//الصفحة 44//
📝الكاتبة ياسمين الوراق
🌷بارت 75🌷
🍂🍂
اعشق رائحة جسدك...و أسبح في زرقة عيناك
أشتاق إلى شهد ثغرك....واتوب أمام دفئك 🍂🍂
🍂🍂 اكتفيت.... اقسم يا عشقي اني اكتفيت
🍂🍂
الوقت يقدر يغير من شكلنا، تفكرينا و شخصيتنا، و لكن للي ميقدرش يبدلو الوقت هو الأحاسيس و الروابط اللي كتكون بين زوج الناس و بالخصوص اذا كان هاد الرابط هو عشق الطفولة.
عشق الطفولة للي كيبدا بالضحك و اللعب و كيتحول لتملك، غيرة و استحواذ و كيكبر مع الإنسان بحال عضو من أعضاء جسمو و كيقتات من ضربات قلبو يعني ما يوقف تا يوقف معاه نبضو.
خشاها وسط ضلوعو باستحواذ و ضمها بقوة بحال الا كيحميها و كيقول ليها ما تخافيش انا معاك و مغنخلي تا حاجة توقع ليك.
و حتا هي لقات فيه الدفئ و الأمان للي محتاجة تخشات فيه كي المشة بحال الا عرفات ريحتو للي لاقصة فنيفها للي مخشي فعنقو و كتصدر صوت انين خفيف من كابوسها بحال الا كطلب منو المساعدة.
زاد ضمها لصدرو و يدو مزال كدوز على شعرها بحنية و كيهمس ليها فودنها باش يخليها يتهدن
أزاد (بهمس) : شوووو...... (باسها فراسها) شوووووو (همس ليها فودنها) انا معااااااك
جينا (كتشهق و تنين) : اننننن...... خطفها اهي اهي... اننننن كانو كيلعبو بزووووج و هو خداها
أزاد (بقا ساكت و تنصت لهدرتها بتمعن) : شوووووو صافي عويناتي ما وقع واااالوووو (حط فمو على جبهتها و باسها بوسة طويلة خرج معاها تنهيدة سخوووونة)
بقا معنقها و متكي حداها تا حس بيها تهدنات و ناض من حداها بالشوية باش ما تفيقش، قاد ليها راسها فوق الخدية و غطاها.
لبس صباطو و رجع شاف فيها شوفة طوييييلة و تحنا خطف بوسة سريعة من شفايفها و خرج من مور ما سد عليها الباب بالشوية و لقا يامنة جالسة فواحد الكرسي كتسناه.
دار ليها إشارة بعينيه باش تبعو و نزلو بزوج بيهم لتحت و شاف فيها ببرود و نطق
أزاد (مد ليها يدو) : عطيني دوا
يامنة (دارت يدها فجيب البيجامة و جبدات بواطة د الدوا بيضا) : ها هوا... ما بقيتش كنعطيه ليها كيف طلبتي مني
أزاد (كمل بنفس البرود) : امم... رجعي عطيها دوا الاصلي للي خرج ليها الطبيب و بانتظام. بلاما نوصيك توقع ليها شي حاجة راسك يطير من بلاصتو
يامنة (بلعات ريقها) : كون هاني ا سيدي غنرد ليها البال
خرج من الفيلا و ركب فطوموبيلتو فاتجاه القصر و دماغو كيضور 360 درجة. كيفكر فهاد الحالة للي وصلاتو ليها من التناقض تا ولا كيقول يمكن عندو انفصام بالشخصية.
كيفاش كرهو للي قد الجبال كيذوب قدام نيران عشقو الطفولي ليها؟
علاش كل ما يعذبها قلبو كياكل العصا مضوبلة و كترجع ليه الصاع صاعين؟ علاش انتقامو منها مكتبقا عندو لذة قدام دموعها؟
يمكن هدرة أركان عندها يد بالموضوع؟ يكون كياثر عليه زعمة؟
تلف... ايييه نعام ا سيدي الكينغ للي يزعزع أمة على قدها تلفاتو البرهوشة كيفما سماها هو و خربقات ليه معادلاتو.
يامنة من بعد ما تاكدات باللي أزاد مشا، لبسات بينوار و بانطوفة و خرجات كتسلت من الفيلا تا وصلات لراس الدرب فين كانت واحد الفان (van) كحلة واقفة كتسناها.
وقفات قدامها و دقات زوج دقات فالزاج الكحل و مرة مرة تلفت موراها واش شافها شي واحد تا تحل الباب و هبط منو و هو عاقد حجباانو و نطق
كاظم : تعطلتي
يامنة (حنات راسها) :سمح لي را الكينغ يالاه مشا
كاظم (باقي عاقد حجباانو) : درتي شنو قلت ليك؟
يامنة (ابتاسمات بخبث) : وي درتو..قنعتو بللي غنعطيها دوا ديال الطبيب و رجعت ليه دوا ديال الهلوسة
كاظم : اممم مزيان.. هاكي (مد ليها بواطة) هادا دوا ديال الهلوسة الجديد للي غتبداي تعطيها بنفس الطريقة للي كنتي كديري مع الكينغ.
و الا كملتي هاكا الحاجة غتكون راضية عليك و ما يخصك تا خير (خشا يدو فجيبو و جبد رزمة ديال الفلوس حطها ليها فيدها)
يامنة (عينيها خرجو فالفلوس) : الله يخلف عليكم ا سيدي و الله يكثر خير للحاجة
رجعات يامنة فحالها للفيلا و سدات الباب موراها و مشات تنعس من بعد ما تاكدات باللي البنات ناعسين.
أنت تقرأ
🔥الصفحة 44🔥(مكتملة الجزء الاول)
Acciónمجددا رواية ❄️الصفحة 44 ❄️ على شاشة مختلف اللهجات و بقلم ياسمين الوراق بدون تقديمات مطولة و شعارات فارغة لانه القصة صدى ديالها وصل للي قراوها وو للي ما قراوهاش و قررت نزلها مجددا باش تكون فرصة يتعرفو عليها البنات كاملين قبل ما ينزل ال...
