 44//
📝 الكاتبة ياسمين الوراق
🌷بارت 26🌷

🥀🥀🥀 قلب جريج.....و بعشقك الأبدي مريض
🥀🥀🥀قلب مهووس، مولوع، متعطش و ولهان
🥀🥀🥀اقفلت عليه و خضت حرب البرود كي انهي عذابي
🥀🥀🥀لكن وا اسفاه نيييران عشقك اذابت جلييد فؤادي

جينا (بصوت مرتعد) : الووو
أركان شاف فازاد للي جالس مقابل معاه و بااانت فيه تزير واخا عيا ما يخبي ثم نطق بصوت فيه شوية ديال الرسمية
أركان : وي بونجوغ مادموزيل الجوهري... كنظن عارفة لاش تاصلنا بيك ياك
جينا : وي عارفة
أركان : مهيم حنا طلعنا على cv ديالك و عجبنا. خصوصا أنه وصلاتنا هدرة مزيانة عليك من المدير
جينا (حشمات) : ميغسي هدا شرف ليا
أركان : و لكن بغيت ناكد ليك على حاجة مهمة. نتي غتخدمي فاكبر شركة ديال الديكور الداخلي فالمغرب. شركة الكينغ للي ما  كاين تا واحد ما كيعرفهاش لا هي و لا النظام الداخلي ديالها. يعني كنتي سطاجير و لا موظفة، نفس القانون غيطبق عليك و هادشي ابتداءا من اول نهار غتحطي فيه رجلك عندنا. تفهمنا؟
جينا (فكرات شوية) : سمحلي موسيو نسولك؟
أركان (باستغراب) : وي بيان سيغ
جينا (بنبرة واثقة) : نقدر نعرف علاش سميتو شركتكم الكينغ؟
أركان هز راسو مستغرب من سؤالها و شاف فازاد للي ما كانش أقل منو و كان مركز مزيان مع أي كلمة كتقولها
أركان : ما فهمتش علاش هاد السؤال!!!
جينا (ابتاسمات) : انا نقول ليك... اسم الكينغ كيعني السيادة و السلطة. كيعني انك تكون نامبر وان فاي حاجة كديرها. كيعني انك تكون متميز فالحاجة للي كدير و تخلي كولشي واخدك قدوة. إلا كانت شركتكم سميتها الكينغ يعني راها كتجمع كاع هاد الموصفات للي ذكرت ليك. و فهاد الحالة خاصها ناس للي شخصيتهم تكون كتعكس قيم الكينغ.
و انا بذكائي و حبي لهاد المجال و كذلك شخصيتي المتميزة  غنعطي أكثر ما عندي باش نكون عند حسن ظنكم.
كلمات قوية ما كانش متوقعها منها خلاتو يرضخ و يعلن هزيمتو المبدئي امامها. خلات ابتسامة جانبية مثيرة ترسم على شفايفو غصبا عنه. ابتسامة يمكن كتعبر على الرضى.. اه الرضى للي كيحس بيه و هو كيسمع كلماتها و كيشوف كيفاش البريهيشة للي ما كانتش تا الهدرة كتخرج ليها مقادة كيفاش ولات عندها لسان كيدي و يجيب فالهدرة مع الناس. ابتسامة للي تمحات اول ما شاف أركان كيشوف فيه و مطرع فمو ممصدقش شنو كيشوف قدامو. خنزر فيه تخنزيرة كي القرطاس و شار ليه جهة التلفون زعما كمل.
أركان : احم...داكوغ مادموزيل الجوهري غنشوفو هاد شي للي قلتي واش كينطبق عليك فعلا.
واش بإمكانك تلتحقي بالخدمة من السيمانة الجاية؟
جينا (سكتات شوية) : داكوغ
أركان (ابتسم) : مزيان...المدير ديالك غيعطيك البلاصة فين جات الشركة فمراكش و جميع التفاصيل على العمل. نشوفك نهار الاثنين مع 8 و نص. بسلامة (قطع)
جينا (باقا مصدومة) : هيييه 😲 مراكش
المدير (حط يدو على كتفها) : برااافو عليك هدرتي مزيان...(تعجب) مالك؟
جينا : هااه... (بحزن) بابا مغيبغيش يخليني نمشي لمراكش.
المدير : و لكن علاش؟ هادي فرصة مزيانة و لا لا؟
جينا : اه مزيانة.... و لكن بابا مستحيل يخليني نمشي لمدينة أخرى بوحدي.
المدير (كيفكر) : اممممم اوا شنو غنقول ليك....انا صراحة ما بغيتكش ضيعي هاد الفرصة من يديك. داكشي علاش قولي لباباك يدوز عندي غدا فالصباح و انا ان شاء الله غنحاول نقنعو.
جينا : بصح 😁 شكرا بزاااف موسيو
المدير (ابتسم ليها) : العفو ا بنتي هادي خدمتي.

****** عودة إلى المدينة الحمراء
أركان (تنهد) : سيمانة و تكون عندك
أزاد بلاما يجاوب حرك ليه راسو و ناض بشوية فاتجاه الواجهة الزجاجية للي فالبيرو ديالو و بقا ساكت و كيفكر.
كيفكر فاللي جاي، كيفكر كيفاش غيشوفها و كيفاش غيكون اللقاء. هاد اللقاء للي ياما خطط ليه و رسم.
كيفكر كيفاش غيتلذذ بانتقامو منها، كيفكر كيفاش يستمتع بعذابها و الأوجاع اللي غيسبب ليها.
و لكن بلاتي تسنا..... شنو هادشي ؟؟؟ واش قلبو كيضرب بالجهد؟ لا هادا ماشي غي كيضرب هادا كيدير زدردلاااف مللي سمع صوتها. لا لا ما يمكنش؟ واش ابتسم مللي سمع هدرتها؟ اكيد حماق!!! هادشي ممنووع فقانون الكينغ.. اه و لكن مسموح فقانون الحب.
الحب؟ اه الحب !!! الكلمة السحرية اللي خلاتو بلاما يشعر يفتخر بيها كيفاش كانت كتهدر بكل ثقة و كيفاش بينات على قوة شخصيتها.
الحب اللي مخليه متأكد باللي ديك القوة ماهي إلا قناع كتخبا موراه ديك الخوافة الصغيرة للي ياما كانت كتلقا فيه الملجا و الأمان.