🔥الصفحة 44🔥(مكتملة الجزء الاول)

part33

//الصفحة 44//
📝الكاتبة ياسمين الوراق
🌷بارت 33🌷

🌹🌹أصبحنا وأصبح الملك لله وحده لا شريك له له الملك وله الحمد وهو على كل شيء قدير 🌹🌹

فاقت جينا وجدات راسها باش تمشي لقرايتها و هي كلها امل ان المدير يقدر يقنع ياسر باش تمشي تخدم فشركة الكينغ فمراكش.
ركبات فالطوموبيل مع ياسر للي لحد الان عارف غي باللي المدير باغي يهدر معاه على سطاج ديال جينا و بلاما تقول ليه التفاصيل.
وصلو المعهد فين تلاقاو مع زهير و داليا للي سلمو على ياسر و تمناو لجينا حظ موفق. من بعد اتجهو لمكتب المدير اللي استقبلهم مزيان
المدير (كيسلم عليه) : اهلا اهلا موسيو الجوهري عاااش من شافك. صافا؟
ياسر : صافاا الحمد لله
المدير : اوا غبرتي علينا كون ما عيطنا ليك كاعما نشوفوك
ياسر : غي مع الأشغال راك عارف
المدير (شار ليه جيهة الكرسي) : تفضل جلس.. تشرب شي حاجة بعدا؟
ياسر (جلس) : نو ميغسي... اوا قول ليا اش دارت هاد السليعفانة عوتاني (غمزها)
جينا (تزنكات) : 😳
المدير (كضحك) : هههه لا لا تبارك الله عليها البنية ديما مشرفانا و من أحسن الطالبات عندي
ياسر (بافتخار) : الحمد لله
المدير (شاف فجينا للي كتقول ليه بعينيها بدا) : احم صراحة هادا هو الموضوع فاش بغيت نهدر معاك ا موسيو الجوهري (قاد الكرافاط ديالو) مادموزيل جينا تبارك الله اختارتها الشركة نامبر وان ديال ديكور و را بغاوها تبدا معاهم من سيمانة جاية
ياسر (شاف فجينا) : بصح؟ هادشي كيفرح. و شنو سمية هاد الشركة؟
المدير : الكينغ كنظن غتكون سامع بيها
ياسر (كيخمم) : اممم الكيييينغ الكييينغ...يمكن نكون سامع بيها. هاد الاسم سامعو فشي بلاصة. عموما هادا خبر مزيان. و لكن علاش كان خاصك تهدر معايا مباشرة.
المدير :احم...هو فالحقيقة كاين مشكل صغيير حسب جينا.
المقر ديال الشركة كاين ف مراكش يعني خاصها تنتقل لمراكش لمدة ست اشهر
ياسر (بجدية) : لا هنا كاين مشكل كبير ماشي صغير. جينا ما يمكنش ليها تعيش فمدينة أخرى بوحدها. غادي نشوف ليها شي سطاج آخر هنا حدايا.
جينا شافت فالمدير بخيبة امل بحال الا كتقول ليه شفتي ها مناش كنت خايفة و حتا هو بدورو طمانها بعينيه و كمل هدرتو
المدير : سي ياسر، دابا غنهدر معاك ماشي بصفتي مدير مؤسسة غنهدر معاك بصفتي صديق و ربي شاهد باللي جينا بحال بنتي.
هاد سطاج راه فرصة ذهبية بالنسبة ليها و صدقني قد ما قلبتي مغاديش تلقا ليها شركة احسن من هادي فهاد ضومين. و انا بنفسي كنضمن ليك نزاهة هاد الشركة و باللي ماليها ناس محترمين و عندهم غي المعقول و هادشي بشهادة الجميع ماشي غي انا. هادي راها شركة عااالمية و الناس كيحلمو يخدمو فيها. و دابا جينا جاتها فرصة ذهبية باش تخدم فيها حرااام ضيعها ليها.
ياسر (شاف فجينا و نطق باسى) : اه راني فاهمك و تا انا باغي مصلحة بنتي و لكن ما يمكنش ليا نصيفطها لمدينة بعيدة تعيش بوحدها
جينا (نقزات) : و الا ما كنتش بوحدي؟ (شافو فيها باستغراب) 🙄 احم بغيت نقول زعما داليا تا هي غدوز سطاج فمراكش عند بابات زهير للي نتا وياه صحاب.. و عاد غيخلي لينا الفيلا ديالو تما نجلسو فيها
المدير (تكا فكرسيه) : اوا ما بقا عندك فين تعترض ا سي ياسر هههههه
جينا (شافت فيه بترجي) عااااافاك 😁
ياسر (هز حاجبو فيها) : احححح عليك يا بنت الحرام كي كتولي فاش كتبغي حاجتك (شاف فالمدير) قول لشركة الكينغ بللي لالة جينا الجوهري جايا عندهم السيمانة جاية
جينا (نقزات عليه عنقاتو) : واااااااع كنحماااااق عليك الحب نتا احسن واحد فالعالم 😘
ياسر : هههه صافي طلقيني قجيتيني
المدير : هههه الله يخليها ليك ا سي ياسر... يالاه ا جينا بقاي لينا غي على خاطرك ا لالة. بون كوغاج و ما تحمشمينيش مع الناس
جينا : كون هاني ا موسيو و الله تا نشرفكم
ياسر (ناض وقف) : يالاه نخليك على خير خاصني نمشي نشوف خدمتي
المدير : نهارك مبروك ا سيدي و شكرا حيت ما رجعتيهاش فوجهي
ياسر (ابتسم ليه) : العفو
ناضت جينا و ياسر سبقها باش يحل الباب، غي حط يدو على البوانيي و حلو و هو يلقا داليا و زهير محنيين و ملصقين ودنيهم على الباب. غي شافو راسهم حصلو و هي ضربهم اللقوة و بقاو واحد يشوف فلاخر و ما رضاوش بالفرطة للي طرات ليهم.
اما جينا تبعات باباها و سدات الباب على المدير للي كاعما شاف شنو واقع و تفركعات عليهم بالضحك.
زهير (كيحك فعنقو) : احم احم.. كولشي لاباس ا عمي ياسر؟ ☺️
ياسر (طلع فيهم حاجبو) : امممم كوولشي لاباس ا ولدي غي الله يقطعها عادة فيكم 🙄
داليا و زهير : 😳😬
داليا : هيهيهي لا دابا ا عمو انا نشرح ليك شنو كاين. مللي شفنا المدير عيط ليك خفنا لا يكون بغا يتشكا من جينا و بغينا نعرفو شنو كاين و صااافي
ياسر (بتهكم) : ااامممم مسااااكن اثرتو فيا 😌 (جرهم من ودنيهم) نتوما موحال تكونو بنادم راكم عفاريت. زيد نتا قدامي نهدرو مع باك باش نقادو أمور هاد الانسات خاصهم يكونو فمراكش نهار الأحد.
داليا (غوتات) : يااااااااي يعني قبلتي باش جينا تمشي معايا لمراكش؟
ياسر (عنق جينا) : و انا نقدر نقول ليها لا (وجه كلامو لزهير و دفعو بمزاح قدامو) : يالاه زيد قدامي عندنا شلاااا ما يدار